金飯館叄·零 咖哩·干炒牛河專門店

喺銅鑼灣搵到呢間街坊人氣店，餐廳食物份量多，大件夾抵食嘅餐廳，主打各式炒粉麵飯，幾有鑊氣㗎😋古法焦糖炒牛河呢個係餐廳呢招牌菜之一，餐牌上面特別註明用咗李錦記特選生抽 。牛河唔算太油膩，比起坊間嘅炒牛河係偏甜少少，呢種焦香令到個牛河更加有特色🐮 牛肉唔會過分醃製，面頭仲附上一隻燶邊蘭王太陽蛋，蛋汁撈埋牛河更加正😗厚切牛脷咖喱焗飯焗飯嘅主菜都有幾個種類可以選擇，我哋嗌咗厚切牛脷，每片牛脷都整得好軟腍，配埋咖喱汁真係一流👅 底下嘅飯當然係餐廳嘅拿手，炒飯底，夠晒粒粒分明。整個飯焗完出嚟，唔會太燶，面頭嘅芝士輕鬆做到拉絲效果🧀慢煮瑞士雞翼一份有五隻雞翼，每隻都非常飽滿，而且咬開入面仲有好多肉汁🐥 入口都唔會覺得太肥膩。飲品各式嘅樽裝飲品都係統一價錢，我哋嗌咗一枝津路烏龍茶同埋懷舊玻璃樽裝嘅可口可樂🥤 比起平日飲嘅可樂更加有風味。如果唔想嗌飲品嘅話餐廳仲提供自助斟水區🫖呢度嘅食物份量真係大，我估計三個人叫兩碟都會夠飽，兩碟入面必定要叫一碟炒飯或者焗飯，佢嘅炒飯真係十分出色👍🏻…查看更多

喺牛頭角憑著椒鹽豬扒飯贏盡口碑嘅炒飯專門店金飯館 最近喺港島灣仔開設第3間分店🤩 繼旺角金飯館2.0肉餅焗飯專門店，金飯館3.0就主打咖喱及乾炒牛河‼️ 餐廳將茶餐廳美食升級為新店推出3款新菜式，包括：古法焦糖乾炒牛河、咖哩蛋炒飯、自家製原粒乾鮑雞粒砂鍋飯，每款菜式都即叫即做，熱辣辣夠哂鑊氣🔥咖喱吉列豬炒飯 : 炒飯炒至粒粒分明，乾身又彈牙，佢哋每粒米飯都係被蛋汁完美包住🥚；而咖喱醬汁加入獨門配方🍛，用上泰式香料🇹🇭，味道會較為清新，帶點辛辣，撈飯食好刺激。吉列豬扒亦都好大塊又厚身，即叫即炸，炸到外層酥脆，內𥚃鬆化又可以鎖住肉汁，配埋燶邊半熟蘭王蛋🍳，夠哂邪惡😈古法焦糖乾炒牛河: 小店以創新手法加入焦糖作為調味製作岀呢碟乾炒牛河，入口帶甜香微焦但又唔覺得膩，份量亦好驚人，見到枱枱有叫都要打包😱 用上新鮮牛肉，肉質鮮嫩又唔會好肥；再加入泰式芽菜、蛋絲、紫洋蔥等炒香，當然唔少得燶邊半熟蘭王蛋，蛋汁香濃～砂鍋啫啫腐乳椒絲生菜煲: 以砂鍋啫啫烹製，鑊氣十足，好惹味～…查看更多

上網見到介紹所以嚟食，試咗個咖喱牛筋腩炒飯，鮑魚雞粒炒飯同煲仔通菜，只係覺得鮑魚雞粒炒飯有少少鑊氣，咖喱味麻麻，牛腩唔夠腍，食物無特別。座位方面，我明白係繁忙時間，卡位兩個人要坐埋一邊，但係過咗繁忙時間之後，侍應見我哋張枱唔夠位擺都無安排一個更好的座位，一張卡位枱擺8樣野，我地要攞起個碗嚟食飯。。…查看更多

之前就喺牛頭角食過金飯碗 一直對佢嘅炒飯念念不忘 又平又有鑊氣又大大份 🫃估唔到而家開到第三間分店 蝦頭油炒飯🦐鑊氣十足！每粒飯都金黃香噴噴，蝦油嘅鮮味完全滲入飯粒，仲有彈牙蝦仁，大大粒蠔 ，上面仲有櫻花蝦，食落濃郁得嚟唔油膩。黑松露墨魚餅飯🖤墨魚餅煎到外脆內彈，墨魚肉餅好有咬口，黑松露醬落得豪氣，一上枱就聞到濃烈香氣，撈埋熱飯同焦香嘅蘭王蛋 實在太邪惡但好滿足😳佢嘅份量實在係10分驚人，絕對啱晒大胃王黎食 草豆quota下次就過嚟試佢嘅乾炒牛河😋金飯館叄·零 咖哩·干炒牛河專門店 (灣仔)灣仔天樂里6-18號恆安大廈地下D&E號舖…查看更多

乾炒牛河係粵菜嘅名物，喺香港任何提供粥粉麵飯嘅食肆都可以食到。牛河雖然廣為人知，但做得好嘅餐廳真係寥寥無幾。琴晚路經天樂里見肚餓，赫然見到一間自稱「乾炒牛河專門店」嘅店舖，就諗住一定要試吓。點知抱住希望入內，最終以失望裹腹。入座之後，點咗一客「古法焦糖乾炒牛河」、一客「蟹肉咖哩炒飯」。牛河一上黎，已經知道上當。牛河嘅色水偏淡，河粉表面暗啞無光，好似係冇落油炒嘅咁。牛肉係軟嫩嘅，但醃肉時間不足、底味欠奉。牛河入口好甜，分明係落糖太多。河粉軟爛，冇牙嘅老友記唔使戴假牙都可以妹得爛。牛河入面嘅芽菜、洋蔥、青蔥同牛河只係搭檯關係，完全冇香氣、冇口感，感覺係預先炒定嘅配料，落鍋兜吓就當爆鍋。呢碟牛河，真係一試難忘、再試火滾，水準絕對及得上工廠食堂、後街架步。開頭唔知點解牛河表面要加隻煎蛋，仲要係蘭王，試過先知原來蘭王煎蛋係遮羞布。咩「古法」、咩「焦糖」只係個名：你同佢玩認真，只係因為你太天真。傳統乾炒牛河，講求嘅係鍋氣，以高油溫爆鍋，釋放配料同牛肉嘅香氣，滲入河粉。用科學啲嘅講法，以高溫爆炒，促進咗Malliard Reaction嘅發生，豉油、牛肉入面嘅蛋白質轉化爲氨基酸，入口先會食到鮮香。所謂嘅焦糖，係兩個方面嘅追求：河粉表面均勻嘅焦糖色、糖焦糖化之後嘅甘香或焦香味，但絕對唔係甜味—牛河從來都唔係甜口嘅食物。洋蔥、芽菜、甚至韭黃係爲鹹口嘅牛河提供爽口的口感，以菜嘅鮮爽中和鹹味。至於個炒飯，我只能話佢地做到粒粒分明，但同樣係太乾，飯粒雅淡無光，入口好似食咗一啖戈壁沙漠咁。後廚唔知係咪為咗啲客食完個碟冇油，所以炒牛河炒飯儘量少落油。落油幾時落、落幾多，完全係基本功，要炒好河粉同炒飯嘅廚師都要識得拿捏。為咗個碟唔油而落好少油，令食物唔香，係斬腳趾避沙蟲嘅做法，唔係一間自稱「專門店」嘅應有水平。最後，我領悟到一個道理：呢個年代，只要你臉皮夠厚，尷尬嘅就係食客。…查看更多