萬發海鮮菜館

營業中

休息中

嚟到萬發一定要嗌嘅一定係黑椒薯仔牛柳粒 薯仔炸到脆脆地加上肉質好淋嘅牛柳粒 真係冇得輸 係食咗好多次都唔厭嘅餸第2個要講嘅係個鐵板上嘅原隻豬手 味道係鹹啲但送飯係好掂 不過佢就係原隻豬手上 切開佢都要啲時間同力氣 懶人就未必岩喇😂 另外個芝士什菌 芝士味都重嘅不過個芝士係比較稀嘅 唔算好濟 不過都要多啲人先食得晒。啫啫雞煲不過不失啦 有豬潤係入面。 較遜色係個蒸鱔 豉汁唔夠香 而且缺少咗份鮮味。整體嚟講 係一間值得再嚟嘅餐廳 雖然同行朋友話炒小菜嚟講係有啲貴 但個人認為有咁嘅質素都值得再嚟食嘅8

一直都有幫襯開萬發食小菜，呢間鋪頭已經開咗一段時間，今日終於有機會試吓。呢間鋪頭唔太近地鐵站，由深水埗站行去要大概8分鐘，唔熟深水埗嘅朋友我建議行長沙灣道再轉入黃竹街會比較容易搵。店內環境比一般深水埗小菜館舒適，亦冇咁嘈。我哋四個人叫咗四個餸。入咗單唔夠2分鐘就出咗碟豉椒炒花甲，味道同份量都可以接受，但唔算太突出。跟住嚟半隻霸王蔥油雞，雞肉嫩滑，砂薑醬一流。這味餸比較滿意。跟住上啫啫生菜，石鍋非常夠熱，上枱仲滾左5分鐘。但隔一陣發覺好多油，所以奉勸大家要盡快夾在碟上唔好留在砂鍋度。最後到係砂鍋焗魚頭魚頭入味，夠香。但係鍋裏面有好多豆腐同火腩，魚頭嘅份量較少，美中不足。有機會你再試吓佢其他招牌菜。買單四百幾蚊算係經濟實惠。

南乳骨，非常乾身，又無汁，口感有點兒硬，所以呢個之後我唔會再叫。蒜容蟶子，呢個蟶子好多蒜好多蔥，撈埋飯食非常一流，肉方面都算滑身，口感好爽口。腐乳通菜，我唔食腐乳，不過朋友叫到食啦，原來呢個炒完都唔多覺有好多陣味，反而味道都幾岩我，最後都食左唔少。黃金鮮魷，呢個略嫌唔夠黃金，鹹蛋黏唔住個鮮魷，變左單食魷魚既話，口感就會差D，不過手動將蛋黃撈埋一齊就好食好多，呢個係我平時都會叫既一款餸。薯仔牛柳粒，呢個就必叫同埋最好食既野，個薯仔係十級好食，外脆內軟，份量好多，其實主要係食個薯仔，牛柳粒係其次，不過牛柳粒方面就唔算太韌，不過不失。薯仔完全遮住牛柳粒既缺點。

我同呀哥既生日係同一日，所以生日飯永遠係一次過慶祝，今年生日飯我地選擇左呢間萬發，好可惜大家食完之後，一致認為唔會再有下次⋯⋯今餐五大一小，每人點一菜式，總共點左六菜一湯*薑蔥桶蠔*薑蔥魚卜*炸豬大腸*黃金蝦*風沙雞*蒜蓉白菜仔*老黃瓜鴨腿湯（例水）*汽水4罐*埋單剛好一仟元成餐飯最好食既餸係薑蔥桶蠔同埋薑蔥魚卜，其他都強差人意，炸豬大腸就炸到乾淨淨，黃金蝦直頭無味，風沙雞【鞋烚烚】，白菜仔就普普通通，同家人出街食咁多次，第一次剩低太多餸，真心唔明有乜咁好食？定係出名既唔係呢間萬發，係我地去錯地方？

薯仔牛肉粒：薯仔炸得十分香脆，又不會太乾，外面是甜甜的焦糖，非常惹味。牛肉粒非常嫩，但又不會有常在外面吃到被梳打粉醃過的不自然質感，十分香口惹味，讓人不知不覺地吃完一整碟，又不會有膩口感覺，實乃必食推介！如果有胃口的話，不妨多配碗白飯。炸子雞：炸得十分酥香脆口，雞肉沒有雪味，而且頗為肥美，絕不戲場！乍聽店名，以為會是十分地道、龍蛇混雜的大排檔，沒想到店內的座位蠻寬躺，在星期五的繁忙時段，兩個人還可以坐四人枱，更不用搭枱，十分難得。

相信好多人都食過萬發，佢有三間分店，我都一一去過！其實間間都差不多，不過福華街呢間應該係最大既一間！今日係與一班朋友慶祝本人牛一，我地一行13人，餐廳安排我地去另一邊廂，新裝修，感覺好像還未　ready, 有油漆味道再加上廁所一筒筒泥甘！不過亦因為坐另一邊廂，感覺又有點　privacy!由於人數眾多，落單姐姐提議我們要加大碟餸既份量，價錢雙倍！原本我反對，情願揀多幾款，但姐姐話如果吾加大，有Ｄ菜不能平分，所以就叫佢揸主意！意想不到既係，全部11碟餸，十分鐘內上哂枱，連位都不夠，好明顯係煮好再返熱！啫啫通菜真係吾係間間都做到，我愛重口味，覺得這個很淡口！魷魚鬚都很脆口萬發薯仔牛柳粒一向出名，薯仔很入味，連我不愛吃薯仔都停不了口！勝瓜都算多蒜！除了薯仔牛柳粒，呢個鱔都必定要推介，非常入味！呢碟豆腐好誇張，成座山甘，脆口但略淡，埋單時發現，佢地將豆腐x 3份，我當然反對，老闆話事實比左3倍，我話我地一直只講雙倍，最後老闆不情願下，都減返比我地！

普通蝦都要28蚊両，一碟蒜蓉開邊蒸蝦多謝672，另外個蟹伊面細細碟都4百幾，伊面底話要加50喎(睇番張單問番先知)，下次食海鮮前要問清楚價錢，其他小菜味道還可以

逢年過節都會去酒樓食飯，來來去去果D餐，實在有些厭。今次確定去朋友介紹呢間試⬇️。由於是母親節，訂檯分兩個時段6點與8點，我哋揀左6點，去到已經坐滿曬人了。叫左餸後10分鐘陸續上菜，值得一讚。一圍人唔使個半鐘已經食飽飽，漏左個魚香茄子煲冇上，取消左，應該係漏單。節假日，人多，坐得比較逼，餐廳人手明顯唔夠，想要兩隻碗仔，隻手舉左10分鐘冇人理。今次叫左西檸雞（夠脆，夠味，唔會成口油）西湖牛肉羹（足料，夠滑，推薦，10人份量啱啱好）薯仔牛肉粒（牛肉嫩冇渣表面有蜜糖，薯仔好好食，大家爭住食）骨髓（最最好食，骨髓辣辣哋，一啖一條仔）椒鹽骨（肉嫩，略嫌大塊）菠蘿咕嚕肉（大碟，肉質啱啱好，唔多肥膏，冇骨）薑蔥魚鏢（好抵食，好大煲，比得上其他餐廳一倍咁多，火候唔夠，咬唔到）牛仔骨（夠味，但有兩塊厚身嘅未煮熟）乳鴿（係唯一未食完嘅餸，乳鴿好大隻，但有好多大大條嘅毛未處理乾淨，幾乎每塊斬件都有，睇落冇咩胃口食）總體來講是值得再去嘅，下次可以試下其他菜式，唔係節日去，相信廚師可以發揮得更好。

天氣忽然轉冷，撞岩約左fd 食飯，就一品雞煲啦 🤤上左巴士出旺角，點知個fd 忽然轉軚想食小菜，仲要食深水埗既萬發海鮮菜館😑，咁就唯有硬生生轉彎過深水埗啦。根據OP 資料，地鐵站B1出口步行6分鐘，但我前後足足用左13分鐘先行到，莫非我--隻腳真係咁短？！😰😰廢話少講，入到去搵個卡位坐低，位置都幾闊落，係個冷氣勁左d.打開餐牌，有超多選擇，睇相好似都相當吾錯，開埋OP, 見到勁推薯仔牛柳粒，咁梗係要試啦。因為仲未齊人，我地就先叫薯仔牛柳粒，蒜蓉通菜同椒鹽九肚魚。等齊腳再點其他。時間夾得岩岩好，上菜時已齊人，每碟都比想像中大碟，仲熱辣辣薯仔牛柳粒，真係難怪OP 咁多人讚。牛柳粒size 吾算細粒，但好腍好易咬，味道仲甜甜地。另外薯仔都好腍好入味。蒜蓉通菜，大大碟，而家係食通菜既時候，所以菜好嫩口，唯一缺點係味道偏咸。椒鹽九肚魚，都係大大碟好香口，一上枱即刻夾黎食，仲吾小心辣到嘴tim...最後由於3碟餸都大大碟，加上食左好多薯仔，就食吾到其他餸lu...下次一定要再黎試風沙雞

深水埗有好幾間萬發不知道是否同一個老板這間位置很方便 就在黃金的斜對面我們四人總共叫了四道小菜和人頭飯金牌風沙雞 半份聽說是招牌菜之一第一次聽風沙雞很好吃 上面很多炸蒜雞有點像炸子雞很快被搶吃一空薯仔牛柳粒另一道招牌菜非常好吃 有丁點兒辣味薯仔很脆口椒鹽鮮魷出面很多都是細細條這間很大條這個菜忘了名字石窩菜都是招牌菜熱騰騰 有些類似魚香的東西 又有些菇片之類的味道不錯喔

今日同同學一早放學，同學介紹有一間好出名嘅大排檔。話嗰度嘅嘢食大大碟，所以我哋就有七個人一齊去食果然所有嘅嘢食都係超大碟，我哋叫咗五碟餸加三碗白飯魚香茄子煲，係非常之適合撈飯食。因為佢好多汁同埋肉碎。佢一擺上黎已經好香，同埋茄子非常林，所以唔會話好硬椒鹽鮮魷，佢仲會附上汁。佢係即炸，所以好脆口。唔會話一擺上來就好軟身京都骨，呢個就同出邊嘅京都骨差唔多。佢冇話特別好食但係又唔係特別難食。只係得好大件，所以好難咬呢個乳鴿都係一般般，又唔係話太好食又唔係話太難食。過得去，不過如果問我會唔會再點多次，就應該唔會。會想叫下其他因為呢個錄左片，唔記得左影相。所以就Cap 番出嚟, 呢個真係強烈推介。因為佢會攞蜜糖炸薯仔所以佢係會燙口開始。佢反而係薯仔先係重點而牛柳粒都好食嘅。佢薯仔係我哋同學不停咁喺度搶來食

每月生日飯嚟嚟去去都係嗰幾間，適逄今個月唐細佬生日佢提議去萬發，因為佢平時同欖球隊員嚟食開，我地當然唔會反對啦！由於我遲收工，佢地已經㨂好菜式，我一坐低佢地就落單，上菜速度好快。。。而且我地全部轉中size,招牌加大。。。竟然食剩打包！切埋蛋糕吹吓水，咁就一晚喇！

因為六點就入座，所以唔使等位就食得。薯仔黑椒牛柳粒：薯仔粒外脆內軟，外層甜甜哋，幾好食。牛柳粒數量都幾多，不錯。幾乎枱枱都叫，必試 ！椒鹽鮮魷：正常質素，不過不失。略嫌無乜椒鹽味，好彩有碟醋補返吓。兩個人叫咗兩碟小菜加一碗白飯，每碟份量都好多，應該三個人食都夠。

成日都會無啦啦想食生餣螄蚶，見到有即係叫，味道雖然入味，但比較細粒，而且好多都仲有泥沙响入面，有幾隻仲黑的小炒王係此行目的，鑊氣夠，唔油膩，味道好，少少辣仲有菜脯萬發一品煲，原來入面係海參，花膠，豬皮，鴨掌，冬菇等。有幾件未浸透就攞咗去煮，仍唔係真係靚嘅海味，但價位同大體上，炆得入味好吃，比較起來鴨掌比較出色朋友另外推介石鍋飯，粒粒分明，炒得香口，調味亦出色，熱辣辣食入口一份溫暖，鍋邊仲有脆脆飯焦

深水埗的小菜館有很多，間中都會相約三五知己食小菜啤啤去。第1次去呢度食小菜，事關朋友極力推薦呢度既黑椒牛仔粒。佢最特別之處係用來炒牛仔粒既薯仔是十分脆口，他果然沒有介紹錯！與其他同樣有名的小菜館相比，的確係較惹味！除了牛仔粒，不可不提的是豉汁蒸鱔及大大煲羊腩煲！價錢上，羊腩煲並不便宜3百多元，但很足料，冬菇支竹馬蹄很入味羊腩很多，我們4個人吃不完。還有我最愛的豉汁蒸鱔沒想到這里的鱔是如此爽口，份量合理！原來他們在餐廳有自己的魚缸，即叫即捉即煮，很鮮味！我們還點了飛天通菜及豉椒炒蜆水準正常。對於經常在深水埗吃小菜館的我來說，暫時是最好吃的