集眾菜館

營業中

休息中

天氣太熱，坐低即刻叫啤酒先至再慢慢揀餸，呢隻德國麥啤幾好飲，真係飲到小麥味，又爽又清涼有冇苦澀味。叫咗個鐵板啫啫雞什，又香口又惹味送酒一流，雖然心入面覺得有啲邪惡但係真係好食。佢個集眾招牌雞都好食，難得有雞味，隻雞嘅皮好薄，冇乜脂肪肥膏嗰啲，雞肉都嫩滑，相入面係半隻份量都好足吓。又肉又內臟，梗係要叫返個蔬菜類別平衡返一下健康啦，呢個係龍仔甜梅菜蒸菜心，菜心好嫩好綠，加咗甜椰菜上去原來個味道都幾夾，呢個都幾好食。

因為未齊人，所以先叫咗個小食邊等邊食，就係叫咗呢個冷盤，川椒豬手，個豬手都幾入味，雖然叫做川椒，但係其實又唔係好辣。另一個小食就試咗冰火魷魚，都係冷盤，不過呢個魷魚堅辣，叫冰火真係一D都無錯，兩個小食都好食。終於等齊人可以開餐，我地叫咗4個餸，4個都幾好食，呢間小菜館真係勁。先上枱嘅係呢度嘅招牌菜鮮菠蘿拔絲咕嚕肉，呢個真係做得好出色，個咕嚕肉外層係輕輕的脆口，入面粒肉就軟林林，個汁都好食，唔係一味死酸。個集眾招牌雞又係好正，隻雞好有雞味，雞皮薄，又唔肥，連埋雞潤雞腎雞腸，證明真新鮮。呢個鹽水花甲好新鮮，又無沙，而且都幾大粒肉。個菜都好有特色，菜芯加上甜梅菜原來都幾夾幾好食，值得推介。

招牌咕嚕肉個味道同個口感又真係唔錯，難怪差唔多每一枱客人都嗌，佢好食嘅地方就係咕嚕肉嗰個外皮好脆，就算淋咗個酸汁落去都冇影響到嗰個脆度，但係佢又唔係渣到硬晒嗰種咕嚕肉，佢入面嚿肉係好軟滑嘅。貪得意嗌咗個鹹蛋蒸肉餅，個肉餅多瘦肉少肥肉。金銀蛋浸勝瓜真係超好食，師傅將個勝瓜刨晒啲皮，淨係保留勝瓜最遠最滑最腍嘅部份，冇諗過勝瓜都可以咁嫩口。最後一個係金薯安格斯牛柳粒，所謂甘薯其實就係炸過嘅薯仔粒，呢個好食，因為薯仔粒吸咗牛肉嘅香味。

朋友澳洲返嚟約食飯梗係要同佢食一啲夠晒地道而且有鑊氣嘅粵菜啦，所以就揀咗太子呢一間小菜館。招牌咕嚕肉叫唔得啦，老闆娘話除咗菠蘿係新鮮菠蘿之外，連咕嚕肉用嘅豬肉都係新鮮豬肉，唔怪之得食出嚟又鮮味又亂畫，咕嚕肉外層嘅皮加咗個甜酸汁之後仍然保留微微嘅脆口，味道真係非常出眾。唔好淨係食肉要食啲菜，老闆娘推介我哋試呢一個甜梅菜龍仔蒸菜心，甜梅菜嘅清甜帶出左菜心嘅鮮味，呢個配合搭真係幾好食。第三個餸就叫咗一個邪惡小小嘅薑蔥鐵板魚春魚卜，呢個餸夠晒嘢未夠晒香口，因為鐵板上所以可以保持個新嘅溫度，我自己覺得乳酪好食過魚春。呢度隻德國麥啤幾好飲，出面好似好少飲得到。

呢間餐廳朋友揀嘅，事前訂咗位。原本諗住嗌三四碟餸 for 3個人，點知落完單先同我哋講每人最低消費$200。每道餸平均都係$100左右，三個人夾硬要嗌成六道餸，根本冇可能食晒。間餐廳離太子站行2分鐘，地鋪，喺內街。附近乜都有，街市、招牌製作公司、寵物店，同有少量餐廳。啲嘢食係唔差，但係一間喺內街嘅大排檔，服務態度ok又唔係特別好，竟然每人最低消費要$200？喺menu又冇寫？喺餐廳外牆又冇寫，裏面都冇見到有黐住？即係要口頭講先知喎。唔知係咪見人少，所以先有最低消費呢？連商場嘅餐廳都冇每人最低消費$200，係太子大排檔食竟然仲貴過商場餐廳。

寒冷嘅天氣就係令人想起蛇羹、煲仔飯同埋羊腩煲，呢間小菜館頭兩樣就好似冇，不過呢度嘅羊腩煲又的確係真材實料貨真價實。啲羊腩唔算好肥，但係又唔係瘦晒，始終我覺得食羊腩煲啲羊腩係要有小小肥先至夠香嘅，呢度嘅羊腩炆得好腍，而且又好入味，啲馬蹄同埋枝竹都好好味，另外會跟一碟生菜俾你之後落嚟食，唔好嘥咗個羊腩汁啦。呢度嘅咕嚕肉又係做得好好食，外面輕微脆口，質感有啲似齋雞粒，入面嘅豬肉好軟熟，連啲半碟菠蘿都好味過人，呢間小菜館真係有料到。

二人行吃不了太多東西，在這人氣小餐館點了三個菜，三個都很好吃，當中最驚艷的要算是鐵板魚卜，魚卜外層煎至微焦，令魚卜入口份外香口惹味，配上冰凍啤酒實在令人感動。這家店的麥啤不錯，外間不常見，值得一試。除了鐵板魚卜之外，我們還點了小炒皇和蒜蓉粉絲蒸青口。這家的小炒皇最值得一讚的地方就是不太油，外面吃到的實在太多油，而且經常炒得太濕，失去了小炒皇應有的乾身。另外，這個小炒皇內有炸過的芋頭絲，令小炒皇更香脆可口。蒜蓉粉絲蒸青口很好吃，青口嫩滑多汁，吃著就是有一種鮮味留在口中，齒頰留香。

環境地方唔太大，有D 擠逼，但氛圍熱鬧，適合朋友聚餐或家庭小聚，適合放工需要Chill Chill飲酒既朋友🍺。🦀金沙鮮魷 $48濃郁的鹹蛋黃醬，口感酥脆🐮金薯蜜椒安格斯牛柳粒 $68金薯炸得外脆內軟，安格斯牛柳粒肉質軟嫩，蜜椒炒得略生🍍菠蘿拔絲咕嚕肉 $58賣相唔太好，但咕嚕肉外皮酥脆，鮮菠蘿的甜酸，口感層次豐富🐔集眾少爺雞 $238肉質鮮嫩，但唔係好入味，整體好淡🥬蒜蓉炒豆杯 $68炒得太油，但味道唔錯整體：食物份量較少及濃味，建議配白飯較好‘-‘-‘-‘-‘-‘-‘-‘-‘-‘-‘-‘-‘-‘-‘集眾菜館 📍地址 : 太子柏樹街13號地舖🏰環境: 6/10🙇🏻‍♂服務: 6/10 💰價位: 中價⏰用餐時段: 晚餐‘-‘-‘-‘-‘-‘-‘-‘-‘-‘-‘-‘-‘-‘-‘

呢間小菜其實食咗一輪都唔記得寫食評依家補返寫。羊腩煲真係非常好食，$498呢個價錢有咁嘅份量同質素算係抵食，跟埋時菜一碟，食到半路中途侍應仲主動幫我哋加咗啲羊腩汁去淥菜，好少遇到咁好嘅服務。佢個羊腩唔肥，同埋炆得好入味，而且亦都唔會好煙韌，入面啲支竹索曬啲羊腩汁好正。訂位嘅時候預訂埋鷓鴣燉湯，四個人每人都飲到兩三碗，睇到碟湯渣就知道呢個燉湯非常之足料，落咗好多雞腳啱曬我，以三百幾蚊嚟講真係好抵。我見呢度好多人飲呢支麥啤所以試咗，又真係幾好飲，好襯過羊腩煲。

態度差，未至於傳聞中既好味。明明晤full仲要要求食客只可以1小45分用餐時，準時到既3人坐3人枱，早到既2人坐6人枱。一個字，名不符實。今時今日既服務態度不敢恭維

好友相聚暢飲一番，咁啱呢間小菜館嘅下酒菜又真係堅好食，下次一定再來。琥珀合核粒粒黐滿芝麻，香脆可口，比花生更好。呢個係川椒豬手，雖然叫川椒，但係唔辣嘅，呢個係冷盤，豬手肉爽脆有彃性，煮得好入味，唔會有臭豬味又唔會有雪藏味，辣椒粒同蔥花散發出陣陣香味，呢個小食一邊食，一邊飲啤酒，好正。呢個仲正，叫做鐵板魚春魚卜，啫啫聲上菜，熱辣辣，出晒煙咁樣，香噴噴，一口咬落個魚卜度外脆內軟，呢個餸好惹味，連D配菜都好香，正。所以成日話好嘅下酒菜真係好緊要，有好食嘅餸先至飲到多D啤酒。

三人行晚餐時間來了這家友人推介之小型粵式小菜館，一坐低先來啤酒三瓶，店員推介德國麥啤，點了，味道不錯，麥味香，無苦澀的味道，外間少見，結果飲了很多。小菜方面，因才三人所以吃不了太多東西，點了兩味，均有著上佳的美味。店員推介我們試炸子雞，味道果然不同凡響，先是隻雞本身很新鮮，很有雞味，薄薄的雞皮炸得脆而不油膩，皮下脂肪亦算少，雞肉亦很嫩滑，至於炸蝦片估計是新鮮炸出來的，沒有一點酒油益味，亦沒有翻炸的隔夜口感。我們見個炸子雞咁精彩，所以特地試埋佢個豉油王炒麵，果然高水準，先是炒得夠乾身，二是豉油平均分怖於麵條上，三是鑊氣十足，真是精彩的一晚。

呢一間位於太子嘅隱世小店真係好掂，食材新鮮之外，大廚嘅廚藝亦相當高。先來個羊腩煲暖一暖先。羊腩嘅肉質軟熟得黎有彈性，皮下脂肪比較少，而且炆得又淋又入晒味，馬蹄同d支竹都吸滿羊腩嘅精華。呢度嘅羊腩煲肉比較多骨頭相對比較少，$49X一煲唔洗比加一茶芥算係好抵食。豉油王鵝腸又係值得一試嘅菜式，d鵝腸好新鮮，食落都幾爽口，d鵝油好香。黃金豆腐粒外脆內軟，豆腐入面好滑。金薯安格斯牛柳粒炸得好香口，d金薯吸埋牛柳粒嘅味真心正。粉絲花蛤煲就係d粉絲仲正過d花蛤，因為d粉絲吸晒花蛤嘅鮮味，佢呢度d花蛤都新鮮大隻嘅。

朋友推介這家吃小炒的中菜館，今晚一行6人，點了很多個菜式，樣樣精彩。最精彩的要算是這道魚米之鄉，選用新鮮海杉斑，很入味，要用上如此大條的魚才有這麼多斑頭腩肉。真的非常大條，以兩味的食法，先是炆斑頭腩，然後第二味是濃味鮮魚湯浸魚片，再有上面放下脆米粒，味道真的不同凡響，驚喜非常。金薯安格斯牛肉粒又是一絕，那金薯其實就是炸脆了的薯仔粒，很是香口。然後再點了一個羊腩煲，味道很好，據說是用新鮮羊烹調的，所以鮮味十足，羊肉很軟熟，沒有一點羶味。

堅正的粵式小菜，book咗七點半都要等一陣先入得，全場爆滿，真係唔book位都唔港洗指意walk in食得到。我哋叫咗4個餸，買四個都好多好食。黃金豆腐粒外層又薄又脆，裡面又軟又滑。脆皮炸大腸脂肪比較少，外層炸得好脆，而且d豬大腸都幾乾身，點甜酸醬，邪惡但好味。川椒豬手嘅豬手唔係炆到淋晒嗰種，而係保留豬手嘅彈性兼一d都唔韌，雖然叫川椒但係只係少少辣，整得好入味。咕嚕肉差唔多枱枱都有叫，真係好食，佢個質感做得好好，炸得黎又食到豬肉嘅軟熟，唔係一味硬或者一味軟。