大日子酒家

香港精神其中一樣一定係飲茶！早茶文化扎根香港數十年，由爺爺、嫲嫲、公公、婆婆到阿爸阿媽都會帶我去。今日同細佬2個撞啱放假興起約去飲早茶，估唔到竟然喺呢間酒樓搵到我至愛嘅灌湯餃～大日子酒家 - 主打粵菜、海鮮同懷舊點心，選擇多又超足料，仲有手推點心車，勁有童年回憶。連懷舊大包都可以喺度食得到，唔怪得好多街坊幫襯！簡直係香港早茶必打卡之選！大日子蝦餃皇必點！超大粒蝦餃！賣相晶瑩通透好吸引，仲要皮薄兼大大粒蝦肉，入口蝦肉好彈牙，仲保留傳統有4粒蝦餃(出面好多酒樓得返3粒甚至2粒蝦餃)蟹籽蒸燒賣又係大大粒，燒賣真材實料啖啖肉，唔係食落成口粉，咬開比大家睇入面真係全部肉嚟，每粒燒賣上嘅蟹籽都10粒起，唔係得幾粒點綴㗎！好正！瑤柱素翅灌湯餃點少得我至愛嘅灌湯餃～依到嘅灌湯餃係成隻餃塞滿碗，唔只係超大隻餃，入面仲超足料！啖啖肉之餘真係有原粒瑤柱㗎！仲有蟹柳、素翅，係我食過最好味號灌湯餃～香滑奶皇包每籠有3個大大奶皇包，包包非常香軟，奶皇餡超多，一咬開奶皇味十足～正！皮蛋瘦肉粥公公婆婆至愛，基本上隔一圍就見到有人嗌，大大碗2個人share食都夠，粥煲得好綿滑！千層薑汁糕中式糕點係酒樓真係買少見少，因為製作繁複、利潤低，估唔到係依到仲食到。入口好香薑汁味，千層糕軟糯感剛好，唔會太硬又唔會太軟，非常有口感～依家早市優惠9:30前結帳所有點心七五折！大家快啲嚟大日子酒家試下懷舊點心啦!大日子酒家 (大埔) 地址: 香港大埔運頭街12-18號美華大廈地舖電話: +852 26609906…查看更多

尋日特登去大埔搵間舊式茶樓飲茶鮮蝦腐皮卷  -腐皮炸得金黃脆卜卜，咬落冇油膩感入面嘅蝦肉大粒又爽彈，仲有甘筍粒增加口感叉燒腸粉  -腸粉皮夠薄夠滑，咬落煙韌，入面嘅叉燒粒粒厚肉山竹牛肉球  -牛肉味濃，咬落有肉汁，唔會嚡口鮮蝦燒賣皇  -每粒都有原隻大蝦，蝦肉爽脆，餡料飽滿，食得出新鮮鳳爪排骨飯  -鳳爪炆到軟腍，一啜就脱骨，排骨肉嫩冇渣蛋黃蓮蓉壽桃包  -外形做得似足壽桃，好有儀式感包皮鬆軟綿密鹹香嘅蛋黃同蓮蓉好夾，唔會太甜膩…查看更多

地方窄，要行樓梯都不是大問題。始終附近無其他點心專門店或酒樓嘛。事實上見大部分女伺應和送點心啲亞姐都ok嘅，甚至有些對顧客都好有禮貌𠻹。可惜有個約40歲嘅女伺應，就口多口衰，講嘢串串貢，態度惡劣，同枱的顧客都話忍佢就算。見佢有被同事話，佢仲大大聲話自己已經做唔停手喎。老細請著呢啲人真係多得佢唔少啦。我就唔敢再幫襯啦。…查看更多

【大埔味道】十年守護的溫暖滋味：大日子酒家——35年師傅的匠心與人情在大埔這個社區，總有一些食肆，不單是填飽肚子的地方，更是承載著街坊回憶的溫暖角落。「大日子酒家」正是這樣的存在。轉眼間，它已在大埔紮根十年，成為無數家庭聚餐、老友記飲茶、節日慶祝的「大日子」見證者。今晚再訪，不僅是為了品嚐佳餚，更像是一次溫馨的探訪。推開門，熟悉的熱鬧氣氛撲面而來。伙計們臉上掛著親切的笑容，一聲「好耐冇見，今日想食啲咩？」瞬間拉近了距離。這裡的服務，是那種久違的、充滿人情味的主動。他們記得熟客的偏好，會細心介紹時令菜式，那種不經意的關懷，讓整頓飯昇華為一種享受。這裡的靈魂，是背後那位擁有多年功架的總廚。他將大半生的廚藝心血，都傾注在每一道菜之中，那份「匠心傳承」的堅持，在舌尖上能清晰地品嚐得到。🥢 文昌雞手撕撈起這不僅是一道菜，更是一個好意頭。夥計一邊幫我們「撈起」，一邊說著吉祥話，笑聲滿堂。雞肉撕得幼細，皮爽肉滑，與各種酸薑、甜醬、脆絲拌勻，入口層次豐富，清爽開胃。這份儀式感，為晚餐拉開了歡樂的序幕。🥢 百香果黑毛豬叉燒腩這道菜盡顯師傅的創意與功力。選用上乘的黑毛豬，肥瘦勻稱，外層烤得焦香帶蜜。最畫龍點睛的是那百香果醬汁，果酸的清新完美中和了叉燒的豐腴，酸甜交織，令人胃口大開，一點也不覺膩滯，是傳統與創新的精彩碰撞。🥢 湛江砂礓豬大腸這是一道考驗功夫的傳統菜。豬大腸處理得極其乾淨，毫無異味，經過砂鍋燜煮，口感軟糯中帶有嚼勁，盡吸了醬汁與砂礅的特殊香氣。每一口都是濃郁的鑊氣與懷舊的風味，是老師傅才有的手藝。🥢 蒜蓉蒸班頭腩吃得出食材的新鮮。班頭腩肉質厚實雪白，簡單以蒜蓉和豉油清蒸，火候拿捏得恰到好處，魚肉剛熟，嫩滑無比。蒜蓉的辛香提鮮而不搶戲，將魚肉的鮮甜完全帶了出來，是大道至簡的美味。🥢 麻蓉煎堆仔作為完美句點，這道甜品令人心滿意足。煎堆仔小巧玲瓏，外皮香脆，咬開是熱騰騰、流沙般的麻蓉餡，香氣四溢。甜度適中，為這頓豐盛的晚餐寫下甜蜜的終章。一頓飯下來，滿足的不只是腸胃，還有心靈。在這裡，你吃的不只是廚師的手藝，更是一份對社區的十年堅守。感謝「大日子酒家」，用一流的服務和三十五年的匠心，守護著大埔這份獨特而溫暖的人情味。下一個十年，我們依然會是這裡的常客…查看更多

大日子係一間傳統酒家，多街坊熟客幫襯，感覺很舊式，裝修也舊，最差係要行樓梯，對老人不友善。但幫襯過後，這𥚃就成為我在大埔最愛的飲茶地點，每星期都會幫襯。這酒家比我的感覺係傳統師傅，老老實實地做點心，隨意叫的點心都會有驚喜。服務員服務到位，餐具清潔，洗手間衛生也合格。雖然只係中低檔酒家，也可選搭枱或不搭枱，只需茶錢多一點。最愛的點心有炒米粉，潮州粉果，炸雲吞，我媽最愛麻蓉包。現在找間這樣有誠意做點心的真不多。…查看更多

中秋正日同屋企人喺大日子食飯好彩一早book咗位 全場爆滿 魚湯泡飯超好食 仲有乳豬，鹽燒鮑魚拼荔芋卷 另外燒雞都好食最推介係紅棗糕 雖然最尾食到好飽但係都食咗兩件 仲打包左返屋企 真係超級好食😋…查看更多

下午同屋企人去咗街市買海鮮提早做節，拎去大日子加工，叫咗幾碟撚手小菜，老人家都啱食😌😌味道唔太濃，特別推薦魚湯泡飯同埋蓉煎堆仔🥹都係啲少見嘅地道菜式❤️海鮮加工費價錢相宜，會再嚟幫襯…查看更多

身為大埔區歷史悠久的老牌酒樓，「大埔大日子」已經屹立超過三十年，今次我親自去幫大家試試佢嘅功架！果然無令人失望，仲有唔少驚喜。全晚最出色必定係道 「川椒蒸魚」 ！師傅刀功了得，每件魚都切得骨肉均勻，入口非常方便。最讚係佢嘅調味，川椒香氣突出，但辣椒份量拿捏得剛好，唔會死辣，反而帶出魚嘅鮮甜。肉質嫩滑到不得了，食落個口感居然有幾分似食緊花膠咁矜貴，連平時唔係好食魚嘅我都忍唔住食咗好多件！另一個超級好食嘅係 「芋頭帶子」 。睇外表真係好普通，冇乜賣相，但一食落口——哇！口感超級豐富，帶子鮮味十足，彈牙得來又唔會韌，絕對係「禾稈冚珍珠」嘅隱藏美食！驚喜推薦！ 佢哋嘅 「無花果叉燒」 真係超級特別，完全冇諗過無花果同叉燒可以咁夾！豬肉食落酸甜入味，味道層次比傳統叉燒更豐富，而且一點都唔膩，令人食過返尋味。另外一道 「炆大腸」 亦係功夫之作，大腸炆得極度入味，但最難得係口感依然保持非常之脆口，完全冇韌勁，值得一試。仲有一味印象深刻嘅就係佢嘅 「泡飯」 。個泡飯本身已經好有趣，自己加上少少辣同大量胡椒粉，味道即刻提升到另一個層次，暖胃又惹味，真係一絕！最抵讚係，食咁多款好嘢，人均消費$200都唔使，性價比極高！最近佢哋仲順應季節，推出咗 「醬油大閘蟹」，睇落相當吸引，絕對係我下次再訪嘅目標！總結： 如果想喺大埔搵間抵食、有水準又有歷史嘅酒樓，「大埔大日子」絕對係一個穩陣又充滿驚喜嘅選擇！…查看更多

如果食完九記牛腩畀人鬧唔夠 黑面唔夠 可以試下呢一間飲早茶 門口知客黑口黑面 問一句趷你十句 鍾意自虐嘅朋友快啲嚟幫襯 食貓麵都食飽你呀 大埔區最出色酒樓之一不二之選 值得一試…查看更多

週末，間唔中都會同屋企人去飲茶。而這一次，我們一家就黎左大埔，來到我成長，渡過整個童年的大埔墟。而在大埔墟說飲茶，的確有少少慨嘆，因為昔日的出名酒樓，已經不只是換名字那麼簡單了，當年飲茶的場地，早已經變成了小商場，及現在所謂的 "死場"。而《大日子》算是一個承接著街市 / 球場 對面的大酒樓，一直至搬到現址 (北京桌球城樓下)，延續大埔的大酒樓故事。以前，就算大埔墟只剩《大日子》這一間酒樓，星期六、日，一定要排好耐隊，等好耐才有位飲茶。如今，可能大部份人都北上消費了。我們直接上來，不用等，已經安排到一張6人檯。可以開心地飲茶。我們一打開點心紙，就一口氣剔晒大家想吃的點心了。因為現在流行即叫即蒸，所以，好多時都是炒粉麵先來。而先來的，是一碟肉絲炒河。濕炒，就是把肉絲淋在河粉上，讓河粉沾滿汁，沾滿肉。口感，味道，老少咸宜。同親我老豆飲茶，如沒有排骨飯，(當然點心紙上有粥可選)，佢一定會叫碗皮蛋瘦肉粥。這兒始終不是粥品既專門店，質素一定不是最好。可見得，這一個粥比較水汪汪，質感就真的不太歡喜了。但，味道倒算是不錯的。腸粉用上了這樣的長條形碟，感覺就是變相減份量。因為，我不相信這就是傳統的三條腸粉既 size。若不計較這個，這一份叉燒腸絕對是好食的。是一份皮薄餡靚的廣式腸粉。咖喱魷魚，正確一點，是咖喱土魷。微微地辣，有香香的咖喱味，再因為是製過的土魷，口感超爽的。鳳爪，一看就知道是份量大足之作。味道當然是既淋又香又入味啦。喜歡食腳趾的我，十分滿意。老人家容易食的，有這一個棉花雞。這一個版本，有冬菇，魚肚，蟹柳條同雞肉，稱得上是足料，而且吃入口，是濃濃的雞肉香及雞湯香，雖然知道是雞粉的功力，但有這好味道，也算是好。我，算是一名腳膠，喜歡食鳳爪之餘，更喜歡的，是鴨腳扎。鴨腳的皮，比起鳳爪更爽，扎內的肉同芋頭也是十分可口。當然，又大隻，又爽爽口的鴨腳，是我的最愛。另一個老少咸宜，又可以說是人見人愛的點心，就是燒賣啦。這是鮮蝦加蝦子的燒賣，入口，絕對是是鮮甜美味。叉燒包，是人人最愛的叉燒包。內餡香甜而且有粒粒有口感的叉燒。夠醬，夠叉燒，外層的包子亦夠甜，再加上叉燒包爆開得好完美，又是不錯的出品。最後是甜點了，而我們點的唯一甜點，是流沙奶皇包。有濃濃的奶油香，有令奶皇包升華同令奶皇包保持流沙的咸蛋香。總括一說，這也是令人滿意的包子啊。不錯的一間酒樓，服務上，一般啦，可能真係人手短缺。但在食物上，尤其是點心上，的確做到有水準。下次來大埔飲茶，我都係會首選《大日子》。…查看更多

服務一向一般但勝在經濟和地点近，上2星期早茶，点心等了半小時有多，叫待應幫手睇睇，眼見爱理不理，根本沒有跟進，於是再次要求幫手睇睇，竟然大大声鬧人，点心是要時間蒸的便走開，我沒有再直接去柜台投訴和结賬。…查看更多

入咗嘅時候佢問搭唔搭枱，我哋話可以，但明明好多吉枱，但係都要搭枱。上到去張枱係完全冇執過，仲有上一手啲碗碟留低，等咗差唔多成10分鐘都冇人執,又冇人問有咩茶，要主動申請坐後邊已經執過既枱，同埋服務員嘅態度十分之差，個個都黑口黑面好似得罪佢全家咁，放碗碟係用掉既方法。食物質素不過不失，但係啲碗碟茶壺真係好污糟，見到都唔開胃，可一不可再！…查看更多

一向我都麻麻地飲茶因為好多酒樓嘅味道同以前就好大分別加上我鍾意嘅麻蓉包，基本上好似絕種咁但係冇意中俾我發現，大埔呢間酒樓有麻蓉包食，我就決定嚟食啦食物 4/5點心 麻蓉包♥️5/5細個嫲嫲爺爺成日帶我去飲茶第一次叫我食呢個包，已經心心愛上到大個咗，好多地方都冇得食即使其他地方有，味道都唔係好正宗但大日子就最接近細個味道首先餡料係金黃色（因為有唔少係用黑芝麻），唔苦，有少少芝麻嘅口感甜度適中。同埋當佢拎過嚟時，見到上面有粒紅點，就感覺到係以前嘅做法，因為好多都冇呢一粒紅點😅沙律明蝦角 4/5好夠脆，入面仲好足料不過好得意，有兩舊係有兩隻蝦，另外兩舊得一隻蝦，不過都好好食🤤煎蝦米腸粉 3.5/5煎得唔錯其餘點心鮮竹卷 3/5味道可以，夠大舊燒賣 4/5大大粒燒賣，唔係連鎖式放隻蝦係上面嘅燒賣😋燒鴨河 4/5下午茶只係19.8，真心抵，燒鴨又好食茶4.5/5我叫咗普洱比出邊嘅酒樓呢度嘅茶底較為出色環境 4/5環境衛生都係正正常常唔可以同連鎖式嘅大酒樓去比較但坐落都係幾舒服嘅唯一唔好就係要行樓梯上嚟，冇𨋢如果年長啲嘅公公婆婆就未必適合服務 3/5服務正正常常，不過食咗一兩次都有遲上嘅問題但追一追都好快比到我哋總括而言，整體都好唔錯，尤其如果鍾意食麻蓉包嘅各位，一定要嚟呢度試吓。如果唔係話鍾意食麻蓉包，其他點心都一定唔會令你失望…查看更多

居於美國的舅公回鄉探望親人，途經香港作短暫停留。今晚家人特地安排於大埔的飯堂(大日子) 同舅公食晚飯。6人的晚飯，但都叫咗唔少的小菜。薑葱蠔 - 蠔夠鮮味。薑葱蟹 - 蟹好新鮮，炒得惹味。蒜蓉蒸扇貝 - 如果多啲粉絲會更好，扇貝未算好大隻，不過都係好新鮮。沙巴 - 烹調時間掌握得好，鮮嫩好味。花生苗 - 今次相對較為辣，唔係個個食到。鴛鴦炒飯 - 大家都滿意，清晒乳豬半隻 - 皮脆肉嫩，我食咗3大舊。片皮鴨 - 皮脆之餘，鴨肉的口感亦一流。整體食物及服務都令人滿意。…查看更多

今日年初四💮同屋企人去完慈山寺就落返大埔飲茶，見到呢間酒樓，就決定飲佢啦！😆新年又係公眾假期 都預左要等位。見到💁🏻短髮知客好忙，又要接電話📞又要安排位置，我見到佢講緊電話，做左個手勢表示6人想攞飛，佢無理我，咁我就都等佢講埋先啦，點知一收線，佢就好大聲好嫌棄咁😠望住我講「你等陣先啦」咁我都理解嘅，紅日係忙啲，等左一陣佢俾咗張飛我，C31 ，我望一望螢光幕C24，即係等7張枱，都唔錯丫！咁我就行出去門外等。等左大約20分鐘，我行入去睇下螢光幕叫到幾多號，一望😳C21 ????? 點解？我行去問下，但短髮知客就似有還無咁講左d野，但又無答到我，總之就叫我等下。後來，又等左大約20分鐘，我見螢光幕叫飛叫到C29。滿心歡喜就到我哋啦！但點知隔離一對夫婦話C27知客拎左佢張飛都無俾枱佢，喺度空等😑 話個知客亂俾位，有人派利是🧧個知客就俾位佢先。忽然之間，呢個時候，知客叫A33飛，就安排左兩個人入去，但此時螢光幕係顯示為A31 ，一位女士就問點解佢A32都未安排位置，就安排俾A33，但明明屏幕顯示又未到A33，而家從未有人叫A32。短髮知客解釋唔到，就發爛渣😡大聲喝個女士話「你唔明，你可能miss左，你知唔知紅日返工我哋服務業好辛苦」女士好有禮貌地回應，我唔係想同你嘈交，如果你安排上有錯誤，唔緊要，你下張補返俾我。呢個時候C29個對夫婦都忍唔住開聲，佢安排不當，隨個人喜好去安排位置，熟客就入先，生客就等下。 我喺呢個時候都問，咁其實係點安排。之後佢唔想理我哋，就話你哋上去啦上去啦。上到茶樓，非常逼夾，枱與枱之間係無乜空間，侍應俾左新碗筷俾我哋！實在係太出色，十分之污糟，有污跡，有食物殘渣，非常嘔心。但由於好少嚟呢區，又等左50分鐘，老人家已經非常肚餓，所以都照食。呢張紙係黐實咗喺隻碗入面。茶壺污糟都算啦。。。呢隻碟上面係有污跡，係摸得到睇得到，又油又凸出來，真係好嘔心🤮食物出得好快，但質素同味道都係有史以來最差。蝦餃點解未食就爛，爆哂皮？問侍應有冇辣椒醬，俾左一碟仔我哋！我用嚟點左蝦餃Oh My F***ing God!! 又辣又酸又澀，再三同家人確認，係壞左！咁都可以俾客食？仲有牛肚係臭架，太激氣無影到相。一係就無洗乾淨，一係就係壞，放咗入口都要嘔返出嚟。最後，總結: 環境 6 / 10服務 3/ 10食物 4 / 10價錢 5 / 10 另外想特別為短髮知客打個0分。估唔到Open Rice 有兩篇食評都係為你而打。…查看更多