金苑酒家

營業中

休息中

極差的長腳蟹，估計應該喺廚房換咗隻死嘅俾我哋，仲死口唔認，態度極差，如果你係為咗食隻蟹而去，我都係勸你唔好去啦，係一隻死既空殼蟹。其他嘢食更加唔使再評論，包片皮鴨既皮，成疊黐埋一齊，係meet唔開㗎，片皮鴨有得半碟，收你成千蚊，抵唔抵就你自己諗喇，但反正我就一定會再去，佢哋啲夥計態度極差劣，同佢哋講隻蟹唔得，講到想開拖打架咁，又喺度賴個供應商又盛，扮晒受害者。裝修就完全冇啦，地氈又污糟，算啦唔講，係咁多！

是因今天咁啱放假就出旺角行下，一出地鐵站就見到啲阿姨派傳單，橫掂都未食lunch咪上去試下。點知！去到除左安排座位，其他事個伙計完全聽唔到，服務態度極差，唔會理客，落單都等勁耐先有人理叫伙計加水（叫左3次）都未加到。明明個場唔係好多人但唔知喺度忙乜。啲點心都係要等好耐，上到黎又咸又難食。100%呈現何謂不知所謂！飲咗咁多次茶，去過咁多間，第一次咁㷫烚烚，絕對冇下次👎🏻👎🏻👎🏻

當然要食招牌$998.1隻長腳蟹加半隻燒乳豬套餐啦，我相信全香港應該未必有酒樓可以做到咁平，俾佢樓下嘅宣傳單張吸引咗上咗嚟試吓，結果真係冇花冇假，差不多全場每一張枱都有食呢一個套餐，即係證明有幾咁好食同埋幾咁抵食啦

電話訂枱接聽服務人員態度超串，問下有乜招牌菜都要比人串，特價餐點配又要串，想問BB猪又負氣的“冇㗎冇㗎”，淨係得你度有飯食？？可能接電話人心情唔好，但你心情唔好係係嘅事，第一次訂枱遇到咁呢人，好難想像坐下來食飯會點

完全冇服務！等左好耐舉手舉到甩胶都冇人接點心order紙。冇人加水，叫都唔加，問員工係咪要自己加水，佢話係，叫我去埋邊拎個銀色水壺自己加，佢自己就睇住個同事整龍蝦。好彩我唔係叫左好多野食，2:30pm入座唔夠一個鐘截單又唔出聲，一埋黎就比張單我叫我比錢，唔怪得下午茶呢啲時段度度都要排隊等位而佢大把位啦⋯⋯

繼上次食完阿拉斯加長腳蟹優惠後，今次再嚟食新推廣-澳洲龍蝦+北京片皮鴨（兩食）$398 兩次過嚟都係坐滿人，一定要打電話預訂，基本上枱枱叫嘅野都係一樣，一係長腳蟹，一係澳洲龍蝦+片皮鴨兩食龍蝦肉口感扎實 ，而北京片皮鴨 兩食，我只鐘意用麵粉皮包片皮鴨來食個款，另一款生菜包鴨鬆不太適合我口味。無記錯的話，需要以正價叫一樣小菜先可以有呢個優惠價，所以叫左 飛天炒泰國通菜，價錢偏貴，大概百一蚊，但非常大份，炒得惹味。

昨晚與家人共3人旺角覓食，被乳豬招牌吸引進店，點了$588套餐：一隻龍蝦伊麵及半隻乳豬飯。龍蝦伊麵很大盤，主要是伊面及蟹腳；乳豬半隻約有8件，炒飯鋪底。埋單時竟然表示這套餐必需加點一碟正價小菜，無奈叫了其中最便宜的$138肉碎長豆，埋單共$881，包括必須計4人茶錢及2碟酸菜。與經理爭論，經理表示安排入座前員工必已告知加點小菜，但根本沒有提及；又表示套餐單張已寫清楚，再看發現與電訊公司合約上的細字一樣細！

一間垃圾酒樓，滿心歡喜去試下，book位時已經問清楚，要預早訂的，去到話要加錢已經知賴嘢，問問格離枱食緊個D都冇加錢，所以吾加，但係隻蟹一上枱，細隻都冇乜所謂，因為預咗，但一開，有小小臭味，蟹乸，好多春，D膏黑色，找經理理論，態度差，唔肯換不特止，仲要死都話係啱！有圖有真相，中伏！總之就black店！你哋吾信邪試吓就會知道🤣🤣🤣

之前朋友既朋友食過話好差, . 原本都想取消訂左,  最後生日主角堅持一試, . ... 食物又OK , 蟹都好好味, 夠新鮮,      當晚負責寫單阿姐,極力推介聖子皇, $158 (4隻, 我地一行5人, 要加多一隻 $40 , 同我地講最後一份, 要快快快.   (之後我地聽到, 每張台佢地都咁推銷 )  好在聖子皇好夠新鮮,好大隻, 而 粉絲都好好食.... . 可以一試!

今日朋友請食飯，4個人叫左個長腳蟹乳豬套餐再加個燒鵝🤗一黎到係個菜煲～ 中規中矩都唔會話有乜大驚喜。然後就上乳豬，豬下面有炒飯😆成個餸都幾好食，乳豬本身就無死，炒飯唔會太油，夠味。雖然份量唔多不過真係幾好食。然後到長腳蟹，佢寫4斤就肯定無架喇，成日食開一睇就知3斤左右。見到之前好多人食評話中伏同麻麻都有d擔心，不過我地又幾好彩喎，拆開d腳都多肉夠鮮，唔差！4個人轉眼就食晒，但唔夠飽，再叫多碟燒鵝，無點醬都夠味。總括而言我地第一次黎呢間食係無伏

睇報紙時見到有優惠，一隻4斤長腳蟹併有米皇子豬 988，所以就訂枱試下，去到時，話我地無預約叫我地門口等，我地比返通話紀錄佢睇先安排返入坐酒樓內坐位好迫，接近椅背掂椅背，而侍應嚴重不足，你要舉好耐手先有侍應招呼你先上皇子豬，肥瘦適中，皮脆，糯米飯炒得好乾爽，唔油膩，好味重頭戲，長腳蟹到喇，滿心期待，一折開隻蟹，無膏，霉嘅，真心失望另外仲叫咗3個小菜，味道不過不失，最後埋單就17xx，以咁嘅價錢，其實有好多選擇值得一提嘅係，店内衛生麻麻，去洗手間條路放滿碗碟雜物，洗手間內一地紙巾，洗手盆內有樹葉，希望店內加勤清潔

屋企人見到呢間阿拉斯加長腳蟹加燒豬套餐好想食，今日終於來一試。 我本身好少食蟹，所以食蟹經驗都好淺。 隻蟹刚上桌的時候的確很吸引，我只是吃了一隻蟹腳，但屋企人越吃越覺得隻蟹不對路。怎麼蟹腳會沒有肉的而且都是爛肉 ，並不是食開的一整條粗蟹肉，揭開蟹蓋裏面除咗一堆肺之外看不到能夠吃的蟹肉或蟹膏之類。 簡直食到一肚氣兼且覺得比人搵笨。家人 同職員講話隻蟹有問題，佢嘅回答只是"蒸隻蟹之前我都唔知裏面係點嘅"便是給我們的答案。呢個套餐額外要order一個原價的餸，但一看餐牌炒個菜都要佰幾蚊，叫左個芥末蝦球已$198，加多個勝瓜浸魚肚和 豉油王炒麵， 計埋花生每碟20蚊茶錢每人15蚊，埋单 一千七百幾。 呢個價錢我根本唔需要喺度食，問過食蟹專家說只有質素差嘅蟹或死蟹肉質才會這樣的縮水。不會再來。

叫左個蟹套餐$988，經理話你地五個唔夠食加$298有六斤，咁無所謂加啦，不過黎到睇落都應該係四斤幾左右（本人一向有食開，如果有食開的人都應該知一隻六斤蟹其實係幾多肉下）咁算啦，無睇住佢上磅，我當佢有啦，到埋單的時候，話要叫一個正價小菜先可以叫呢個套餐，咁我就話你都無講，個經理就話宣傳單張有寫你唔睇的咩(D字體同信用卡條款差唔多大細)，之後我就真係火火地問佢，你去食飯會唔會成張單張睇啊，同如果你有講落單的時候我就落埋啦。之後睇反正價小菜一個清抄時菜都要$120，同佢理論左一陣之後佢話當豪比我地唔洗加，唔係錢的問題，真係覺得比佢屈。叫左一個$988套戲，加大隻蟹$298，二支啤酒，三罐汽水都成$16Xx埋單，呢個價真係唔洗去金苑，重點要去都唔好加$298，我隔離枱無加$298隻蟹差唔多一樣大細

最近行過旺角，接到金苑酒家宣傳單張，被亞拉斯加長腳蟹吸引，今晚（2/6/2020）約齊腳來食。點了一個$988亞拉斯加長腳蟹及有米脆皮皇子豬套餐，八人食，部長建議將蟹加多兩斤，加多$298。另再加多三個餸~飛天炒泰國通菜、羊肚菌浸娃娃菜及大地雪菜炆釀豆腐。亞拉斯加長腳蟹，蒸得剛好，很鮮味有米脆皮皇子豬，豬皮很脆，豬下面有炒飯，炒飯亦很可口飛天炒泰國通菜略嫌唔夠味、羊肚菌浸娃娃菜及大地雪菜炆釀豆腐都很好食，兩個湯底都好鮮味，但大地雪菜炆釀豆腐，湯搵唔到雪菜，只有白蘿蔔，釀肉亦無雪菜味，朋友們都覺得奇怪，因部長好忙，未有機會問過究竟。

之前爸爸曾買過一隻阿拉斯加長腳蟹回家令我一試難忘，但在外自購平均每斤大概三百元，一隻蟹便要將近二千元實在價值不斐。早前看到不少酒樓都有以特價長腳蟹作招徠的優惠，相比之下看似更加物有所值。金苑酒家位於旺角站D出口相當方便，環境方面相對殘舊所以衛生情況亦一般；除了長腳蟹之外另外需要以正價單點至少一款小菜，晚市茶芥每位$13，每兩位另收一份$10酸菜。阿拉斯加長腳蟹 ($1286)組合套餐原價$988，包括一隻約四斤的阿拉斯加長腳蟹，而我們則另加$298升級至約五至六斤，以清蒸方式烹調原汁原味，肉厚而且肉質結實尚算鮮美。有米脆皮皇子豬燒得香脆可口，油香豐腴，而底層更有加入蝦米和臘腸的炒飯，粒粒分明但比較油膩。菠蘿咕嚕肉 ($148)咕嚕肉外皮稍軟未算相當香脆，醬汁濃厚黏稠味道偏甜。蟹肉蟹籽燴伊麵 ($128)所謂蟹肉其實只是以大量蛋白及蟹柳絲濫竽充數，淡而無味而且伊麵質感亦過份軟腍。