新駿皇窩心小棧

營業中

休息中

【元朗區】【新駿皇枸杞麵】由於疫情我少咗入學校幫手，近排都真係少入元朗食嘢。加上我亦都冇之前咁癡線成日無啦啦走入天水圍去懷緬我同我前度相處嘅時光，其實佢嘅身影喺我心裡面縈繞不散的話，我個人去到邊度都依然係咁嘅狀態嘅。當然好似元朗呢啲重心地段，無論我點樣嘗試都好，嗰啲畫面，當時嘅心情，到今日到依然歷歷在目。就算係搵其他女性朋友甚至係女學生陪我行嗰啲路，根本唔會係同一樣嘢嚟，所以呢招根本冇用，搞唔掂，算數好過。雖然個人就渾渾噩噩咁，但係都係識肚餓嘅。本身係想試一間粉麵店，吖點知佢冇開喎，唔知係咁啱冇開定係執咗，唔理啦，即刻喺附近搵嘢食。就見到呢間喇，我以為係新開，因為之前對呢個名冇乜印象，原來只係改名。唔叫「窩心小棧」叫「枸杞麵」咁就梗係要試吓佢哋嘅招牌菜枸杞葉，佢哋用嚟煮啲肉，之後再配飯麵咁，都幾清。肉類我揀咗「鮮瘦肉」同埋「鮮豬腰」，選料新鮮之下，又真係幾好味，枸杞葉就有啲苦同甘，好似幾有益。而五穀類嗰邊我要咗「特色撈麵」，原來仲有得揀撈咩麵，我就要咗「上海麵」，都撈得幾好食，有啲葱油加埋啲肉碎咁，幾惹味。加埋杯不過不失嘅「凍檸茶」走甜，$55 嘅價錢，我覺得唔差，至少佢有佢嘅獨特性先