芋見好圓

今日同朋友一次過試晒三款台式甜品，賣相吸引，真係選擇困難！最前面嗰碗奶茶底最得我心，茶味香濃順滑，配埋煙韌嘅芋圓、地瓜圓同滑嘟嘟嘅仙草，口感層次超豐富。後面另一碗糖水底就比較清爽，甜度啱啱好，更能食得出各種配料嘅原味道。而最多料嗰碗，除咗芋圓，仲有珍珠、紅豆，啖啖都係滿足感，口感夠晒豐富。三款各有千秋，無論你鍾意濃郁奶香定係清甜滋潤，都總有一款啱你心水，芋圓控絕對唔可以錯過！…查看更多

總結： 巨無霸芋圓份量十足，配料豐富，對我黎講甜度太高，但以價錢計算，性價比仍算不錯。環境及服務屬一般水準，螞蟻人可以一試。叫左嘅食物有：巨無霸芋圓二號（HK$48）- 配料組合： 包括芋頭、紅豆、波霸等經典台式甜品元素，糖水底揀左黑糖冰- 口感： 芋圓正常，波霸，紅豆綿密，整體口感豐富；但糖水太甜，食落好容易膩。- 份量： 屬於「巨無霸」系列，碗身大，配料多，足夠兩人分享，抵食之選。環境： 坐位大小一般，空間感不算充裕，裝潢簡約，適合短暫歇腳。服務： 店員態度正常，點餐流程順暢，無特別驚喜亦無失禮。價錢： HK$48; 無加一; 人均 HK$24進食時段： 下午茶時間評分： 6.6/10詳細評分解釋： 綜合食物（味道與賣相）、環境（氣氛、空間、衛生）、服務、性價比四方面作整體評估。比分偏重食物與飲品部分。- 1‐5分： 不推薦- 5‐6.9分： 普通，低機會回訪- 7‐8分： 都可以，會考慮回訪- 8.1‐9分： 相當不錯，大機會回訪- 9.1‐10： 各方面都好好，一定會回訪…查看更多

今日嚟到奧海城揾食， 揀咗一間甜品店芋見好圓，裏面除咗有甜品食之外，都有其他台灣小食飯面，我就揀咗個仙草2號， 裏面有芋圓紅豆珍珠， 糖水底可以自由選擇， 黑糖鮮奶／桂花茉莉綠茶／ 錫蘭奶茶／紅豆湯／ 黑糖薑母茶／ 黑糖桂圓紅棗茶，我揀咗 黑糖鮮奶 ，比較甜份量都幾大碗算足料，仙草帶有少少苦味，質感有啲似涼粉😅， 座位唔會好擠迫 環境舒服。…查看更多

話說行到攰 諗住搵間野坐低食小小野就揀左呢間野我企住在cashier度 2個店員傾住計唔過黎落單到過到黎落單時就西口西面擺野食落枱前我指住張枱話污糟叫佢抹佢扮聽唔到 成盤野照擺落黎然後走左去🙄地下又污糟 有野食跌左都唔清潔下食食下 有人想order d職員走哂入去 果個人好大聲叫左2聲唔該都冇人出黎應機千祈唔好去呢間！…查看更多

從未食過咁難食嘅燒仙草，成pat嘢咁。話就話係熱，嚟到碗嘢好似龜苓膏咁，要用匙羹撩開後先見到啲料。仙草同芋圓都係室溫，芋頭仲要係凍。中伏！見到都唔開胃🤮唔會再嚟！…查看更多

員工嬉皮笑臉，同隔籬鋪啲員工喺度玩唔做生意，成班去哂後面廚房唔出嚟。一杯嘢飲落單落咗成分鐘，好似聽唔到人講嘢咁。叫微糖就出超甜，飲兩啖頂唔順車咗落垃圾桶。奶茶底完全無茶味無奶味，飲咗幾啖個甜味係個口輪迴，完全唔散。一開始就咁睇個色都知中伏，推薦嘅烏龍奶茶係純白色，完全無茶色。仙草都奇奇怪怪，似啫喱多過仙草。賣點嘅芋圓好淋，一啲咬口都無。成杯嘢真係搵唔到有咩可以讚吓，見到其他枱都係碗嘢食咗幾啖就走咗。…查看更多

Weekend食完晚飯，八點幾去到。呢個時間應該都係甜品店黃金時段。點知店內1/3吉檯食完無人執檯，地方污糟邋遢。櫃面有個男仔好專注咁打緊機。我哋唯有走埋去櫃檯麻煩佢執檯啦⋯⋯執完檯佢無理我哋，亦都無比餐牌招呼我哋叫嘢，只係繼續專注地打機。幾分鐘後，連隔離老虎堂個男仔都走埋過嚟，佢哋就好專注地吹水啦。十分鐘後，我哋自己行埋去櫃檯打算叫嘢，佢哋繼續專注到我哋企咗係櫃檯打算叫餐，佢哋都無理我哋，唯有主動打斷佢哋嘅話柄啦⋯⋯好啦，排除萬難終於點餐啦！佢舖頭主打芋圓，咁就緊係叫芋圓食啦！點知個男仔聽到，就只答一句「賣晒⋯⋯」。之後就無理我哋繼續吹水。。。但係openrice睇返佢哋營業時間係去到十點。即係只係開住舖唔使做生意、打機吹水到十點真心鄧佢老闆慘，打開門口但唔做生意。即使八點賣晒預備咗材料，都仲有兩個鐘，都唔打算再整d出嚟賣？所以，我哋唯有去market place 買外賣啦…查看更多

行街想休息下，搵到呢間甜品店，點知中伏！應該係食過最難食嘅甜品同飲品。店鋪有最低消費，每人最少要叫一份。服務態度一般，飲品沒有任何甜味，吸管仲要爛左，店鋪仲有一陣異味，feel唔到有冷氣，食到成身出汗，不會再去，未見過咁難食噶甜品！…查看更多

芋見好圓MOON LIKE之前新開張有優惠，我一早就到咗門口，記錯以為10點開門，我9點半到咗喺度呆等，足足等咗兩個半鐘！😑🤦‍♂️排第一果種「真的很興奮」嘅感覺無哂，一到12點即開始賣，仲見到台灣老闆娘親自招呼顧客，解答排緊隊顧客問題。今日係最後一日買滿$45有一杯免費指定茶飲，只送「豆漿凍烏龍茶」或「豆漿凍紅茶」，我就揀咗「豆漿凍烏龍茶」！1. 巨無霸芋圓4號（仙草+珍珠+粉粿） 配紅豆湯$48（7/10）芋圓真係超級大粒，大過平時3倍，但量唔多，大粒地瓜圓有2粒，大粒芋圓有1粒，細粒地瓜圓有6粒，細粒芋圓有5粒，食過底仲有黑糖珍珠同蒟蒻條。味道方面芋圓嘅芋頭味出過地瓜，味道係好食過其他芋圓店，芋圓一樣咁煙韌，紅豆湯唔甜，但芋圓粒數我就覺得「芋圓控」抵食好多，芋圓控世一，性價比高！2.豆漿凍烏龍茶 $免費（價值$32）（5/10）聽唔清楚店員講咩野無咗，只係問想要豆漿凍紅茶定豆漿凍烏龍茶，其實豆漿凍即係仙草，溝茶落去，超普通！個人口味總評分：6/10地址：奧海城2期G53號舖#芋見好圓 #hkfoodie #hkfoodblogger #hkfoodpic #hkfoods #hkfoodshare #dessert #hkdessertshop #food #hkfood #hkfoodstagram #hkfoodpic #hkigfood #foodiehk #yummy #delicious #foodie #hkfoodieblogger #hkfoodies #wheelchaireatinhongkong…查看更多