影片
以上資料只供參考, 請與餐廳確認詳情
幾個死佬卒之等到有場衛生波踢吓，地點晌保安道球場，出咗身汗真喺爽晒。本來打算出番青山道搵食，不過，一出番保安道大街燈口位就見到呢間「荷里活冰室」，既然大家都踢到攰攰哋，當然就腳食呢間，費事再行。問咗收10:00pm，即喺有大半個鐘食，茶記而言，夠晒時間啦，不過，9:45pm就已經催埋單。由於嚟得晚，依家啲人都少出夜街，所以，睇到個場都無乜客咁滯。茶記勝在乜都有，但今次餐牌就無乜閒情點影，只喺影番我哋有揀嘅出嚟。加上今次搵手機影，影得隨意，所以，啲相嘅質素喺差啲。老薑酒香豬潤米 $55感覺喺就收工咁款，出餐都有啲hea，火腿奄列似就咁打完蛋漿加啲火腿炒兩嘢，只可以講喺火腿炒蛋，亦睇樣都知煎到老晒。而碗豬潤米向上睇以為隻碗好大，其實底下好窄身，不過，始終碗口闊，米粉份量都多嘅，湯頭有啲酒香，但老友話豬潤唔算好嫩。乾炒牛河 $60另外位老死叫乾牛河，諗住喺茶記嘅穩膽之選，的確比預期炒得好食，一來啲河粉上色均勻，二來啲牛肉幾腍滑，加上唔喺好油，老友讚炒得有一手。滑蛋蝦球飯 $60小弟就揀咗碟蝦球飯，不過，唔知點解等咗好耐先有，差不多大家都食晒我碟先嚟，仲有「滑蛋」部份完全唔喺我期望嗰種以蛋漿炒出嚟嘅滑蛋，依家呢一種喺茨汁底勾啲蛋花，還好嘅喺啲蝦球鮮甜彈牙，大大粒好食。熱奶茶揀晚市特價炒粉麵除包餐飲，仲奉送例湯，不過，其實唔喺好飲得出喺咩湯，因為成碗湯都無咩渣撈到出嚟。至於杯奶茶，個人就覺得唔錯，色澤沉實，茶底醇厚。綜合而言，啲出品無話好好，亦無話好差，正正常常OK咁啦，不過，可能就收工，部份侍應招呼就一般般，亦唔明點解廚房出菜要等成廿幾分鐘，仲諗住就收工會快啲添。
繼續閱讀
最近去咗荷里活冰室，試咗佢哋嘅招牌咖哩雞飯，感覺幾驚喜。飯同咖哩分開上，賣相已經夠吸引。咖哩味道香濃帶椰香，好有層次感😍今次叫嘅咖哩醬夠香又夠辣，薯仔同雞炆得好入味，雞肉質滑唔柴，薯仔亦軟硬適中🤤。仲有香噴噴嘅白飯，用嚟沾咖哩一流，完全吸收晒醬汁，食落超滿足。份量十足，一個人食都頂得住。價錢大概六十幾蚊，性價比幾高。店內位置寬敞，裝修帶少少懷舊冰室feel，燈光柔和，坐得舒服。侍應態度親切，上菜速度快，無等太耐就到。總括而言，荷里活冰室嘅咖哩雞飯值得一試，想搵番班港式咖哩滋味，呢度絕對唔會失望👍
繼續閱讀