金鍋清湯火鍋 (已結業)

呢間餐廳打邊爐好正，我地揀咗就皮蛋莞荽鍋，皮蛋份量多，煮到個湯好入味，加上粟米同大量莞荽，令到湯底非常濃郁。🌿佢哋嘅手打墨魚仔，質感真係一流，⼀入口已經感覺到啲墨魚仔粒粒分明，而且有嚼勁，工夫真係唔簡單，完美保留咗墨魚嘅鮮味同口感。🦑再講下個海蝦，呢度用嘅海蝦蝦肉嫩滑鮮美，每隻蝦都夠大隻。佢哋嘅海蝦保持咗啲海水味，好似啱啱喺海入面撈返嚟咁，冇太多加工，簡單煮熟已經好食得唔得了。🍤美國雪花肥牛厚薄適中，雪花紋理分佈均勻，一煮落鍋入面，啲油脂溶化得啱啱好，食落口感非常不錯。🥩至於百分百新鮮手切吊龍牛肉，就更加係一絕。呢個牛肉入口即溶，好有牛肉嘅原味，肉質亦都相當鮮嫩。🐂最後講下豬頸肉，豬頸肉嘅肥瘦比例完美，每一口都係嫩滑，食落口感爽口彈牙。🐷…查看更多

去咗佐敦食打邊爐，見到「金鍋」呢間餐廳，感覺幾港式，唔似會好貴，一於試吓啦！金鍋嘅服務態度好好，好適合同朋友或者家人一齊去～員工仲會介紹有咩好食湯底揀咗牛骨清湯，幾鮮甜，滑口又唔會太油膩，仲有啲冬瓜片，加分！雪花肥牛，牛肉油脂分布均勻，入口即溶，牛味濃郁😋吊籠牛肉，係牛背脊內側上邊一長條肉，肉質夠肥，味道香口❤️❤️另外要提吓，新鮮肥牛嘅碟好特別，有寫到部位同埋建議淥幾耐，咁就可以放心食到啱啱好熟，唔會老嘅肥牛。鵝腸，白滑嘅鵝腸條條鮮甜，爽口，腸內肥膏夠厚，所以入口香醇。炸午餐肉，好香脆，外脆內軟。手打墨魚滑，墨魚滑口感彈牙，鮮味十足，好出色。雜菜拼盆，$32 有好大蘿蔔，打邊爐嚟講性價比高。…查看更多

今次嚟呢間打邊爐，真係有驚喜，我哋係叫豬骨清湯，但係清得嚟係好飲嘅！另外，配菜方面，叫左牛肉肥牛、白柏葉、墨魚滑、花魷魚、韭菜餃、芝士腸，同埋加咗個烏冬做主食。當中最驚喜嘅係白柏葉，白雪雪好爽口！至於餃子，係少數火鍋店裏邊我覺得好食嘅餃子！唔會煮完變一pat嘢咁款。同埋最最最鍾意係入面既素菜區可以任食😍最後煮咗個烏冬，吸曬唔同煮完既食材味，非常之飽，又滿足😋😋😋另外仲有加配燒雞髀菇同埋安格斯牛，非常濃厚嘅燒烤味😚好少一餐裏面可以同時享受火鍋同埋燒烤！係吃貨嘅幸福♥️會再幫襯！…查看更多

之前都嚟過打邊爐，覺得整體都唔錯，所以再嚟幫襯。今次揀咗經典嘅皮蛋芫茜湯底，都有唔少皮蛋喺入面，一上檯已經勁香芫茜味，令人食慾大增。配料方面我哋兩個人點咗蒜香滑牛肉、雪花肥牛片、皇帝菜、手打鮮蝦滑、牛筋丸、韭菜餃同烏冬。好鍾意呢度嘅蒜香滑牛，醃得好入味，肉質嫩滑彈牙；雪花牛肉份量都多，牛味都幾濃；鮮蝦滑口感細緻綿密，有蝦嘅鮮味；韭菜餃餡料飽滿多汁，餃子皮薄吸汁；整體上啲配料都新鮮又大份，抵食又坐得舒服，值得encore👍🏻…查看更多

今日同朋友黎到依間火鍋店烚下烚下，店面骨緻裝潢走搞笑風。除咗一般嘅火鍋材料之外，仲有唔少特別嘅部位，剔紙落單，簡單方便。隔離有調料區，俾客人自助混醬，入面有我最中意嘅麻醬、沙嗲醬同豆瓣醬。我地點咗牛骨清湯，牛骨湯非常清甜，入面有冬瓜、冬菇、紅棗等等嘅配料，打邊爐之前一定要飲番碗先。牛脷，牛味非常重，口感煙煙韌韌。牛黃喉，即係牛嘅主動脈，估唔到依度竟然有得食！口感爽爽脆脆，值得一試。黑豚肉片，每一片都好大片，肉質嫩滑一啲都唔韌。鵝腸肥瘦均勻，爽得黎又帶有油香味，千期唔好煮太耐呀，如果唔係會好硬。最重要一定要試下小酥肉，炸得好酥脆，灑上胡椒粉，就咁食或者淥落去都得~…查看更多