大榮樺

營業中

休息中

住大埔既應該都知道呢間西餐，11點同5點半開門前都會大排長龍原因係價錢正常，午餐$5-60，晚餐大慨一百但食物質素頗高，份量夠大，味道好食尤其黑毛豬次次我去到都無晒！但講緊只係正常7點食飯時間所以今次星期日我地一早黎排隊，五點三諗住已經好早點知去到已經排緊隊，我地排第四定第五排到五點半開門既時候後面已經排緊十幾組客人真心好誇張因為人流一直好多，唔會有咩服務姐姐好急問你食咩，要快啲落單，但態度唔差既因為餐廳係即叫即整，可想而知第一round入去個批野食會有排等湯煮好既好快上，黎左幾次都無飲過相同既餐湯變化都幾多，今次係南瓜甘筍忌廉湯唔係好食甘筍既我頭幾啖會覺得甘筍味比較強但之後會飲到南瓜既清甜同香味忌廉好好咁將兩樣食材Combine埋一齊飲落都幾Mild唔會突兀主菜我地叫左烤鴨胸配蕃茄意粉鴨胸烤得真心靚，唔切開咁焗真係要考啲功架切既時侯已經感覺到肉質軟腍，切開熱辣辣入口軟嫩之餘咸香味突出，配埋佢既蜜汁甜甜地咸甜中和得幾好😍蕃茄意粉味道都唔錯，用新鮮蕃茄，夠蕃茄味又唔會過酸仲食到新鮮蕃茄粒既味道再黎珍寶蠔焗意大利飯燴意大利飯用方型平碟present感覺差左少少意大利飯味道好香奶味，調味唔錯

食過幾次都一樣咁好味😋每次都一大班人食,每次都會叫西冷牛扒同芥末鴨胸呢兩個餐都係性價比高嘅，今日試埋佢個忌廉海鮮烏冬如果鐘意忌廉汁嘅朋友一定要試因為個烏冬超多忌廉汁💯

咁早就爆滿😱好彩好快有位😆本來想叫黑毛豬😔估唔到咁快無晒😩相信一定好好食🤤得返牛同雞🤔最後揀咗烤雞蛋包飯配秘制豉油😮看似普普通通嘅餐廳塊雞扒出奇地好食🍗鮮嫩多汁無雪味唔似雪藏冰鮮雞咁，一切開熱辣辣好嫩滑又多汁，而雞蛋包飯同醬油好夾唔太鹹好耐都未食過咁正嘅雞扒👍🏻👍🏻👍🏻有機會試下其他先😋😋😋值得推介👅食完已經覺得可以返轉頭😋估唔到大埔有咁正嘅隱世餐廳，下次一定要早黎食先得🥺🥺

如果晏就想食西餐，建議大家可以試下大榮樺，平均都係五十幾蚊一個餐，平得黎又高質又好食。記得預時間排隊同諗定食乜，一般都要等幾張枱，但因為長期都好多人等位，啲客都好識趣食完就會走讓番張枱出黎，所以都唔會話要等好耐。差唔多到你伙記會叫你落定單先，如果叫到你又落唔切單，佢地就會叫下張枱架啦。午餐嘅選擇都算多，有牛扒、雞扒，仲有意粉、烏冬、鰻魚，總有一款會啱你。蒲燒醬汁鰻魚飯平時出面食個鰻魚飯閒閒地都七八十蚊，呢到56蚊真係抵食。鰻魚好食，份量再多d就好啦😛唔會腥，略嫌個飯有啲dry多d鰻魚汁會好食d。卡邦尼忌廉芝士煙肉烏冬好濃郁嘅忌廉同芝士味，加埋蛋同煙肉，個烏冬口感好滑，味道好香，好味！西餐廳嘅奶茶多數都唔好飲，但大榮樺嘅熱奶茶都唔錯，值得一讚！

之前聽朋友講呢間餐廳啲野好食但要排好耐隊，今晚7點幾經過見到唔算多人就拎飛等吓位啦，終於試到了。準備入座前侍應已幫我地落定單，等多一陣就可以入座喇，可以慳返啲時間。入到去都係一般餐廳嘅setting。餐湯好快黎到，係白湯，不過暖嘅，無乜味道。我地叫咗2個餐，泡菜蕃茄意粉配西冷牛扒+鮮帶子珍寶蠔配忌廉磨菇意大利飯（唔記得個名）。。泡菜蕃茄意粉配西冷牛扒。配菜嘅粟米係凍嘅，個燒汁唔夠惹味太咸。意粉有驚喜，味道恰到好處，泡菜野味配埋蕃茄酸酸辣辣好開胃！西冷牛扒有咬口唔會太淋又唔會咬唔開，但因為佢配個汁有啲咸，所以我選擇落鹽吊味，好好味。。鮮帶子珍寶蠔配忌廉磨菇意大利飯。我淨係試咗少少，個飯偏硬但味道唔錯。焗蠔有驚喜，夠大隻有蠔鮮味，配料係芝士蒜蓉牛油鹽，配料唔太濃唔會遮咗蠔味，做得好好，好香口！隻鮮帶子都好新鮮！餐飲都係偏淡。總括黎講呢間餐廳嘅主菜味道好出色，份量大，質素高，有心嘅出品，絕對對得住個價錢，以$108及$118嘅價錢係絕對會幫襯第二次！

雖然住在大埔多時 加上已經實行清淡飲食多年 一直甚少外出吃飯相約好久不見既中學同學晚飯 友好既同事介紹左呢間大榮樺沒有預先訂枱 以先到先得形式入座晚餐選擇都不少 價錢親民化 不過想食心水菜式就要睇運氣 好幾款熱門之選未夠6點9就已經售罄 所以想食好野就要早早排定隊 以當日所見 黑毛豬早早就貼著售罄 估計應該不錯才會這樣 唯有下次早點再來試試好了每份晚餐都配有餐湯及餐飲 不過同樣地餐湯送完即止餐湯是菠菜蓉濃湯 味道偏向清淡 少鹽少納本來是好事 不過略嫌菠菜味亦偏淡 若果菠菜味道再濃一點會更好秘製醬燒豬仔骨  配意大利粉賣相不俗 上枱時熱烘烘香氣迫人 食落口味適中 豬仔骨肉質軟腍剛好有嚼勁 肉汁豐富唔乾 入口柔軟 咬落彈牙 醃料同秘製醬混合起來 令豬仔骨味道層次更為豐富 意大利粉軟硬剛好 食落充滿濃郁蒜蓉香 味道不俗 西冷牛扒  配沙律菜牛扒頗厚身 牛味濃郁有嚼勁  牛扒外熟內軟 肉質細嫩軟腍唔粗糙 咬落肉汁豐富 而且有回甘既牛香沙律菜算新鮮 不過略嫌太單式化 如果沙律菜款式再多點口感會更好

朋友介紹，話呢間餐廳好食又抵食，就黎試一試，未夠7點，門口已經好多人排隊！呢度好得意，入座既時候就要叫定野食，所以排隊等既時候可以善用時間諗定先，餐牌就放喺門口，方便大家㨂餐！我叫左個牛扒餐，估唔到份量都唔少，肉質都夠林，點埋汁食好好味，又夠熱！朋友食黑毛豬，我試過兩啖都唔錯！

平時見呢間野都多人呀，結果有一日試下排隊，大概半小時就有位啦！我見啲人都好熟悉咁喺外面先同呀姐落單，再安排入座，我都係喺外面落左單先。本來想試個黑毛豬 點知賣晒入到去我諗都等左大概 25分鐘，阿姐話啲嘢即刻整，所以都需要時間，跟住佢上咗個湯俾我哋飲住先。我哋都係叫咗西冷牛扒，個扒都幾高質，多汁、煮到6、7成熟，由於一切開就狂食唔記得左影相另外個意粉好香蒜味、好滑身，成個餐好juicy 份量又唔少，食到好飽 好滿足！真係唔錯唔錯，下次要再早啲黎先得呀！

某個星期日約左去朋友屋企打機～朋友同我去左佢幾鐘意食既小店一試。當日中午12點左右到大埔中心後，朋友便跟我說要快點去等位，否則好多野食都無得叫😂餐廳係一個小商場裡邊，本身商場人流看似唔多..但一去到餐廳...我諗要收番我講既說話.去到已有超個二十人在等位。而我們亦在拎飛後，去了附近的夾公仔機玩左陣，可能快樂不知時間過，原來已經等左9個字，終於入座，餐廳的環境有點迫促，而招待的店員態度都不太友善（有人order賣曬既野食，竟然好大聲同佢講：你下次十一點黎食丫，包保咩野食都有），但等左咁耐，當然要試玩下朋友推介既西冷牛扒飯啦。咁大概等左3個字到，飲完個餐湯後，飯就上枱了，第一眼見到既係一份五十幾蚊既西冷牛扒飯賣相竟然可以咁靚，裝飾方面用左少少沙律菜同埋車里茄同栗米等等點綴，牛扒既size亦比我想像中大好多，咁大家都知道有時大既未必一定好食既，但呢塊扒食落竟然可以煎到外面脆脆地而裡邊嫩，食落仲幾有牛味，點埋黑椒汁同埋黃芥辣食，直頭係prefect match ，你係完全估唔到五十幾蚊可以食到咁好水準既牛扒，唔怪之得咁多人等啦。總結係雖然等左好耐，但一間咁平又咁好食既小店，的確值得推介，如果下

聽個名以為係中菜館，其實係西餐嚟㗎！食過佢嘅午餐同晚餐，同樣賣相靚，好味道，又抵食。通常去都係食牛扒，是日午餐唔想食咁飽就揀咗意粉。就咁睇你會以為唔夠汁，會唔會唔入味定好乾身。唔會囉！食落去啖啖都有醬汁，而且意粉好彈牙。配料多，唔會得三四粒貝柱。呢款午餐連湯同熱飲，盛惠五十蚊。佢地方比較細，座位較迫，志在食好嘢嘅，真係一個唔錯嘅選擇。

有某員工的服務態度極差，客人有禮貌咁問佢仲要等幾耐，佢仲要反問返個客人，仲要話「係要等咁耐架啦」叫佢幫手睇下廚房得未，佢就話「唔洗睇架啦，係咁耐架啦」全程黑面，仲用責備的態度講野，該名員工對其他員工的態度都甚惡劣，經常大聲責備其他員工。其他人遲叫打食都到齊，唯獨雞扒個餐超級慢食物等了超過35分鐘，而且牛扒太靭其他員工都態度正常，唯獨一名員工態度惡劣，我聽到隔離的客人都話呢間野好差，所以佢都唔會再黎食，要black list左佢。一個字，「差」

大埔Happy Friday-西餐之選夜晚6:00已經好多人係門外等位拎左等位票 店員會同您落左order先7:00到 餐牌上有好幾款都售罄黑毛豬 係最搶手 7:30入坐 餐湯淨最後一碗南瓜湯 味道都濃郁 唔錯點左帆立貝珍寶蠔黑松露忌廉燴飯- 好有驚喜 珍寶蠔 用芝士焗好大隻 唔腥 黑松露燴飯夠香 飯粒唔會太硬/林 天氣熱辣辣 配杯凍飲 match曬基本上7:30後都已經唔洗點等位 頭輪客人都散曬 可以慢慢食 唔驚阻住人*唔洗加一都好經濟 但好似只收cash

今天是第一次去，唔洗錢都唔會再去，感覺好似被人喝罵，樓面員工質素悪劣，大聲又無禮貌，問多兩問就企係你面前大大聲指指點點👎👎貼錢買難受，幾平都假😡食物一般，但經常呢樣冇個樣冇環境就預左係茶廳feel嫁啦結論： 不值一試👎

今日想食牛扒，平時見好多人排隊，今晚特登早小小去排隊試一試係門口有是日餐牌，樣樣都好似好吸引🤤西冷牛扒 $108Wow~~ 大大塊，啖啖肉，啱晒我依個食肉獸下面舖左脆薯角，一啲都唔Hea 蒜香芝士焗波士頓龍蝦忌廉煙肉意粉 $108隻龍蝦舖左濃濃芝士，好香好惹味，個意粉都好彈牙，側邊仲配有幾粒車厘茄仔😍仲有餐湯送，湯最緊要夠熱，所以我覺得好好飲 （送完即止），所以早到早享受最後我地加3蚊飲凍檸茶食完終於明白點解成日咁多人排隊，啲野食咁快售罄，因為依個價唔洗加一，真係手快有手慢無 不過坐得有啲迫，依到扣左小小分

上次食二輪咩都賣哂，今次醒目一早留位留左位都要大概等15-20分鐘先有位，嗌左牛仔柳配薯菜。上碟分量好多，5成熟，外熟內軟，薯菜係薯角，好脆好新鮮。偷聽到隔離枱話揀意粉，因為意粉係有汁煮過，超好味，絕對唔係普通開水煮熟，係有誠意既，下次一定要試！