影片
更多
2017-06-18
22100 瀏覽
講緊嘅係旺角維景酒店雅敍閣西餐廳嘅 「蠔」情「蟹」逅海鮮自助晚餐！呢個自助餐供應3個月（2017年4月至6月），每晚嘅6點半至9點半。話就話9點半，但其實係10點。9點半只係食物唔會再refill，但就可以食到10點先走。我去嗰日，好多人都喺9點半前衝刺，拎多輪嘢食，好似雪糕、豆腐花、燒雞翼等，之後慢慢喺剩低嘅半個鐘嘆，真係好正！ 自助餐叫得「蠔」情「蟹」逅海鮮自助晚餐，咁就一定有蠔同蟹！除咗呢2個主角之外，原來每晚都會有即場劏原條油甘魚嘅驚喜環節，就算唔係油甘魚FANS，都可以影相觀摩下，睇住師傅捧住半個人咁高咁長嘅油甘魚出場，喺面前手起刀落咁即劏，幾過癮架！ 飲品可以叫茶同咖啡呢類，如果想飲其他飲品，好似紅白餐酒、果汁、汽水同藍冰啤酒，每位加$30就可以任飲喇！如果鍾意飲酒嘅話，呢個價錢都合理，一啲都唔貴。 呢個自助餐嘅食物種類多，主要分咗壽司魚生、沙律冷盤前菜、燒烤、熱葷（超過20款）、車仔麵檔、甜品（即製班戟、蛋糕甜品）及雪糕，另外仲有每人一盅嘅准山杞子雞燉翅！ 壽司魚生：既然油甘魚即場劏，我就要咗幾塊試下（平時唔食架），味道果然係唔同啲，溫度岩岩好，無其他魚生咁凍。
自助餐叫得「蠔」情「蟹」逅海鮮自助晚餐，咁就一定有蠔同蟹！除咗呢2個主角之外，原來每晚都會有即場劏原條油甘魚嘅驚喜環節，就算唔係油甘魚FANS，都可以影相觀摩下，睇住師傅捧住半個人咁高咁長嘅油甘魚出場，喺面前手起刀落咁即劏，幾過癮架！
飲品可以叫茶同咖啡呢類，如果想飲其他飲品，好似紅白餐酒、果汁、汽水同藍冰啤酒，每位加$30就可以任飲喇！如果鍾意飲酒嘅話，呢個價錢都合理，一啲都唔貴。
呢個自助餐嘅食物種類多，主要分咗壽司魚生、沙律冷盤前菜、燒烤、熱葷（超過20款）、車仔麵檔、甜品（即製班戟、蛋糕甜品）及雪糕，另外仲有每人一盅嘅准山杞子雞燉翅！
壽司魚生：既然油甘魚即場劏，我就要咗幾塊試下（平時唔食架），味道果然係唔同啲，溫度岩岩好，無其他魚生咁凍。
其他刺身都好大路，三文魚、吞拿魚同八爪魚等等；壽司船上有約10種壽司：熟蝦、加洲卷、腐皮、玉子、軍艦等等，壽司師傅不停咁整，不停refill！我留意到啲 wasabi 同平時嘅唔同，我估係餐廳自製掛？沙律沙律冷盤前菜的部分選擇十分多，除咗唔同種類嘅火腿同沙律，仲有小龍蝦、蜆、凍蝦，以及今次主打的蠔（包括凍蠔同特色生蠔杯）及蟹（包括法國麵包蟹 同雪花蟹腳）。
單是生蠔杯，已經有4個口味，每個的醬汁都不一樣，各有特色。喜歡食即開生蠔的朋友可能會因此而有點失望，不過我覺得這樣吃生蠔也有另一種風味，不妨一試！
另一主角蟹腳是當晚男友的至愛，不停追加的食物！因為蟹腳唔單只長，而且勁多肉。侍應又會應要求提供蟹鉗等工具輔助，所以男友吃完一隻又一隻，還剝埋畀我呢個懶人食！
場內另一個特別之處，就係有個車仔麵檔。
呢個車仔麵檔有平時食嘅粉麵揀，仲有好多車仔餸揀，滷水鳳爪、滷水紅腸、蘿蔔、魚蛋、墨魚丸、貢丸、蝦、蜆同青菜等等。我 quota有限，就無試到，不過我見到其他客人都有排隊等，應該唔差掛！？旁邊有即煎鐵板鵝肝，夾埋麵包食，係唔錯嘅小食之選！
熱葷都有唔少選擇，最印象深刻就係有燒味，叉燒、燒鴨、燒雞呀，哈哈！
炒飯、炒麵同烏冬呢啲大路嘢就唔少得，仲有炒時蔬、pizza、炒蜆、焗煙肉忌廉蠔、薑蔥辣蟹、蜜汁燒豬仔髀、咖哩雞配酥皮餅等等，講都講唔晒！
呢個自助餐真係好貼心，因為連鍾意飲湯嘅人都照顧埋，除咗每人一客送到面前嘅准山杞子雞燉翅之外，仲有兩款中式湯同西式湯，迎合唔同口味嘅客人。准山杞子雞燉翅無加味精，煲得好清，無乜油，但連我呢個平時唔多鍾意飲湯嘅都覺得好味。
而我當晚最愛嘅就係燒烤吧同甜品！燒烤吧供應即叫即燒海鮮同肉類，如即燒大虎蝦、鵝肝、美國西冷、煙肉腸仔串、原隻雞翼、芝士腸同台灣腸。
隔離仲有聽都未聽過的「威靈頓三文魚」，「威靈頓牛柳」我就聽過！
燒雞翼同虎蝦都好正，本身食材質素好，師傅又燒得好，蝦肉爽滑，雞翼皮脆肉嫩又多汁，勁正，重點係好有風味！！！
我見到隔離檯本來已經停晒手嘅女士，突然間都食緊燒雞翼，一問之下，原來係因為佢見到我啲燒雞翼好吸引！哈哈，呢種感覺好搞笑，咁個燒雞翼真係好食嘅，我食咗２大隻燒雞全翼同４至５隻虎蝦XD威靈頓三文魚都幾特別，綠色嗰啲係飯，不過我食唔出係用咗咩汁煮。
甜品，好邪惡呀！好多人排隊等師傅整呢個即點即整薄crepe~~除咗呢個甜品櫃之外，熱葷附近仲有一排一盤盤嘅甜品：芝士蛋糕、麵包布甸、焦糖燉蛋、蘋果金寶、即製班戟、中式糖水同豆腐花，仲有一定唔可以唔食嘅Haagen-Dazs 雪糕～
我真係留肚食甜品，整體水準都不錯，沒有中伏的款式。班戟部忙起來時，都需要等幾分鐘，可以接受。雪糕口味選擇都算多，有5-6款口味選擇，自己喜歡「畢」幾多就幾多，食得好痛快！唯一可以做得好啲嘅係，甜品類別可以集中擺放在同一位置，而甜品玻璃櫃可以加上說明，等客人清楚知道有咩甜品款式，唔使次次都問負責嘅同事，咁樣相信亦都方便同事幫客人取甜品。
食足3.5小時真心爽，食完消化咗再食都得，一定唔會蝕！呢個 buffet 供應到6月，星期一至日都係$358加一！指定信用卡仲有8折優惠。生日嘅壽星去食，只要提前兩天預訂，仲會送埋一個一磅裝生日蛋糕，真係蛋糕錢同切餅費都慳埋！
題外話/補充資料：
供應時間：晚上6:30至9:30，10時離座
代價：星期一至日：成人每位 HK$358；小童及長者每位 HK$238 ，另加一服務費
(以上食評乃用戶個人意見 , 並不代表OpenRice之觀點。)
張貼
