鴻圖樓茶餐廳

營業中

休息中

今日喺舊公司山長水遠搬完啲文件嚟觀塘呢邊嘅新公司後，見有啲肚餓加上又搬到身水身汗，所以就喺附近食午餐。見到呢間茶餐廳都幾多人排隊，加上都幾大規模隔離又係佢嘅酒家，相信都應該唔會中伏嘅。入到去坐低無耐想睇下有咩自己鐘意食又想食之際，侍應阿姐誠意推介我食兩餸飯，可能呢期興兩餸飯，加上佢又見我出哂汗咁嚟到呢度驚我會食唔飽，之後就非常有效率咁收埋我個餐牌，叫我去揀兩餸飯，餐廳能夠請到咁有工作效率嘅員工真係可遇不可求。👍🏻見侍應阿姐咁有誠意推介我食兩餸飯咁我就只好試試。兩餸飯份量相當驚人，飯同餸都成座山咁，白飯口感唔錯，如果再軟熟啲口感就更佳。😋兩款餸分別係鴨胸火腿炒菜同肉餅，肉餅幾鬆化，不過可能之前感冒重未好返，味覺就差少少有啲可惜 😔 鴨胸火腿炒菜唔錯，見好多餐廳嘅客人都有點。到最後因為太大碟嘅關係食唔哂啲飯同餸，浪費咗食物辜負咗侍應阿姐一番好意，不過想飽肚嘅朋友仔嚟呢度實冇死錯人，侍應阿姐嘅積極工作態度加上餐廳嘅品質，果然係觀塘老字號茶餐廳，一定長做長有。