好煮意

營業中

休息中

【北區】【好煮意】每次當有人問我上水有咩好食，我都念念不忘呢間「好煮意」嘅藥膳雞煲，因為真係好正。我喺開呢個 foodie account 初期已經講過佢哋，我 2020 年嘅 26/5 開 account，到 14/6 就已經出文。聽講佢哋近年喺馬會道開咗間食米線嘅，就同真正哥去試。我點都試 $55 嘅「招牌藥膳醉雞麵」，呢碗應該就係佢哋嘅招牌菜，以前一向做開藥膳雞煲嘅湯底都咁出色，呢碗米線絕對難唔到佢哋。個米線底亦都唔差，唔會太腍或者太硬。嘢飲我跟餐加 $10 試「熱菊花薑蜜」，都好好飲，菊花味同薑味都出，唔錯。真正哥就試喺 menu 同樣被推介嘅「新加坡喇沙湯麵」，佢個價錢係 $25 有啲奇怪，原來係好似車仔麵咁逐個餸計錢。配咗油麵底，加埋 $6 嘅「支竹」、$10 嘅「魚肉春卷皇」同 $9 嘅「秘製腩肉」，我都食咗少少，覺得叻沙湯底唔錯，係誠意之作。而佢碗嘢嘅其他配料都幾豐富，配合埋個油麵底都夾，唔比啲星馬菜嘅叻沙差好多。佢都有加 $10 轉跟餐飲品，佢飲「凍菠蘿青檸蜜」，都見佢飲得又快又興奮，應該都唔錯。咁樣夾埋先食咗 $125，咁嘅質素嚟講好抵，唔怪得見佢哋堂食同外賣都好多