知味燒臘茶餐廳 (已結業)

平時間唔中都會去買燒賣粉果既，事頭婆好好人，但佢請嗰個伙記態度極差，有次去買燒賣粉果，叫佢比多d辣油，點知佢話：「辣油要錢架！」唔肯比多d。😡又有一次去食lunch, 事頭婆講明湯係可以添飲既，但點知呢個女人話唔可以喎，要我地話：「事頭婆話可以添飲」，佢先黑住面去添多碗湯！😡本來呢間茶餐廳老闆娘係非常好，對食客好，$5/盒炒麵，幫到好多冇錢食飯既公公婆婆，但佢個伙記繼續留喺呢間茶餐廳只會繼續得罪更多食客，我都會因為佢伙記既態度而唔選擇唔幫趁，希望老闆娘可以睇到，做返d野啦！…查看更多

沒有富麗堂皇的裝修格局、沒有珍饌百味的美酒佳餚、沒有玲瓏浮凸的美女侍應，為的只是人情味，老香港的風味 ﹗突然覺得自己好鬼地盤佬呢！向來知味都係全麻甩食客，誰知撞左個阿姐幫襯喎，仲係梅菜肉餅之友添，真係萬綠叢中一點紅。二十年前幫襯過小店，舊地重遊，感覺非常有趣呢！真正的知味，加入人情味的小店，叔叔、嬸嬸、伯伯，每位都十分熱情，招乎周到有加，氣氛舒服，食都食得特別開心。最愛玩 photo hunt，等食前最奉的娛樂 ﹗不是班腩，是斑腩；不是楊州，是揚州；不是支竹，是枝竹；不是蒸溜，是蒸餾；不是沙爹，沙嗲。男人的浪漫，燒臘知味飯？節瓜蓮藕湯，真材實料，樸實不華，住家味道濃厚，田園風味清淡不含味精，最緊要夠熱辣辣，滿意。蓮藕鱆魚湯，超乎想象的好味道 ﹗濃郁甜美。最好飯前飲晒去，因為飯後變得淡而無味咯。菜乾湯，有梅菜味非常特別，勁香口勁好味，一滴不漏灌晒落肚！冬瓜湯，夏天未到就已經有我喜歡的冬瓜湯飲，so lucky ﹗清爽香濃好好飲，用木魚乾及瘦肉湯做湯底非常甜美，當然被我飲得一乾二淨。例湯任飲、白飯任裝，唔怕您唔夠飽！佛手瓜豬骨湯，好清甜啊 ﹗無添加無味精，清淡例湯夠原味，我鍾意 ﹗而且還添上陣陣粟米香甜味道，就更是可口。嬸嬸給太多渣喇，我對湯渣麻麻，so sorry。不過對面位阿姐將所有湯渣清晒，食得津津有味，勁呀 ﹗全場麻甩佬，依位食牛肉炒米阿姐係中原一點紅 ﹗豆腐火腩飯炒底，真的是男人的浪漫？外觀賣相骨子端莊，份量十足，飯餸都滿到瀉，大方寬卓，好多肉又好多豆腐，輕煙飄飄，香噴噴地送上，流晒口水咯 ﹗炒底連工包料加 $10 蚊都好合理。失望的蛋還蛋、飯還飯，似炒蛋碎撈飯，食不到蛋香，鑊氣亦欠奉。多汁撈飯當然好，師傅落味略為重手左少少，芡汁好咸呀 ﹗唯有多多飯搭少少汁，都還不錯。啖啖肉的火腩，香口炸皮，滑滑脂肪，咸咸瘦肉，多種質感融合，除咸少少外，都尚算好味的。鮮茄豬扒飯炒底，天然系豬扒！原汁原味最緊要，彈牙嚼勁質感不乾不鞋不硬，肉香肉甜醃味剛好。茄汁微甜微酸而不濁，配上豬扒或飯粒同樣可口。$10 蚊炒底價錢合理，最緊要質素囉，蛋太少食不到蛋香，十分艱難才搵到少少蛋碎。忘了叫少飯呢，食唔晒喇。咖喱牛腩飯炒底，四眼嬸嬸跟以往一樣提示加 $10 炒底唔抵食喎，但我真係想食炒飯呢，多謝關心，讚。勁有鑊氣，香氣迫人，直撲過來 ﹗芬芳誘人，食指大動，殺呀 ﹗估不到咖喱汁勁熱，咖喱牛腩真係炒過，不是馬虎撈個汁淋係飯面就算，有誠意，果真難能可貴。熱到燙親嘴仔喇，不過越熱越好食，我鍾意。牛腩鬆化沒有半點渣，牛筋微彈結實有嚼勁，滿意。濃郁厚厚咖喱汁絕不欺場，黏黏的不失幼滑亦不會水汪汪，調味夠濃重口味。高質炒飯大愛，乾爽嚥韌不濕不爛不一舊舊，充滿蛋香好味道。揚州炒飯走蔥，無揚州既？無蝦仔、無菜粒，連代替品都無？只係普通的普通叉燒粒炒飯乍喎 ﹗發現 menu 寫住係楊州，不是揚州，楊家炒飯？幸好炒功了得，色香味俱全，鑊氣夠、溫度夠、香氣都夠 ﹗調味濃郁帶著蛋香及咸香，自家叉燒粒甜甜又鬆軟，最慘有部份散發噁心而強烈的雪藏味。本來打算食半碟算喇，不過味道真心非常誘惑，食食下幾乎全部消滅 ﹗叉燒油雞髀飯，何解不是真燒味既呢？又話係燒臘餐廳！雖然質素都達標合格，不過始終唔係期望想要既野喎！真係完全誤會晒。份量十足多多肉，好多叉燒呢，跟雞髀一樣長。醃完有再炆再加色的叉燒，並不是BBQ 的叉燒。淺紅色軟棉半肥瘦豬肉，沒有焦香甜甜的平凡味道。豉油浸雞髀？唔係玫瑰豉油雞啊。風乾的雞皮帶著微弱豉油香，雞肉無味腍乾未算過鞋。知味並沒有燒味切雞供應，豉油雞髀照食啦。高質白菜仔好好食，非常爽甜鮮嫩。燒味豉油撈飯也不錯，飯粒乾爽不濕爛，煮得好。不過薑蔥油落得太多鹽醃，咸死我喇，撈飯都只能減輕一丁點。梅菜蒸鯇魚，微暖的魚腩沒有半點煙霧，多骨幸好無細骨，都容易食既。魚肉棉滑帶彈，最衰多魚鱗，打得不夠徹底。大大舊魚肉滾上豉油搭點梅菜，家常清淡不油不咸，味道還可以的。拆晒肉撈埋梅菜白飯魚汁豉油，即時好味百倍。涼瓜斑腩飯，阿姐話炒底唔抵食要加錢，唔比我炒底，幫我慳錢喎。斑腩有點腥，厚粉索上芡汁滑不留手，筷子都好難夾得起呢﹗皮香肉結實，還有微微魚汁添。涼瓜兜炒得唔夠均勻，有幾塊凍冰冰呢 ﹗爽脆甘甜不苦澀，加埋豆豉撈飯正呀，不過不失。涼瓜煎紅衫魚，嬸嬸大力推介，我信您，就試一試吧。何解唔係魚尾架？前半魚頭無肉食喎。外觀唔似煎又唔係炆，似炸出來的。炸得透徹香脆肉乾爽，魚味濃濃厚厚，搭上爽甜甘香多汁不苦不澀的涼更加美味。咸蛋蒸肉餅，點解會那麼大篤芽菜架？我唔食架喎。既然有咁多芽菜，就試一啖。居然爽甜多汁不腥不嗅，又無生水味，又無鏽水味，最衰有豆有葉有根囉 ﹗破例照食可也，被我消滅得一條都無剩。自家咸蛋黃撈啖白飯正喎，咸香帶甘甜蛋黃，雖然沒有黃油也不錯。肉餅落左粉一齊打，質地滑嘟嘟。發現肥豬肉都不少，幸好香而不太肥膩。肉餅面甜美可口，但食到底就越食越咸，撈多兩啖飯先得。時菜肉片炒河全走，完全在我估計之外，驚見色香味美，好好食喎 ﹗先試肉片河，日後一定要試埋其他炒粉麵啊 ﹗炒河勁有鑊氣，鑊氣迫人 ﹗河粉滑溜完整不散筲筲，肉片偏碎但鬆軟棉棉。熱騰騰撈上泰國士拉差辣椒醬，酸酸辣辣併上甜美芡汁，大啖大啖塞入口，豪氣暢快大滿足。就連白菜都難得高質爽甜，不苦不澀，讚呀。豉椒排骨炒河走芽菜，平淡馬馬虎虎啦，豉味濃、椒味弱，唔夠汁撈河食，只將豉椒汁連排骨淋係河粉之上，忘記叫兜亂添，味道差好遠呢。骨多肉少的排骨，醃味一般，鮮甜味亦欠奉，入得口唔難食。乾炒牛河全走，勁有鑊氣，遠遠都感愛得到。熱騰騰燙晒嘴仔，越熱就越好食。河粉兜得未夠散，有部份一束束呢。味道蠻不錯，生抽老抽比例剛好濃郁清香不濁，但顏色未算均勻。牛肉過熟好韌喎，總好過極鬆牛肉滑潺潺腍劈劈既。雖然油浸河粉，剩餘既油可以炒多兩碟。其實味道真心不錯，淋上辣椒醬酸酸辣辣夠開胃醒神，幾分鐘整碟蒸發殆盡。突然有花生劇場助興喎﹗黑衣四眼仔：炒河唔該。侍應嬸嬸：什麼炒河呢？黑衣四眼仔：肉片炒河。侍應嬸嬸：乾炒定濕炒呀？黑衣四眼仔：乾炒兜亂，都係唔好喇，濕炒啦。侍應嬸嬸：濕炒要咩炒呢？菜遠炒？芽菜炒？黑衣四眼仔：咁都係乾炒兜亂啦。侍應嬸嬸：師傅乾炒肉片河兜亂喎 ﹗師傅：乾炒兜咩亂呀？可以唔兜架咩！成檯麻甩佬笑左，我都認唔住笑左呢，哈哈哈。好快乾炒肉片河送到。黑衣四眼仔：上次係有汁架喎？黑衣四眼仔既阿叔朋友：濕炒係有芡可以兜亂，乾炒係豉油炒囉！我聽到即時呆左。…查看更多

紅磡區還是個舊城區麻？不斷的新起高樓，什至地鐵都有了。附近還有合理的午餐，晚餐？還是隨著時間變了？謝謝你，謝謝你的沒變。走過門口看見炒米，炒粉，炒面只售5蚊。多走幾遍，證明自己係沒有看錯的。就買了一個炒面。是粥店的炒面，有芽菜絲相伴。還有甜醬，辣醬可以自由選加。面是涼的，但味道依然，比起現在什麼什麼的知名粥店來得好。起碼味道是舊有的，有鑊氣。份量來說不算是多，但一個女士的早餐或是下午茶來說就夠了。不夠的多買幾個，斷定亦不能食到40元吧。哈哈。在想，一些老伯伯就是靠這個為一餐的。你千萬不能消失啊。…查看更多