聚豪軒

營業中

休息中

🍽️ 聚豪軒（將軍澳海翩匯）今晚因為下雨所以打波提早收隊食飯，去聚豪軒，結果意外地有驚喜！👀👨‍👩‍👧‍👦 一行六人叫咗個四人套餐 + 孖寶，份量絕對夠晒，性價比高達 💯！🦐 卡邦尼蝦球伊麵：蝦球ok，卡邦尼醬香濃但唔膩，伊麵掛汁一流。🍲 烏雞魚翅燉湯：湯底清澈鮮甜，烏雞滋補，雞翅炆得軟腍入味，燉得夠火喉，暖胃又養身。🐟 清蒸虎斑： 新鮮養魚， 魚肉滑嫩，蒸得啱啱好，冇腥味。🥬 蒸滾浸時蔬：簡單但唔馬虎，蔬菜爽脆，保持原味，清新解膩。🥢 黑醋排骨：酸甜平衡得恰到好處，黑醋香氣撲鼻，排骨外層微脆、內裡嫩滑，啖啖肉香中帶少少開胃刺激感，令人食慾大增！絕對係一道令人眼前一亮嘅功夫菜。🦆 孖寶（片皮鴨 + 上湯蝦球伊麵）：片皮鴨皮脆肉嫩，配埋薄餅、青瓜、甜麵醬一齊食，真係一絕；蝦球伊麵再出場都冇失手，唔會重複感。🏠 裝修方面屬於典型酒樓格局，冇乜特別，但乾淨整潔，坐得舒服。👨‍🍳 廚藝方面真係值得一讚，近來食過咁多酒樓之中，佢哋嘅出品排得上前列！📍 地址：將軍澳唐俊街海翩坊地庫1樓11號舖 #將軍澳美食 #酒樓推介 #打波後好去處 #性價比高 #片皮鴨必食 # 黑醋排骨必食#港式酒樓 #家庭聚餐

難得復活節假期同屋企人去飲茶 見轉咗新酒樓就嚟試吓 一嚟到就有位 仲諗住唔使等咁幸運食物款式已經唔算多 仲要一上枱嚇死人 究竟個鹹水角放咗幾耐 其中一粒黑晒好似俾人打瘀咗咁 其他已經放到唔係脹卜卜 凹到不得了 咁都可以放上枱呢樣都算啦 😐諗住牛肉腸粉一定穩陣啦 入邊竟然係咬唔開嘅牛筋嚟嘅 真係俾錢買難受 終於深深明白到點解唔使等位 一定唔會再嚟 咁樣嘅質素真係不得了 重點係價錢已經唔係平 點心都咁嘅質素 真係唔敢嚟晚市 😵😵😵

是日新年年初三，去酒樓晚餐，諗住開心食飯家人團聚，點知…座位：一行15人（已預約）比張12人枱，無安排足夠位，我地去到發現唔夠位，最後要部分櫈轉圓櫈先坐得哂，好迫好辛苦咁食餐飯。重點，原來成個場無坐滿，坐大約1/3-1/2人，其中一張大啲既枱吉左都唔比我地坐。冷氣：食餐飯，感覺凍過出邊街，啲冷氣吹到個人同食物都好凍。服務質素：唔識執生，叫一下先做一下，唔主動收拾同換碟等等，無咩服務可言，5個職員中，只有一個係好。食物：一嚟就上好多餸菜，成枱滿哂隔幾分鐘又再出，完全無位上，職員只係想夾硬擺上枱，完全冇諗住幫手轉碟等等…食物質素還可，但由於太快推哂啲餸菜岀黎，加上冷氣太大，好快吹到凍晒都唔好味呢，大打折扣！香港生意已經比以前難做，如果仲係咁嘅表現，好快又會好似海港咁執㗎啦。

開咗幾個月，食咗幾次，多數飲早茶。早茶大約$60-70一個人，正常價錢，正常味道，件頭偏大。粥+炒麵假日$36.8孖寶，都多人食。大件夾抵食。早茶蝦餃兩粒或燒賣兩粒，$19.8。煎蝦米腸好食，少少脆，跟豉油甜醬麻醬，每次都點。之前有芋蓉穌，好食，但後來無咗，唔知之後有冇。員工有禮，裝修乾淨。普通大眾化茶樓，唔好期待有米芝蓮級數，幫襯多數係附近街坊，個人覺得同附近幾間比，性價比高，如果想飲早茶，係我本人嘅首選。相係幾次加埋。