貴香園

營業中

休息中

是日平日，臨近新年，行完花虛，非常肚餓，好想食碗熱騰騰嘅米線🍜。六點到達已經坐滿人，不過好快有位。🍜雲南酸辣小鍋米線+炸魚蛋（小小辣）炸魚蛋一般般，湯底酸酸微微加小小辣食慾大增，有好多配菜，好大碗。🍜雲南酸辣小鍋米線+牛肚（中小辣）牛肚砌得比較細條，入味並且腍。🍜雲南酸辣小鍋米線+豬大腸（中小辣）豬大腸不過不失。🍜椒鹽腐皮角(魚肉)好好味，椒鹽味好出，新鮮炸出嚟外脆內魚肉香，浸湯食都好好味。🍜酸辣雞腳開胃之選，酸度比起泰式較酸，配菜有芹菜、紅葱頭，雞腳大隻但都入味。小鍋米線份量好大碗，唔使加餸都好夠食，好滿足。

旺角雖然有大把美食，但今次簡簡單單只想食個米線，避開連鎖店，揀咗位於先達附近嘅貴香園試試佢！🌼 貴香園紅薯粉 (小辣/配一餸&凍檸茶) ($50)上菜十分快，唔洗十分鐘米線已經上枱👍🏼上枱嗰陣內心哇咗一下，大大碗熱辣辣，配菜豐富，份量比坊間米線店要多💯-紅薯粉煙韌唔會煮到淋爛，亦夠粗身-配餸揀咗豬潤，份量十分大方，粗略用筷子夾一夾，豬潤都有十幾塊，仲要大大塊，冇腥味亦都已經煮熟無血色🫶🏻🫶🏻🫶🏻-酸辣湯底偏甜，小辣辣度十分適中，湯底香濃。食得辣嘅朋友不妨可叫中辣-凍檸茶大大杯，配米線超滿足

頂呱呱嘅米線，一試難忘！🍜 喺貴香園，今次點咗一碗經典炸醬米線，加咗啲瘦腩肉同魚皮餃，簡直係招牌煮法！米線充滿彈牙嘅口感，濕潤親和，炸醬濃郁得嚟唔會過於油膩，蛋蛋㗎！芽菜同酸菜帶來嘅清新感，一啖嘆出「咋喱」嘅感覺，解油解膩。嗰把腩肉瘦而不柴，肥而不膩，魚皮餃嘅滑潤爽口，好比一場味蕾嘅饗宴！金菇同埋豬軟骨嘅搭檔，辣而不燥，酸香四溢，紅薯粉食落又滑又煙韌，撈勻辣汁，真係想喊出嚟「正喎」！每一啖都惹味得滯，完美平衡唔同嘅香、酸、辣。一邊食一邊諗，點解之前無發現過咁好食嘅地方？😋總結下嚟，貴香園真係一間何止OK，簡直好到「爆燈」嘅地方。食得好不過就係服務同環境兩三事，不過老實講，咁古道熱腸嘅味道，我寧願忽略啲小瑕疵。食物嘟噠，心情都跟住正！下次仲會再嚟，重溫哩份平民美食嘅滿足感！👍🎉

今日心血來潮想食酸辣粉，之前都食過幾次呢間覺得唔錯，所以特登搭車出黎食。落左order之後大概等左7-10分鐘，一上左碗薯粉我就滿心歡喜即刻夾黎食，點知我一夾一拉，條粉已經斷左…試左幾條都係咁，已經深感不妙，但係一日未擺落口都未知係點，一咬落去，d牙都未咬曬條粉，佢已經斷左…個口感仲腍過食到最後一啖雲_香正常軟硬度嘅薯粉仲衰過噹噹烏冬煮耐左嘅口感我懷疑人生咁樣食多兩啖，真係忍唔住問個staff，佢地d薯粉係咪本身就係咁腍，個姐姐就答我「係呀」我好震驚咁問多次「腍到一夾就斷係正常嘅？」佢都係答我「係呀」我簡直難以置信，又再問「紅薯粉咁腍真係正常？」佢都係答我「係呀」可能佢見我個樣太過震驚，佢都好好人咁話幫我換過碗🥲🥲於是等多7-8分鐘之後佢又比過碗黎我一夾…都係一夾起身就斷我聽到個姐姐同廚房講話要爽d個陣我仲以為有得救😟點知黎到都係一樣咁爛咁腍望真d薯粉唔似平時食開正常煙韌個種透透地白白地，而係中間混濁嘅顏色，應該煮左非常之耐或者浸左好耐湯。正常黎講薯粉好襟煮，容錯率好高😵‍💫到個下我已經唔想食碗嘢，真係希望越大失望越大。本住唔好浪費食物嘅原則我食左d餸同配料就算😟😟諗極都唔明點解d薯粉

自己一個人去旺角唔知食乜好，我通常都會搵間米線舖自己搞掂，貴香園都係長期Keep住好多人，等咗一陣先有位～酸辣米線就好多人食🍲但我鍾意食撈麵多啲，叫咗個熱伴紅薯粉，一碗$31，已經有炸醬、酸菜、芫茜同花生，價錢好親民～餸料自選，由$7/$8/$9/$13/$15都有，落單呀姐非常推介豬軟骨同辣嘅瘦腩肉🐷話係最多人叫，其實豬頸肉都係我最愛，今次最食豬軟骨同雞絲啦！雞絲一啲都唔係絲，係雞件，好滑唔嚡，豬軟骨有用滷水醃過，入口第一啖已經好濃味，中間軟骨位置好腍唔使用力咬，正！薯粉軟腍，撈完啲炸醬真係好好食，最後一啖不淨。叫埋杯凍檸蜜飲，2餸1粉1嘢飲埋單$60，爽皮。呢度嘅缺點就係難搵位，同埋只收現金，小食太多好難揀，下次嚟會食埋佢炸雞翼先！貴香園地址：旺角西洋菜街216號地舖（係間教會對面）

試過唔同嘅米線舖頭，貴香園嘅湯底同埋餸算係幾好食湯底：推薦試酸麻辣湯底，佢嘅酸同辣嘅比例平均，唔會互相搶咗大家嘅味，幾惹味！小辣就啱晒譚仔食開10小辣／5小辣嘅朋友仔。餸：推薦雞肉、豬頸肉、蘿蔔、紫菜。佢哋嘅雞肉唔係用好鞋嘅雞絲，而係用嫩滑有啲肉地嘅雞絲，非常有咬口。豬頸肉亦燒得好好，夠彈牙份量亦足夠。而蘿蔔亦夠腍夠入味。紫菜比嘅份量亦好多，差唔多會比半隻碗嘅份量。總括而言，貴香園好味又抵食！中意食米線嘅朋友必去！

下午茶時間➕3蚊有杯嘢飲 凍奶茶好甜 怕糖星人記得走甜 加咗豬皮同雞翼尖 豬皮膠感重 唔太ok 湯底係好味嘅 不過太酸了 有點破壞湯底本身嘅味道 兩餸小鍋米線加嘢飲盛惠50 都幾抵食 會再幫襯

成日聽朋友去食呢間米線, 終於搵日一齊去試下朋友既飯堂🤪舖頭雖然唔太大間, 台與台之間空間比較細, 所以都坐到唔少客人。雲南小鍋酸辣米線 $48配料叫左韭菜餃🥟同蘿蔔, 韭菜餃正常水準似屋企自己包既味道。而蘿蔔清甜冇根, 似同冬菇一齊炆煮, 有少少菇味, 份量都有4大件🙀碗米線本身都有配到炸醬芽菜腐皮酸菜韭菜, 都係小鍋米線既基本配搭。而湯底酸味較特出, 亦好香濃👍🏼沙爹米線 $54配料叫左豬軟骨同腩肉🍖豬軟骨炆得好淋, 味道同出面食到既味道差唔多。腩肉有少少乾身, 但味道唔錯, 可能揀左沙爹湯底, 有少少俾湯底搶左個味😲碗米線本身都有配肉碎, 令到沙爹湯底更加濃郁。

鍾意食米線嘅我今次又黎到旺角試米線啦！😆夜晚九點半左右來到，依然好多人食緊😯🍜雲南酸辣米線 $41 🌕🌕🌕🌗🌑特登嗌左個menu有手指公👍🏼嘅米線😛另外加左豬大腸。湯底未算太出色，不過都係合格之上嘅水準。豬大腸就幾淋，唔苦，但就唔太入味。🍜酸麻辣紅薯粉 $60 🌕🌕🌕🌕🌑呢碗加左金菇、粟米餃同五花白肉。呢個酸麻辣湯底較啱我口味，好惹味，食到花椒味，而且個湯帶啲甜😍😍啲餸就正常發揮，不太特別。總括黎講，餸嘅味道一般，但湯底都唔錯，係旺角鬧市中快靚正嘅好選擇😆

之前一直都係食開譚仔 因為啱我口味但唔知係食多左定係依家差佐覺得冇以前咁好味 可能都厭佐掛哈哈哈然後見到有人介紹呢間話幾好 就黎試試真係好味噢！湯底更麻一d 好過癮啊啊酸辣湯底都相當OK 本身仲想飲距噶凍豆漿可惜去得太晏話賣曬 下次得閒一定要再黎過！🐷📍：贵香园

黎旺角我最愛食既米線店之一《貴香園 》🍜豬軟骨金菇酸辣紅薯粉 $53配料方面都好足，有芽菜、韭菜、肉碎豬軟骨係招牌必叫。雖然唔算好腍但味道好惹味 有咬口紅薯粉粗身好煙韌 湯底夠熱食到酸辣均勻 唔會有種花椒麻味唔洗食到標眼水🤭鹵水豬大腸$35豬腸夠晒大舊 鹵得入味爽口仲有芽菜墊底 好夾個汁缺點：呢到坐得迫啲 服務質素麻麻不過食物質素一直都保持到 大大份包你食到飽 仲有涼皮都幾好食的 推薦🙌🏻📍 貴香園旺角西洋菜街216號地下旺角通菜街99號地舖

等成超過半個鐘先有得食，等廿分鐘後第一次催話來緊，ok，再等差唔多十分鐘第二次催先同我哋講個爐壞咗，其他幾枱客又係等到係咁催，其中兩枱客都走咗，有啲遲過我哋入嚟既都已經食完埋單走咗！幾個呀姐服務態都差都算，服務參差，我哋幾枱客都等咁耐！味道又冇乜特別，好一般！食過咁多間米線，呢間真係唔會有下次！

粟米餃雞絲豬潤芽菜麻酸辣米線（中辣）$68滷水豬肚絲 $35貪心的小公主叫了四餸每款餸的份量居然也好多我以為餃子應該只有兩粒居然有三粒耶！開心哈哈餃子皮偏厚但粟米不算很清甜至於雞絲比較像嫩雞柳不是時興的雪花雞絲應該是雞腿肉吧總之也挺嫩滑份量挺多挺划算耶👍🏻至於豬膶反映出師傅的刀工也頗為了得豬膶薄切質感偏粉芽菜份量巨足好像吃了一斤芽菜～（說笑哈哈）而湯底麻酸辣比酸辣出色但小公主認為麻味可以更多花椒油可以再下得重手一點雖然同時間酸味會降低～可能小公主本身偏好麻辣多於酸辣😝而另一碗的酸辣湯底湯面上的油比較多酸味也不算很突出小食滷水豬肚絲應該算不上是絲切得頗大塊但滷水汁入味、豬肚絲軟冧易咬好味好味！推介指數：8/10

發現旺角都幾多唔同嘅米線店，呢間就第一次試，當日係平日晚市唔算太多人，好快就有位。上菜速度呢都幾快酸辣雞！平靚正～招牌麻酸辣雞絲腸仔米線$46湯底我揀左麻酸辣嘅（小辣），麻味唔夠，辣味都冇，有酸味，但整體味道係ok。雞絲肉質都好嫩，有雞味，腸仔煎香另上，仲有兩條，米線嘅口感係比較軟冧。配料方面都好足，夠哂多，有芽菜、蔥花、肉醉等等，增加左口感嘅層次感，整碗米線食起來非常滿足～酸辣腩肉金針菇米線$46呢碗米線揀左酸辣（小小辣），同麻酸辣湯底係差唔多，只係酸味再濃d，同冇麻辣，非常開胃。腩肉嘅肉質非常軟嫩，因為舊肉幾肥下，但味道方面都幾惹味。同樣地配料都好多，成碗麵食完都好飽，兩碗麵比較，個人更喜歡酸辣湯底，因為湯底夠酸又夠濃，好食！

收工黎呢度食，啲米線都幾大碗，食物質素ok，麻辣食落真係會食到口麻麻地既，但唔辣，如果下次再黎可能要大辣。另外叫左滷水牛肚，味道唔錯。問題係佢地啲位真係好窄知你地生意難做，滿座都可能蝕錢，啲人叫個米線叫碟小食加杯飲品可能坐成日。但唔係因為咁而要加多2張枱賺得咁盡掛？？枱同枱中間窄到岩岩一個手掌位（有圖），行去入面位，除左要則身，仲要慢慢行，大脾位肥啲真係會夾住行唔到囉。先頭食嗰陣，隔離枱埋單，另外2個男仔坐呢張，行入去嗰陣，成個屎忽對住我張枱，仲要行到一半停左落黎，拎部電話出黎，幾驚個男仔諗住放埋個屁先坐低呀😱😱😱佢地又食完先過我，個男仔行出黎，又係屁股對住我地，又係企喺度一陣，真係驚囉。。如果佢掉轉行，又條j位對住我地，我諗真係食唔落。