紅島冰廳

營業中

休息中

闊別幾年嘅茶記美食，西多士、沙嗲牛麵，自從開返關，大家嚟返香港玩之後，即刻變返名物，不過其實呢幾年都開多咗好新茶記、冰室、好多都有新淨又好食👏🏻❤️咁啱前幾日旺角偶遇一間新淨企理，啲嘢又好食嘅冰廳。樣樣都好吸引，即刻開動眼闊肚窄模式，嗌晒佢哋嘅招牌嘢食😆先黎一個茶餐，沙嗲牛麵，沙嗲味濃牛肉夠滑，份量亦都夠多，配合出前一丁，非常好。奶茶亦都係有水準，既然呢啲基本款都做得好，咁真係可以期待吓其他嘢。再加多個邪惡西多士先，果然係非常邪惡，牛油好靚仔，多士出到嚟又唔會油淋淋，賣相已經好好，一切開，超邪惡嘅芝士拉晒絲，呢個一定要試😄咖喱同埋焗飯都係佢哋嘅招牌嘢，好，咁一於嚟個兩溝。咖喱海鮮焗飯除咗咖喱，都好夠椰香，配料多又大粒，你哋睇吓佢青口同埋蝦，都係大大粒，真係無留手。鐵板黑椒牛柳配意粉，牛柳好食，夠腍，意粉都唔求其，番茄意粉黎㗎。份量都好足料，不過講開又講，我哋全晚望到隔籬左右，佢哋嗌啲炒粉麵、飯、晚餐⋯⋯全部都係好大份，連嘢飲都好大杯😆一般以往搵嘢食，如果喺大街大巷見到茶記或者冰室都未必會入去，驚多人同坐得唔舒服，但原來呢間又有驚喜，夠大有兩層，我哋去嘅時候係星期五晚飯時間，都啱啱好仲有位