翠苑甜品專家 (北角道)

營業中

休息中

係鳯城冇食甜品，其他成員就返屋企，但我與家姐就去食甜品，今次就試了合桃露燉蛋及麻蓉湯丸。燉蛋都係一樣的好味，唯獨合桃露少左的，同埋落碗底時唔係分佈咁平均。至於湯圓就除左有一舊因為新而滾得唔夠耐，它們都皮薄hum靚，湯則是薑湯，順便飲埋佢。埋單24蚊，當然係我比錢啦。

同友人食完dinner後，去左食甜品﹗其實之前都食過一次，所以今次都介紹其他人黎試試﹗水準唔錯，都無令友人失望﹗因為食完dinner，比較飽，所以放棄LE度出名既燉奶系列甜品，叫左個清清地既木瓜銀耳﹗味道一般，所以下次最好都係叫番燉奶系列甜品﹗

星期六晚同太座食完牛一，掃完韓劇，當然要食埋甜品至走。呢頭甜品最好是這裡，自然不作他選。十點幾，仍然多人，都要企左一企至可以坐入卡位。上次吃了合桃露燉奶，今之到太座有興趣，我就要了另一招牌甜品~芝麻糊。再吃合桃露燉奶，太座覺得燉奶太甜，相比之下，合桃露自然不夠甜又不夠多，亦不夠熱，加上燉奶多而合桃露少，均衡一點較好；這裡的芝麻糊不很濃，香味夠，但不夠甜，芝麻糊是不夠甜也不會帶出香的糖水，向店家反映，她也承認是將就了市場口味的關係。總括而言，燉奶雖然新奇，所需的技巧亦高，但下次再來，正正經經食番碗糖水會好好多。埋單24蚊，經濟抵食，不妨一試。

3月9日吃畢阿鴻小吃,又是到了指定動作的時間了,去吃甜品是也,食甜品的地方,大多也是小店,所以我們這班人又是佔了一半位置喇!之前麵包兄食過,據聞較出名的是燉奶,但因本人不太好的關係,因此叫了桑寄生紅棗蓮子茶,好多時叫呢個都有埋蛋既,難得呢度可以走蛋,不過就算不可以走蛋,我都食唔落啦!端上來的是熱呼呼的,已先得到了我的好感,先呷一口茶本身,甘甘甜甜的,唔錯喎,至於蓮子,份量多到爆燈,而且粒粒都好鬆化,可以稱得上是有水準之作啊,另外亦好佩服選叫糊類的食友,一滴不漏送晒入肚,而且賣相都幾對辦,下次有機會試下糊類先.招呼我地個阿姐,好似有點呆滯似的,叫佢好多聲都好像怱怱行過,卒之要叫好幾次先叫停,同埋叫左幾次先叫得晒大家所需既,唔通比我地呢班突如其來的十數人嚇親?適逢這店那天賀分店開張之喜,全店甜湯是日減兩個大洋,更加平上加平,就算照原價付費都係抵食啦!

果日同個fd出街~ 見到銅鑼灣百德新街GA時候~見到間上海菜館((霞菲路))~果間野D裝修都幾靚下啦~不過佢\果個獅子頭就勁掂啦~買相都好好，食落去果個肥肉呢勁滑喎~好好食~食完都唔覺飽ar~不過D價錢就相當貴啦~

去完阿鴻小吃,順道行過黎食甜品,叫左合桃露燉奶$14--- 燉奶頗滑,不過甜;但合桃露冇合桃味,整體來說只屬一般!

月頭阿鴻小食版聚後，與食家黎過一次，當日食了我逢去甜品店(如有) 必要試既薑汁燉奶，昨日食完辣後當然要過一過冷河，原來隔兩間鋪開了大良八記，還有其他小食。入到去就坐近門口第二張檯，二話不說點了芝麻糊燉鮮奶，當然係要凍版，但唔知係剛剛整好冇耐、雪櫃有問題、還是經常又開又刪，唔夠凍，都算啦，芝麻糊比奶少了一些，味道不算甜，幾好幾好，我諗落去奶哥下既份量真係要控制得好一些，亦都可能真係有的難度呢！

芝麻糊燉鮮奶真的不錯，可惜不夠熱（老闆其實已事前表示如果不夠熱可替我翻熱，但因趕時間，食"住"先），而芝麻味再香濃些就更好。燉蛋亦不太甜，OK啦。

3月9日晚,在阿鴻小食之後,當然係去食甜品啦!之前來過這裡,感到很好味,今晚就介紹給其他食家;我們一行十幾人,差不多坐了它半間店.老闆還很好人的告訴我們,現正在做特價,每人可以給少兩元.真係食得開心,批錢都批得特別開心D.說回甜品,我今次叫了一個(芝麻糊燉鮮奶),芝麻糊都唔錯,如芝麻再香一點就更好了.燉鮮奶很滑很香,一句講曬'正' .比例上,今次比之前好好多,差不多一比二.這正是我所要求的.

今晚和二個朋友,一行四人到北角食晚飯,之後當然要食甜品啦!(出得來多的後遺症)我們來本打算去褔圓的,但KC介紹這裡,我們便立刻走人(已入去褔圓坐下了).我們叫了介紹的15.養顏杏仁糊- 杏仁糊都唔錯,很香很滑,唔太甜;雖然比源記差了少少,但和一般的甜品店,就好好多了.21.合桃糊燉鮮奶- 合桃糊和燉鮮奶真的很好味,唔太甜剛剛好,又滑又夠香,只可惜比例上就有d問題,合桃糊太少,燉鮮奶又太多;如合桃糊多一點就更好了.22.芝麻糊燉鮮奶- 芝麻糊都很好,但香味就唔多夠,也是同一問題,比例上唔多好.(一凍一熱兩碗)這裡的甜品的確唔錯,如能再改好少少比例就更好了;這裡也是值得介紹來食的.***謝謝KC的好介紹****之前的數字是甜品的號數.

充滿巧合的一個晚上，一班朋友開心的吃了餐飯。飲飽食醉，照例去找糖水吃，因走的時候在下著不小的雨，所以就在附近找算了，行了來這裡。十點半，人客不多。地方乾淨又光猛，做的是街坊生意。這裡賣的是傳統糖水，牆上標明，鎮店之作是芝麻糊及核桃糊，兩種同檯的朋友也叫了，評價也不錯，就叫了它們的變奏版來試試~核桃糊燉奶。面及底都是白色的燉奶，中間夾著核桃糊。燉奶滑，奶味香而不臊，不太甜，幾好；唯可惜核桃糊份量少了一點，吃不到真正的味道，不過從朋友的那碗嚐了一點，是不錯的。不過幾位自己有煮食的朋友都對這個夾心燉奶的整法有興趣，在討論的同時，這裡的阿姐亦加入戰團，不過可惜到最後仍然是不能確定煮法。埋單14蚊，由朋友付了賑，多謝了。總括而言，這裡的糖水也不錯，價錢便宜，值得一試。

今晚同傻鹿吵了一場,之後獨自一人乘電車到北角閒逛,行到北角道時有少少餓,但食不下飯,又不想吃麵,最後經一輪兜兜轉轉後,決定走入來食碗糖水,當安慰下自己都好.呢度舖面以甜品舖來講都算大,款式以傳統的為基礎,再加以crossover,自己想來想去,都係要左個合桃糊燉奶.個燉奶好快上,好熱辣,面頭同碗底都係凝固了的牛奶,再夾層合桃糊,個糊不太杰,混和牛奶一齊食,兩種味道配合得剛好,不算太膩,可以當飯吃,只是我胃口不佳,未能清碗而已.今晚食甜品的心情,同之前飲那杯咖啡一樣(詳見cafe corridor 食評'含著淚喝的咖啡'),雖然食緊美味的甜品,內心卻另有一番苦味,唯一不同的是,今次我未有含著淚,只是感到無奈,無助同悔疚......

正話食完LUNCH之後口痕想食D甜品,諗起幾個月前0係"翠苑"試過燉奶幾味,於是就落0左去食碗糖水.不過今次唔食燉奶,要0左紅豆百合蓮子,呢個紅豆糖水唔係紅豆沙0個隻,而係唔稠唔稀0個種,甜度適中,都幾好味,但就一塊百合仔都搵唔到~不過OK啦!8蚊有埋蓮子都已經好抵!而我今次覺得最值得讚0既就係:俾錢0個陣,我得一張500蚊紙,佢地話咁早無得找喎!我話但我無散紙呀!之後老闆同老板娘都話由佢啦!下次先俾!跟住我話唔好0既!我轉頭返0黎俾!到我出0左門口我都仲聽到老闆話得啦!下次先!幾個字之後,我返去俾錢,老闆一見到我就話都話唔洗咁急咯!遲D都唔緊要啦!我就話唔好意思丫嘛!唔該曬!跟住老闆話咁你又唔係無錢俾,係無散紙之嘛!唔緊要!唔緊要!(勁NICE!)D0野又好食,老闆又好人,真係好難無下次!

昨晚路過北角道，入翠苑試試。此店以芝麻糊作招徠，合桃糊亦是主打，周六日更有自創腰果糊，但我卻選了杏仁糊。無他，想吃。糊偏稀但不「水」，亦有杏仁香，對胃口。當然，我吃過更好的，但十一圓一碗，想如何?此店我只給一個字作評語。

上次又試左佢既杏仁糊同腐皮雞蛋糖水前者不太稀,甜味亦夠,幾滑,幾好味!後者就比較差,太稀,腐皮散晒,同埋過甜.但我始終覺得呢度既燉蛋最好食!