久不久經過大埔昌運，就會去呢間買糖水返屋企慢慢嘆。前幾日帶埋囡囡去，就試埋炸餃子🥟同炸燒賣。餃子有2款，分別係韮菜豬肉同粟米豬肉餡，小朋友鍾意食粟米，所以試咗「粟米豬肉」。賣相煎到金黃色，又脹卜卜都幾吸引，外皮香脆，咬落去似窩貼，老闆話佢係自家制。餡料都幾多粟米，豬肉無豬羶味，幾好味！一盒10隻份量都多，食完飽咗！炸燒賣係必點食物，炸到外脆內軟，外皮灑咗少少准鹽，幾惹味，真係好好味！今次甜品揀咗「多芒仙草小丸子」 和「綜合芋圓燒仙草」。呢度嘅甜品好足料，一樽真係滿滿材料！「多芒仙草小丸子」 唔止用椰奶，仲加咗芒果蓉，口感更濃厚一啲，芒果好甜無渣，加埋滑溜嘅仙草，幾好味！「綜合芋圓燒仙草」 嘅材料好多，除咗芋圓、仙草，仲有紅豆、珍珠同西米。呢個甜品主打係食Q彈嘅芋圓，有不同口味，軟硬度對我嚟講剛剛好。食材迫滿一樽，一個人食真係好飽，可以2人開心share。…查看更多
