手卷駅

營業中

休息中

🧀️火炙芝士蟹棒手卷 $20蟹棒有三條鋪咗塊芝士同埋大量沙律醬芝士嘅鹹香味唔太突出不過就好有炙燒嘅香味沙律醬酸酸哋都好夾 米飯屬於醋飯 帶醋嘅酸味但唔會太搶戲飯粒暖暖哋 帶黏性又唔會太軟爛紫菜新鮮香脆

冇得食晚市之後，就得返掃街可以即場食嘢，個人好鍾意食炙燒壽司，但係買返屋企食就冇咗嗰種熱辣辣香噴噴嘅感覺😢😢依家壽司店喺旺中已經好多年，屹立不倒，自然有佢優勝嘅地方！除咗選擇好多，仲咁多年都keepn到質素😋最重要係落完order好快就攞得，真係值得一讚!!😎芝士吉列蝦卷 - 吉列蝦多夠脆夠又熱，配埋啲芝士同埋醬汁好夾，好食過好多連鎖店😋厚燒玉子 - 同芝士吉列蝦卷個醬一樣，佢好重蛋香味，同個汁仲夾，要大推！😋😋

平時放假最鍾意去旺中掃街，貪佢少食多而又間間都好味，其中每次必去嘅就係呢間壽司店，我最愛而每次都只會食就係佢嘅芝士炸蝦卷，每次食都好深刻。炸蝦捲切開四件，上面淋著滿滿沙律醬。炸蝦炸到超香脆食落口仲係超級熱辣辣，呢一樣係好少壽司店可以做到嘅，有一次好誇張我搭咗半個鐘車返到屋企佢都仲係熱嘅，重點係佢價錢唔貴大家真係要食呀。

人大左，已經好少去旺中，雖然知道內面有掃街小店，但數量唔多，所以一直無去過。今次食完個主食唔夠飽，決定去旺中搵小食。第一站黎到最近入口嘅壽司/手卷店，試左兩款熱門推介，分別係芝士炸蝦卷，同埋吉列蠔卷。芝士炸蝦卷$25、吉列蠔卷$25每件細細件，整體價錢唔係話好平，但味道真係唔錯。前者半溶芝士為壽司添加濕度，入口有濃濃芝士同蝦味，配搭得幾好，係重口味之選；後者吉列蠔即炸Feel，蠔汁非常辣口😆，建議放一陣先好食。兩款卷物都好味，只係蝦卷略勝少少。

.📍手卷駅📍#饅頭去旺角 #饅頭食日本菜 #饅頭的掃街系列小編前幾日先知佢原來已經結業。------------------------------火炙芝士吉列蝦卷 ($25)所有反卷都係即叫即整，佢哋嘅芝士鹹味十足，炙燒到香口熱溶狀態😍，同壽司飯有冷熱交融嘅層次，配埋沙律醬大啖食已經好夠味；吉列炸蝦皮脆卜卜咁💕，味道就正常唔伏，飯同餡嘅比例恰當，整體簡簡單單都幾好食。------------------------------整體評分：7.4/10小編回頭率：6.5/10

去旺中食嘢，一定唔會少得芝士炸蝦卷！等咗唔係好耐就已經有得食！睇相就知好足料！我覺得飯同餡嘅比例剛剛好新鮮滾熱辣食，好脆！20幾蚊，抵到爛啦！我哋係企喺門口食，見到呢張紙😂👍如果旺角都有做堂食，一定坐低叫多幾樣食！

高質小店，隱藏於旺角中心內每次經過都忍不住買黎食火炙芝士蟹棒手卷🌸🌸🌸🌸🌸好足料啖啖肉，都只係$20，抵食！厚燒玉子🌼🌼🌼🌼🌼$13，又係大大件，熱辣辣！玉子入面有飯的，食完好飽好滿足

鐘意食卷物嘅我今日試左旺角呢壽司店😋👉 吉列蠔卷🍣($25)炸蠔🦪啱啱炸好熱辣辣🔥辣親條舌👅，飯有少少🤏🏻鬆散，不過外軟內脆的口感幾好😎👉🏻 芝士🧀蟹子手卷($23)醋飯唔算太酸，但芝士蟹子真係好鹹好鹹，就會扣左D分😣

壽司手卷款式好多，每次食都可以試新嘢。店舖旁邊有企位🚶🏻‍♀️唔叫外賣都可以即場食。醬料放喺企位張台🫖外賣嘅醬料則是店員詢問後擺在袋中。.🍣芝士吉列蝦卷 HK$25濃郁嘅芝士味😍鍾意呢種燒過嘅味道！吉列蝦🍤脆脆地，口感更豐富。可能芝士味太突出，唔係好食到蝦味。.🍣吉列蠔卷 HK$25蠔味好正🦪香得嚟唔會苦都唔會腥👍🏼上面有少少明太子沙律醬，食落唔會好乾。.🍣松葉蟹棒卷 HK$16唔算特別鮮🤣下次會試下其他嘢。隔咗一陣先食，紫菜都仲脆🥺

旺中勝在有一堆黃店可以揀，同埋有啲立食位，唔使買外賣去公園食🥲，而且食物質素比想像中好勁多😱，呢間手卷店就係其中之一，超～好～味，搞到我哋短期內都翻兜咗幾次！🍣 #芝士吉列蝦卷 $25吉列蝦炸粉好簿，食落好脆口，最正都係佢面嗰層火炙芝士再加咗少少沙律醬，味道超夾🤤🍣 #火炙芝士玉子燒 $15熱辣辣嘅玉子燒好有蛋香味好滑🤤，入面仲有少少飯😳，再加埋好厚嘅一層火炙芝士係面真係超邪惡呀😍🤤，食完完全覺得唔夠喉，強力推薦，太好食了👍🏻🍣 #三文魚腩手卷 $25份量竟然有兩片好肥好厚嘅三文魚腩，食落好有油脂味，抵食👍🏻🍣 #油甘魚手卷 $30同樣地係兩片油甘魚，但油脂味就冇咁重同埋食落有小小筋，相比三文魚腩手卷好食啲😳🍣 #火炙芝士三文魚壽司 $9件佢嘅火炙芝士真係好出色，三文魚仲要唔係薄切😳，好厚同好大塊，都係強力推薦👍🏻

同朋友行開旺角，行到肚餓，決定去旺中掃街。今次叫左佢個最普通嘅三文魚手卷，即叫即包，好新鮮，不過塊三文魚唔係好夠肥，冇乜味，但啲壽司飯就幾好食，一粒粒唔會痴埋一齊，同埋唔會太酸太重醋味

次次嚟親都叫芝士炸蝦卷，😍真係好好味，上面有雙層芝士，入面炸蝦超脆，值得一試😋今次已經第五次幫襯，不過覺得即食係最好味，今次外賣，凍咗冇咁好口感，但依然都喜歡吃^^。今次叫左三文魚壽司/特大帆立貝壽司/左口魚壽司/芝士炸蝦卷，👍款款都咁好食，左口魚入口即溶，外面比沙律醬包圍，好正，火炙壽司好足料。

超級推介：厚燒玉子$13💛💛💛​好厚好大舊❗️即叫即整架 仲要唔洗等好耐👍​中間其實夾住啲飯 份量唔少架​熱辣辣食好暖胃🤤​面頭有啲沙律醬 自己可以再加多啲 真係好鬼好味😋​玉子整得啱啱好唔會老 蛋味超濃❗️​我最後忍唔住買多舊食😂食兩舊飽左💛​

今日行旺角中心 咁啱有啲肚餓想食小食其實附近都好多其他小食店 但係壽司較合引有手卷 有反卷 有壽司叫咗個鮮帶子手卷 ($29)原本覺得好貴 食完之後就明白點解面頭粒帶子已經好大粒 食落發現唔只一粒 而係四大粒😍食到底一直有肉仲要粒粒帶子都好鮮甜 淡淡肉 超正👍🏻淋上豉油鹹中帶甜 更突顯到佢嘅甜味米飯份量比例啱啱好 質感唔錯紫菜好脆 不能睇少一塊紫菜係令手卷有口感同更好食既關鍵有驚喜嘅壽司立食小店味道好 食材新鮮 足料 手卷size適中價錢唔算平 但係合理值得一試 見佢啲反卷壽司都好似好正

黎到旺中掃街，想食手卷就同女友叫左芝士炸蝦卷（$25）同三文魚反卷（$20），炸蝦夠脆，但肉不大隻，算好食；三文魚卷上有明太子醬，太搶味，食唔到三文魚味。整體性格比可以過口癮，ok