賢記清湯牛腩

今日途經元朗，就去探訪其中一間出名食牛腩嘅名店，賢記牛腩。可能今日落雨，冇乜人等位，今日行過終於一試。 今日中午大約12:30 ，無需等位，可以直入。店內大約八成人。坐低叫咗佢招牌嘅爽腩河，價錢$70。 店內10分光猛，有卡位。 除咗牛腩之外，佢仲有牛雜牛筋之類，佢話最新係牛尾，不過今日未有嘗試。飲品方面有汽水凍檸茶之類。如果只叫牛腩，價錢188。大約等咗5分鐘，牛河送到。有一舊蘿蔔，牛腩大約七八嚿。 少少偏肥。牛肉算濃，10分淋身，冇牙都食得到。 味道中規中矩，如果路過，不用等位，可以一試。好味指數： 80分環境指數： 75分抵食指數： 75分服務指數： 75分…查看更多

通常每個月都會幫襯一至二次，但最近呢幾次開始感覺每況越下。係湯底方面：個湯底仍然維持到，牛味濃，清湯腩黎講真係唔錯，淨係計個湯係無得輸。牛腩方面：雖然湯底真係維持到，真係唔錯，但始終店家係賣點係新鮮清湯牛腩，除左係個湯要得之外，個牛腩亦都好重要。 反而新鮮牛腩黎講每況越下，部分牛腩非常煙韌，感覺好似食緊煲湯渣、隔夜牛或者冰鮮咁，比起以往黎講真係差好遠，牛味亦感覺比以往無咁濃，呢個價錢感覺越黎越唔值，希望店家可以正視，可以維持返初初開業的堅持。…查看更多

想試好耐，講到接近當年彪記質數，之前又早收鋪，下午行過幾次都排晒人龍......唉！今晚9點幾行過，見仲開緊，又唔駛排隊，入去試下咩料，落單時，叫咗筋腩河$70,佢都戴定頭盔，講咗牛腩麻麻地...首先試湯底已經嚟到唔夠熱，味道不過不失，試件牛腩，好過湯渣小小，只可以佩服佢刀功唔錯，冇切爛，仲見得人😆牛筋唔夠滑，極普通....總結，名不符實😵‍💫既然都明知出品質數麻麻，仍然要俾客人食，又何必做壞牌頭，親手摧毀自己品牌 ...可悲🥲…查看更多

賢記清湯腩｜全港最癲清湯脯！話說元朗大街後面條巷仔真係臥虎藏龍，呢間賢記門面似足舊式粉麵檔，入到去即刻比陣牛骨香勾咗魂！之前聽朋友講話佢哋朝早五點半開爐吊湯，用足料牛筒骨加數唔清幾多斤牛腩熬到湯色金黃，最癲係用騸牯牛，飲落喉嚨尾果油香真係其他清湯腩舖冇得比！飲完成個喉嚨暖笠笠仲有陣回甘，同某啲落重胡椒遮羶味嘅舖頭完全兩回事！叫左碗牛腩河，腩位分得夠晒刁鑽。崩沙腩肥膏位閃令令，咬落似食緊牛脂啫喱；坑腩連住筋膜位爽到啪啪聲，最正係啲肉淋身得嚟仲keep到絲絲纖維，浸完都唔會散！牛味濃到似食緊和牛刺身級數！重點嚟喇——嗰啲新鮮手帶牛成粒乒乓波咁大，同埋佢哋嗰個自家製嘅辣椒油真係不得了！成粒牛丸跟牛尾濃鬱得嚟係有層次呀,彈牙就唔使講啦,但牛肉牛腩牛丸食完你會有唔同牛嘅味道,你就知道人哋落咗啲功夫喺邊度！見到隔籬枱個熟客柯打「雙腩加底」，跟風叫多份牛爽腩，嘩！真係腩界天花板，半肥瘦位夾住層啫喱狀膠質，入口即刻化成陣牛油香，連平時唔食肥膏嘅女友都搶住夾。埋單兩個人食到捧住個肚都係$200有找，今次真係中咗清湯腩毒，食完第二日已經心思思想返轉頭！結論：由湯底鮮味到牛腩質感，呢間絕對係香港清湯腩嘅隱世天花板。某啲網紅店排長龍果啲，同賢記比真係差成條彌敦道。食勻全港十八區，敢講句——清湯腩王者，非賢記莫屬！（利申：食完即刻encore多碗外賣返屋企孝敬阿爸） #元朗真味 #清湯腩界MVP #食過返尋味系列…查看更多

今日去咗元朗搵地方住，周圍逛之下見到有間「賢記清湯腩」，立即令我諗起大埔已經結業嘅「群記清湯腩」，兩間相信應該必定冇關係，只係個名有啲似。就入去試吓，碌完個餐牌之後又冇食清湯腩，只係叫咗個淨牛雜加樽薏米水。我咁大個人都係第一次食清湯牛雜，牛雜有肺腸膀雙肚（可惜冇竹腸同粉腸冇粉），都做得好好夠冧、入味、乾淨，但係最驚訝嘅居然係佢碗湯，初初見個餐牌上面淨湯收 S20 覺得有啲過份，飲完覺得佢可以買 $30，非常美味，食咗一半之後加咗少少醋同埋辣椒油，個湯又變成另一種飲法。睇隔離左近啲食評話佢服務唔好，加上頭先親身嘅體驗，佢嘅服務唔講得上係唔好同中環九記係冇得比，餐廳位阿妹係好典型嘅千禧後新一代，心直口快串人唔使本嗰一種，但就唔係白鴿眼睇人唔起或者嫌你麻煩，因為食食吓有個明顯係生客又自稱唔識中文嘅講中文女人嚟買牛丸，又要咁又要咁之下，仍然繼續做生意，到我找數嘅時候問佢附近嘅環境，佢亦都笑笑口解答，但係三分鐘之前佢仲同廚房炒鑊勁 😁相信我會再返嚟試埋佢其他嘅產品，希望清湯腩、牛丸、豬肉丸唔會令我失望。…查看更多

牛腩河食評：失望至極最近我去咗一間話好出名的牛腩河餐廳，心裡充滿期待，想試下佢哋的招牌菜，點知最後真係失望至極。首先，牛腩根本唔好食。牛腩應該要軟嫩、好入味，但我食到的竟然硬得好似石頭，咬下去要用力，完全冇入口即化的感覺，真係咬到我想放棄。再講講河粉，應該滑溜溜、咬下去有彈性，但我食到的河粉卻黏黏地，好似唔新鮮，完全冇爽口感。而且湯底味道又平淡得無法形容，冇任何驚喜，真係好失望。總括來講，今次牛腩河之旅真係一場失望的經歷。希望下次可以搵到一間真係好食的牛腩河，唔好再有呢種失落感啦！都好少寫食評㗎啦，收我70蚊一碗，最後啲牛比晒隻狗食 真係失望到一個點。…查看更多

原本想叫坑腩伊瘦d，阿姐好有霸氣咁話乜腩都會有d，只可以盡量俾，坑腩一定肥，唔肥既就唔係坑腩，完美拒絕我所有既要求。最後碗麵一半係坑腩，坑腩味道幾好幾冧，但好肥，另一半係不知明牛腩，好柴又無牛味，趙到牙骹都攰，最後係個伊麵，要加$4，但完全唔好食，下次都係慳返$4叫返米粉好味d。本來俾個阿姐串左一野條氣好唔順，見佢收錢時都有返d禮貌，打個和。總體黎講呢個價錢性價比極低，最近仲要加左價，旺角既傳X好食得多。…查看更多

上網睇到賢記牛腩算係元朗區最好食嘅一間，所以今日就試吓叫咗外賣返屋企嚟食。叫咗一個正腩，份量算係幾多，但個人覺得一半比較靭，唔夠淋，湯底都有啲油, 但牛味都重。整體嚟講，都只係唔過唔失，冇預期中咁驚喜 😂。…查看更多

70蚊，食左碗大馬路35蚊連野飲質素既牛腩河，好多肥膏啊，得好少肉，分量也偏少。網上廣告聲稱是騸牯牛？！但牛味淡到差d食唔到。清湯底真係清，無咩香料味，有點甜味。蘿蔔有點生，係落左糖水煮既蘿蔔。1邊食, 1邊聽到打住如意算盤既老闆娘與下屬既對話，心諗呢個女人都幾HARSH🤣，1心只為要賺錢，洗人洗到盡。70蚊價錢，但食唔到70蚊既質素，可能去左蔥花芹菜調味料任加既成本到。 食了碗急攻近利，商業味道既牛腩河，不會再回頭。PS. 只有辣椒油味道不錯。推介指數：（0/5）…查看更多

有幾個網路名人都話呢間清湯腩好正， 入元朗必食， 作為牛腩控嘅我， 滿懷希望去， 真係希望越大失望越大， 啲崩沙腩又柴又硬， 從來未食過咁差嘅牛腩， 我仲好 naive 咁同阿姐 reconfirm 呢啲真係崩沙腩, 佢話係呀, 崩沙腩係咁瘦㗎, 大佬呀, 瘦唔係問題， 係又柴又硬呀， 第二啲舖頭崩沙腩都好tender， 呢度仲要主打食牛腩， 仲要$70 一碗, 我呢啲慕名而嚟嘅人, 一定永無回頭， 主打嘅食物品質都管唔好， 搵幾多網路名人賣廣告都冇用。…查看更多

難食到想問候佢祖宗十八代馳名係邊到啲牛腩鞋過鞋底一碗就收70憑咩行過路過唔洗入去試啲丸仲腥腥地你普通唔緊要最嬲係賣到咁貴真心難食唯一係個牛丸好少少可唔可以反省自己咩質素 對唔對得住個價錢…查看更多

自從元朗彪記結業後就一直好想食返佢既味道，所以一有新開既清湯腩都會去試下。而依間賢記都開左成年亦係我近排去食得多既清湯腩，當然就唔可以同彪記比啦，但味道係類似既😂😂我地叫左坑腩河同粉腸坑腩河，個湯底好清甜、有牛味，就算飲多幾啖湯都唔會頸渴。啲蘿蔔朔晒個湯底，好甜👍🏼坑腩就煮到好淋，唔鞋唔靭，好味道🥰但粉腸就煮得唔夠淋，搞到有啲靭。我牛丸上次試左，我就覺得麻麻地，就唔推薦啦😂😂😂😂…查看更多

早前有朋友介紹賢記清湯腩，今日中午係我哋第一次幫襯，我哋兩個人叫咗碗坑腩河、坑腩米、淨雲吞，坑腩夠淋，河粉夠滑，好味！頭先望返有個食評話佢個湯底重味精，我今日親身試過，我食完成碗坑腩河，仲飲埋啲湯都唔使飲水，亦無叫佢嘅支裝飲品（因為我有咳，唔想飲凍嘢），平時我食重味精嘅嘢，條脷就會拮拮哋，今次完全無呢個感覺。仲有，佢個辣椒油勁香，唔太辣，好好味呀。 不過雲吞嘅皮就偏厚，下次會再試埋其他嘢樓面員工服務態度好好舖面環境乾淨，我哋初時以為佢新開，後來樓面個ee 話佢哋已經開業一年多今日太心急想試啲嘢食，唔記得影相，下次先補影…查看更多

有機會来元朗住三個禮拜 計劃週圍去試美食 之前睇咗好多評論 試咗好幾間茶餐廳麵當 整體上都覺得唔錯 今晚嚟到賢記 睇評論好壞参半 所以已经降低自己的期望 因為有人推荐話佢啲爽腩唔錯 所以即管試下 今晚叫碗爽腩河 佢話冇河粉 所以改咗米粉 结果 非常差 离谱的差 真想打負分 碗嘢只有筋膜冇腩 又冇蘿蔔和生菜 湯好咸又有勁味精 之后口渴非常 $69碗 真係呃人 千奇唔好去 呢間嘢係我喺元朗吃得最差嘅一間 真係估唔到有人会做啲咁嘅嘢 覺得真冇良心 整壞元朗美食嘅名 …查看更多

元朗各店清湯腩回憶（冇興趣可以直接睇食評，不過元朗人睇完應該會有共鳴）元朗朋友仔應該對元朗清湯腩嘅歷史有d印象。元朗清湯腩始祖，亦都係我最中意，最難忘嘅彪記，細細個放學同老母去食個陣，格離嘅麻甩佬一定係一個人叫兩碗，一係邊/肥腩米+腩河，一係腩河+淨丸，個個都一定係連湯清哂，同埋就算幾爆場都好，食客同伙記（太子女）都好有默契，嚟到快快手食完交翻張枱，太子女亦會留意有冇客差唔多食完，就幫排緊隊嘅客落定單，預時間交比廚房，所以就算好多人幫襯都唔會等好奈，而呢種食店同食客嘅關係亦都好奈冇遇過。 其後彪記結業，重新裝修後竟然開咗間叫“標記”，傳聞係太子想攞嚟做，但老闆唔想搞壞招牌唔同意重開，所以就用新名開舖。當然真相就無從稽考，一段短時間就永久結業了。但我印象標記同彪記味道相似，而呢種味道同牛氣，賢記我形容係同一派。時間線唔太記得，當時傳麵世家殺出，又係主打新鮮清湯腩，所以我基本上冇住家飯食嘅話就係輪流幫襯佢地，想食炸野就去傳麵食腩米+炸雞翼，想食清d就翻老家標記。其後，元朗得翻傳麵做新鮮清湯腩嘅時候，情況就好似tvb冇咗亞視咁，基本上可以話係越做越x屎。為求公平，我會盡快食多次傳麵再寫食評，希望佢有做翻好啦，不過都9成唔會，因為我後期都隔年挑戰一次，每次都失望而回。元朗清湯腩末落幾年，直到牛氣衝天出現。記得第一次幫襯，入到舖頭立即聞到好濃郁嘅牛清湯香味，帶輕微嘅魚露味。碗爽腩河上到嚟，一定就先飲淡湯㗎啦，係彪記嘅味道。形容一下到底有乜咁特別。湯底第一啖入口會先係好濃嘅“肉香”，而唔係單單“骨香”，或者蘿白味。而因為肉味濃過骨味，令到淡湯飲落，唔會好肥膩同滯口，飲完淡湯鼻腔會回翻一陣淡淡魚露味，整體感覺就係“鮮”。同越南牛骨湯比，輕型清新一啲，冇藥材同蘿白嘅味道干擾，好純粹嘅牛香。腩就睇食咩位置，個人喜好爽＞邊＞肥＞普通腩，未食過嘅朋友可以想像下，爽腩係帶膠質嘅，有一片類似牛筋嘅東西，薄膜咁包裹住牛腩肉，食落表面就啫喱狀，帶點彈性嘅筋膜，咬入去就係軟霖嘅肉。雖然一碗麵60幾蚊有人會覺得貴，但我就覺得老闆好有誠意，湯頭質素高，牛腩份量亦比得好大方，作為一個食譚仔過橋米線都唔飽嘅人，牛氣係餵得飽我嘅。而有幫襯開牛氣嘅人都知，老闆係十分有原則嘅，當日唔夠新鮮腩就唔開門，廚房亦都係佢一人打理，所以外賣基本係1個半鐘等起跳，依家香港又有幾多咁有誠意嘅小店呢？不過雞蛋入面挑骨頭嘅話，我認為有一段時間，牛氣湯頭偏油，明顯見到好多油脂係表面，同埋由送生菜轉蘿白，我覺得令到整體感覺off foc 同heavy, 蘿白味濃會趕走口腔嘅牛肉味，相反生菜係吸盡湯汁，同時輕盈一啲。一般我食清湯腩都會成碗湯飲哂，但因為咁我就唔得啦。後尾雜誌嘅訪問，老闆都澄清係同彪記冇關係嘅。我亦都經歷咗佢由鳳琴街地舖，搬到橫洲工業村專做外賣，再到水車館街（牛氣擎天）重開，再結業，再到賢記出現，真係百感交集。食評第一次食賢記係響舊舖，上手1523西餐嘅位置，入到去有啲驚訝，因為無論餐牌，定價，餐具設計都同牛氣非常相似，而味道亦都係同我上面描述嘅差唔多。唔同嘅係，牛氣辣椒油同彪記相似，蝦乾味道做膽，而賢記辣椒油係好重蒜頭味嘅。前者海味香會提鮮，後者好容易蓋過牛香味。第一次食可能都帶住啲偏見，有比較有傷害，同樣叫邊腩，食落會起渣嘅。 今次係第二次再食，想睇下佢會唔會好似傳麵咁轉用雪貨，都欣賞目前仲堅持緊用新鮮腩。當晚比較夜幫襯，同埋伙記話依家冇得揀部位，咁廚師發辦就更好啦，可以睇清楚餐廳出品水準如何。嚟到靚女話係牛面珠燈嚟，質地偏嫰，都唔錯㗎。如果答到一啲筋膜位嘅話，整碗麵嘅口感就會豐富啲。再讚多點就係賢記同牛氣用嘅河粉質素都相當唔錯，食落唔會碎濕濕，仲帶輕微咬口。…查看更多