是但求其食 (已結業)

人糧尾我糧尾，人哋就要慳飲慳食，而我呢，就要繼續食好嘢，今日喺元朗見到是但求其食，一於睇下佢有幾是但求其法先。好，坐低睇下有咩好食先。我哋一坐低就送上餐包同餐湯，服務好好。黑松露蘑菇湯，個湯都幾重蘑菇味，飲落好creamy，有蘑菇粒。餐包好柔軟，有淡淡嘅牛油香。明太子軟殼蟹pizza，軟殼蟹大大隻，炸得好脆，食落有蟹黃嘅香味，薄餅底薄而脆，咬落去喀喀聲，明太子醬好濃，芝士扯到絲，正！波士頓龍蝦燴飯，一上菜我就被那隻龍蝦所驚艷，擺盤實屬一流，一啲都唔是但求其，而且味道都好好，燴飯索晒龍蝦汁，每一啖都充滿著龍蝦嘅鮮味，龍蝦肉爽口彈牙，感覺好新鮮，平時帶子係主角，但喺龍蝦面前，佢都只係陪襯。香煎羊架配雜菜，羊架煮得好靚，肉質透住粉紅色嘅光澤，有羊香而冇我唔鐘意嘅羊膻味。黑松露薯蓉好香黑松露味，而且薯蓉仲有薯粒嘅口感，唔會磨到一砣砣，值得一提嘅係佢嘅燒菠蘿，燒完之後菠蘿變得更甜，而且好juciy，真心驚喜！蝶豆花茶，飲落有微微嘅茶香味，好順口，放咗檸檬落去之後仲曉變色，睇得又飲得！Latte，聞落好香咖啡味，但係又唔會好苦難入口，奶香完美中和咗咖啡些微嘅苦澀味。