維港冰室

營業中

休息中

今日同媽咪喺銅鑼灣行街，見到依間維港冰室超好生意，又有好多唔同種類嘅小菜同套餐，一於入去食個靚lunch先😍佢嘅小菜套餐包例湯同白飯，例湯仲可以揀中湯或者紅湯白湯，真係任君選擇，中湯係木瓜煲合掌瓜，飲落好鮮甜滋潤，飲得出係冇加味精真材實料嘅住家湯😋去骨水門海南雞半隻 $129雞肉嫩滑，而且去咗骨，食起嚟好方便，份量好足夠。中式牛柳 $91啲牛柳切得啱啱好，肉質鮮嫩多汁，咬落去好有口感，調味亦都恰到好處。維港小炒王 $99入面有好多唔同嘅材料，鮮蝦、魷魚、花生、銀魚仔等等，配韮菜炒得好香，好有鑊氣。冰室黑牛 $15經典懷舊特色朱古力雪糕配可樂套餐只係加呢個價錢真係抵到爛，味道仲唔錯添。椰果紅豆冰 $15清甜嘅紅豆加上 Q 彈嘅椰果，飲落去涼浸浸，消暑一流。呢度環境舒適，裝修仲好新潮好有特色，服務員好殷勤態度又好，真心推薦大家嚟呢度食嘢，性價比超高，唔會令你失望！評分：最高為5分治癒度：👩‍⚕️👩‍⚕️👩‍⚕️👩‍⚕️抵食度：💉💉💉💉翻兜指數：🩺🩺🩺🩺@victoryacafe維港冰室銅鑼灣謝斐道483-499號新城大廈地舖📍銅鑼灣港鐵站C出口2分鐘路程#healingbobo #foodie #

和朋友夜晚10:15入來，大家食完晚飯之後，好想飲杯奶茶。當時只有三成客，大把吉枱。杯奶茶嚟咗10分鐘之後，一個類似女主管行嚟我哋側邊，望吓我哋。然後問我哋使唔使點啲嘢食，我哋禮貌同佢講唔使啦唔該。再過咗10分鐘，呢個女主管又行埋嚟，今次明示我哋，淨係飲兩杯奶茶唔夠喎，要點嘢食。我哋望吓個餐牌，冇寫需要最低消費，於是同佢講需要最低消費嗎？佢話唔冇，不過最好點啲嘢食啦。我哋見到咁，快快脆脆飲埋杯奶茶就走啦，可能我哋阻住佢班夥計收工掛。今時今日咁嘅服務態度，唔好怪人點解要上深圳呀。

香港人最鐘意去茶餐廳食野，因為快靚正又夠飽👍🏻不過依家好食嘅茶餐廳買少見少，冰室好多都貴得黎又唔好食🥲今日經開銅鑼灣，就過嚟試吓呢間冰室，估唔到呢度都有小菜食😍🥢招牌酸菜魚媽媽至愛，魚片好滑身，呢款招牌小菜好多配料，除咗酸菜，仲有萵筍，木耳，菇類etc 酸辣到啱啱好，送飯真係冇得輸😋👍🏻🥢招牌黑椒牛柳牛柳肉質夠腍，肉味都濃，黑椒汁好香口好夾～仲有個大焗薯配西蘭花同埋蘿蔔，非常滿足😋👍🏻🥢蛋撻&麵包港式麵包，叫左兩個蛋撻，雖然不熱但酥皮很酥脆，餡心富蛋香😆小朋友好鍾意食奶黃墨西哥包, 仲有香港特色嘅鮮奶雞尾包🥖🥐🥯🍹雪糕紅豆冰餐飲方面，叫左杯雪糕紅豆冰，只需加$12。唔止大杯，仲加左好多又甜又軟綿綿嘅紅豆🫘

見佢有個kiosk係賣麵包，蛋撻… 咁就入去試下.叫左菠蘿油，蛋撻，奶茶.菠蘿油，蛋撻，兩樣都係涷… 係涷，連暖都無！咁叫做新鮮出爐咩？！同侍應反應，話希望可以有熱嘅麵包，個位專負責麵包櫃位，帶鄉音式廣東話侍應同我講：「菠蘿油從來都係涷食，個包係唔會熱，熱左就切唔開放牛油」. 呢個回覆令我思想衝擊，完全反轉一直以黎菠蘿油冰火交融嘅賣點！其實成間舖嘅侍應都係鄉音式廣東話，我以為自己北上左，咁我諗佢地其實係唔認識香港食物，對‘新鮮出爐’ 有另一番獨特見解. 蛋撻，我再三要求整返熱佢，佢就話「無得整熱架，換另一份俾你」，新一份係暖嘅.最後附上完整菠蘿油相，成份無食過就埋單.P.S 見到附近嘅食物都係大大碟，堆到山咁高，個飽有咁漲得咁漲… 成個營運模式好似北上咁，不了！

上次食過灣仔嘅維港冰室，覺得啲食物好味，今次行經銅鑼灣，都去咗銅鑼灣嘅維港冰室食晚飯。你家維港冰室好大間，有卡位，坐得都幾舒服！公司三文治 我囡好鍾意食三文治，佢揀咗公司三文治，上碟時，我哋都好驚訝，佢嘅擺盤都幾靚，食落去仲熱熱地，舊午餐肉係熱嘅，感覺完全唔漏，配埋蛋同埋蕃茄食，好開胃，好味👍豉汁蒸䱽魚 好耐冇食魚，就叫咗碟豉汁蒸䱽魚，估唔到佢嘅蒸魚掌握得咁好，條魚蒸到好滑，啲魚肉好正，有鼓汁味，又唔鹹，完全食到魚嘅鮮味！維港小炒皇 呢碟維港小炒王超級惹味，聞落好香，原來佢用咗韭菜、魷魚、蝦乾、鮮蝦、腰果等材料，再用XO醬去炒，所以非常惹味，送飯最岩！雪糕紅豆冰 呢兩杯特飲賣相好靚，杯雪糕紅豆冰有好多嘅紅豆，好足料，雪糕都好好味，我囡超鍾意！柑桔梳打柑桔梳打用咗少少鹹柑桔，鹹鹹地甜甜地，幾好飲👍呢間維港冰室，食物質素好好，我哋都好鍾意食👍📍維港冰室（銅鑼灣）地址：銅鑼灣謝斐道483-499號新城大廈地舖#銅鑼灣美食 #銅鑼灣冰室 #維港冰室 #冰室推介 #美食推介 #抵食美味

上次去完灣仔維港之後，記得佢有小菜。今次特登去銅鑼灣呢間食佢嘅小炒，估唔到有小驚喜喎今次都係被安排坐卡位，然後繼續聽住我個年代嘅MK歌😂真係首首都識唱唔係講笑！今次嗌咗三個餸，三個都唔錯，首先講吓個鹹魚煎肉餅先，平時食蒸肉餅就食得多，第一次試煎肉餅，我覺得幾好食喎，好鬆化，而且鹹魚好香，成件事好送飯， 一塊就已經半碗飯，一份有成8塊😂😂跟住嗌咗個咕嚕肉，真係啖啖肉，係由細食到大嘅味道，菠蘿青椒洋蔥，都係有炒過嘅，我哋擺咗一陣先食，都仲係脆卜卜，值得一讚。🫶🏻🫶🏻跟住仲嗌咗一個蝦醬通菜豬頸肉煲，份量都幾大兜，通菜爽脆，豬頸肉入味。🤟🏻呢個又係可以食半碗飯嘅餸。我哋二個女仔去食完仲可以pack埋第二日Lunch Box😂整體嚟講，中菜嘅水準都OK， 80至$90一個小菜，有湯有飯有嘢飲，如果喺銅鑼灣嚟講，真係唔錯嘅選擇。

每次下午茶想食西多士就會黎維港佢係整得最好食啲花生醬又夠多炸到金黃色好正另外佢下午茶既炒野都好香好大碟份量同午餐差唔多不過成日都想問佢點解冇炸雞翼😅如果有就更好同埋啲枱真係迫左啲

今日屋企無飯食、收工就係附近搵間餐廳食飯行到銅鑼灣見到維港冰室，有啲想食小菜就決定入去醫肚！😜餐廳用咗好多酒做裝飾好特別，忍唔住都要打打卡茶餐廳最好就係乜都有得食，有焗飯、鐵板、又有常餐等等，但因為想食小菜所以都無試其他。🤓椒鹽鮮魷份量好大好多，鮮魷好新鮮，炸粉又唔會太厚入口好香蒜味，雖然熱氣但好惹味🤩🤩啫啫通菜豬頸肉煲一上檯咋咋聲勁有鑊氣，打開蓋飄出好香蝦乾味食落好咸香，辣辣地好正，豬頸肉夠腍同爽口惹味薯仔牛柳粒每粒薯仔同牛柳都包滿甜甜嘅蜜糖，牛柳粒好入味好香濃，而且肉質一啲都唔韌，薯仔夠粉超好食，個名果然無改錯係惹味呀！🤣🤣🤣屋企無飯食又想食下小菜，去茶餐廳真係一個好選擇！每個餸都有香港風味～～

:香港人最鐘意去茶餐廳食野，因為快靚正又夠飽，不過依家好食嘅茶餐廳買少見少，冰室好多都貴得黎又唔好食。今日經開銅鑼灣，就過嚟試吓呢間冰室，估唔到呢度都有小菜食。🌟維港小炒王 $99有時去打冷都會叫呢個食送酒一流炒得好有鑊氣 好足料😆有蝦仁 魷魚 🦑腰果 魚乾仔🌟酸菜魚 $91見到有酸菜魚即刻叫！整得幾好食唔會太辣，味道偏淡小小～岩哂啲唔想咁辣咁咸既朋友仔除咗酸菜魚都有萵筍同菇類🥳🌟全日早餐 $61呢個就普普通通啲炸魚係炸得幾好魚肉好嫩滑唔會炸到好油而且炸得夠薄炒滑蛋夠嫩另外再加黑松露好香🥳🥤跟餐紅豆冰 +$7 凍奶茶+$3💭總括嚟講呢度食物種類多，總會揀到一款啱大家食，可以食小菜·全日早餐·常餐·酸菜魚·鋸扒價錢又合理，食物同服務質素都唔錯。難怪星期六下午茶人流不斷。同一條街道好幾間茶餐廳，要突圍都唔容易，可想言之店家都有落苦工係食物上面。🌙維港冰室 (銅鑼灣)銅鑼灣謝斐道483-499號新城大廈地舖

銅鑼灣好多唔同茶餐廳同冰室😋好多都排曬隊見到維港冰室有我哋想食嘅野，一於就係試吓喇💕維港冰室好多元化，真係乜都有得食☺️小菜，鋸扒，辣嘢都有，最正仲有新鮮出爐更款面包，餐廳設有卡位，坐得舒服🥢招牌酸菜魚媽媽至愛，魚片好滑身，呢款招牌小菜好多配料，除咗酸菜，仲有萵筍，木耳，菇類等💕酸辣到啱啱好，送飯真係一流。🥢日式鰻魚炒飯呢個炒飯好夠鑊氣，份量絕對夠兩個大人食😆飯底用咗粟米粒翠玉瓜一齊炒，仲有大量鰻魚肉，加上鰻魚汁，好滋味。🥢去骨水門海南雞(半隻) 半隻都好大份，起左骨方便食用，雞肉嫩滑，唔洗點汁都入味。🥧菠蘿包出爐新鮮麵包熱辣辣，仲要勁大個，好正🧊凍朱古力🧊凍檸茶🧊凍梳打柚子蜜

銅鑼灣一向多野食成日見好多人在維港冰室門口等位趁早到不用排隊試下因為第一次食唔知份量如何三個人叫左三份午餐及港式麵包蛋撻真係超級抵食夾大件唔單止主食非常足料估唔到連麵包都係巨量級$14黎講好誇張 🫨小朋友好鍾意食奶黃墨西哥包仲有香港特色嘅鮮奶雞尾包特色海南雞飯配餐湯 $70勁多雞肉 夠嫩滑少骨 感覺有成1/4隻美中不足是得一種醬汁芝士肉醬腸仔飯 $67 + $10 紅豆冰 醬汁濃郁香口招牌維港炒飯 $78 + $8 凍飲用上蟹柳魚蛋蝦帶子小辣椒非常惹味真正香港茶餐廳高水準落單出餸準確有效率‼️

每年農曆七月都有「盂蘭文化節」，今日係最後一日係維多利亞公園舉行，我哋可以從中了解到國家級非物質文化遺產 - 盂蘭勝會嘅文化。之後行下行下，就走到鵝頸橋睇埋另一個列入政府非物質文化遺產清單嘅「打小人」項目。眼睛👁️👁️體驗左甘多香港🇭🇰獨有嘅民間生活文化之後，當然要到我地嘅五臟六腑去接觸香港🇭🇰嘅特色冰室la。佢對面就已經有間充滿住維港🇭🇰特色嘅冰室，裏面金色維港🇭🇰嘅剪影，引人入勝。舖頭有好多好大隻嘅figure，同埋招財貓🐱🐱嘅牆，都令人映入眼簾👀。📌海南雞例牌🐔雞肉嫩口又入味，去左骨送飯一流，點埋個秘製醬汁仲好食，例牌份量都好足夠📌椒鹽鮮魷🦑外層粉漿脆，內裡鮮魷果然新鮮。無論同屋企人、朋友飯聚時，送飯定送酒都係一個無得輸嘅小菜📌太極鴛鴦炒飯⚪🔴🍚如果你自認係飯桶又有選擇困難症，呢個太極鴛鴦炒飯你見到一定好鐘意。點解？因為份量真係超「巨」😲🍛，食完好多白汁蝦⚪🦐🍚個邊嘅香甜，開始飽到有啲停手之濟，又心思思想試下茄汁雞肉🔴🍅🐔🍚個邊，點知呢個酸甜交錯嘅感覺，搞到又好開胃清曬😁😁😁📌焗白汁海鮮意粉🐟🦪🦐🍝海鮮重料之餘，芝士🧀重可以拉絲，記得趁熱🔥食呀📌跟餐有足料白湯⚪🥣同冇味精嘅中湯🀄🥣，

座位寬敞舒適都有唔少卡位，仲有啲卡通公仔幾得意，衛生同服務亦比一般嘅茶餐廳為好～西冷牛扒（薯菜） $119西冷牛扒🥩肉質夠腍，肉味都濃，蒜蓉汁好香口好夾～仲有個大焗薯配荷蘭豆同埋蘿蔔，非常飽足～（餐）紅湯港式西餐必飲羅宋湯，微微辣，有不少雜菜豆豉鯪魚炒油麥菜即炒小菜好有鑊氣，油麥菜爽口新鮮，配上豆豉鯪魚炒，特別惹味～鹹檸七，冰室黑牛港式茶餐廳必飲鹹檸七及冰室黑牛鹹檸七，鹹鹹地，檸檬酸酸地～冰室黑牛，可樂上加上雪糕，雙重滋味！蛋撻酥皮好鬆化，整咗好多層，蛋味香濃～雞尾包$10，吞拿魚包$14，芝士條$11而家周圍啲麵包都要10幾蚊，呢度10幾蚊一個麵包係兩個拳頭咁大！份量都真係勁抵食！丫女食左半條芝士條已經飽左，飽又夠熱辣辣又鬆化，正！🍱維港冰室 (銅鑼灣)📍📌銅鑼灣謝斐道483-499號新城大廈地舖

冇味精  性價比高  屋企的味道行咗一個圈唔知食咩晚餐之前在這裏食過一次跟住行入去有位就坐低食叫咗個勝瓜炒雞柳味道唔錯有媽媽屋企煮的味道食完沒有口渴眼瞓應該冇味精仲有少少鑊氣份量都幾大跟咗個羅宋湯都幾好味餐牌尚有其他是日晚餐價錢是正常的大家經過可以試吓望落去餐廳都有八成座位，已經有客人佢仲有出爐麵包見到有些人買外賣我諗其他食物都唔錯下次試吓佢個麵包先上次食咗個晚餐好似係鐵板豬扒個豬扒都幾厚同大份食完都好飽

銅鑼灣茶餐廳一街都係，但我始終都係最中意食維港冰室，平時返工經過，早餐都會買個麵包，大大件！熟食又熱辣辣🙂🤤而且餐廳仲好多卡位🥰今晚又同個frd過嚟食晚飯加吹水，坐咗三個鐘☺️今晚叫咗晚餐set海南雞飯 肉質鮮嫩，仲走埋骨，啖啖肉！我呢啲懶人，真心中意！鮮魚湯野菌浸什菜湯中有好多種菜，補充水分，清清地，好味又健康！咖哩香煎豬扒微辣，啱晒我唔係好食得辣嘅人！豬扒煎得剛剛好，又柔軟。配埋薯仔，洋蔥，紅椒，可以送多一碗飯😜中湯老黃瓜豬骨湯侍應都好細心會問你想要有渣定淨水？我話兩樣都想要，佢就俾咗兩碗我🤣湯隔哂油，冇味精。少鹽。比較健康！