金船長餐廳 (已結業)

第一次幫襯呢間西餐廳已經大約係十年前， 嗰陣係朋友介紹， 夜晚去到要排隊一段時間， 先有空位。十年前食過乜嘢已經唔記得， 但係呢幾排午飯時間都有幫襯佢， 對比起隔離比較新嘅星馬泰餐廳， 午飯時間去到，多數都唔使排隊已經可以入坐。今次特地為佢寫食評， 係因為真心覺得呢間餐廳啲嘢食好好食， 份量夠。 佢午市嘅餐牌日日唔同， 基本上 set lunch選擇會有沙律，冷盤類，意粉，焗飯， 豬扒同牛扒。 即使你選擇沙律， 金船長出品嘅set lunch沙律 一啲都唔馬虎, 之前有朋友食過佢嘅麻醬日式烏冬沙律, 無論味道同埋相都係五星級。午市套餐會有餐湯同嘢飲， 如果嗰日係海鮮忌廉湯， 佢嘅海鮮配料係好多， 有八爪魚粒蜆肉等等， 今次主菜叫咗炒蕃茄乾鮮菌意粉， 味道唔錯。 朋友叫咗豬扒配薯菜， 豬扒足足有兩大件。其實喺香港， 飲食競爭咁大， 能夠屹立不倒多年， 一定有佢嘅原因。 而金船長可以做到而家， 佢食物嘅質素有一定嘅水準。