大家樂 (電訊一代廣場)

營業中

休息中

每次食一定要點經典早晨全餐熱奶茶茶香濃郁，奶滑比例恰到好處，入口溫潤醒神。炒蛋金黃嫩滑，搭配的香腸煎得外脆內多汁，整體調味適中不油膩。烘多士外皮微脆，內裡鬆軟，塗上牛油食係絕配！通心粉湯頭清淡，適合晨間暖胃。環境整潔，服務效率高，短短五分鐘餐點即齊備。以連鎖快餐而言，性價比高，為上班族提供了快捷而滿足的選擇，所以每日早晨時間都一定好多人！

位於觀塘的大家樂早餐選擇穩定，這次試的是雞扒+煎蛋+多士。雞扒煎至微焦，肉質尚算嫩滑，醃料偏甜，味道不算濃烈但自然順口。煎蛋火候適中，蛋邊微脆，配搭牛油多士一同享用，口感豐富。整體味道簡單但有飽足感，是一款日常可選的港式早餐。環境：分店整潔，座位安排合理，早上人流多但流轉快。 價格：屬親民價位，配熱飲更抵食。 食物質素：雞扒醃得入味，煎蛋香口，多士略乾但尚可接受。 食物種類：早餐選擇多樣，粉麵、粥品、三文治等均有供應。如果你鍾意港式扒蛋多士的組合，這款早餐值得一試。

今朝返工買早餐嗰陣見到有張相寫住鐵板二人餐$149👀於是收工就即刻去試試佢。喺香港就算食茶餐廳晚餐閒閒哋都六七十蚊一個人，而家除返開70幾蚊就有一個主菜，一個酥皮湯，飲品同蛋撻，其實都真係幾抵。🐂🐖🐓主菜可以揀牛扒/豬+雞。我哋兩樣都叫做各一份。我對佢冇任何期望，畢竟佢只係快餐店。食落口唔係話真係好好食，過得去，絕對對得住呢個價錢。🍲酥皮湯 平時最少都要加$20先有酥皮湯，所以呢個湯都算值回票價。入面係蘑菇湯，稀稀地但係入口味道好濃郁。大家樂我相信每個香港人都有食過，所以質素係點我唔多講。但係呢個價錢能夠食多咁豐盛嘅晚餐，糧尾既時候都不妨考慮下😌

是日係年二十九晚上，天氣凍凍地，但唔算好肚餓，左睇右睇餐牌，睇吓有啱食嘅嘢，見到雜扒配炒飯$67，有湯又有熱飲好低食，一於試吓：🥩豬扒、雞扒、爆醬腸配炒飯豬扒份量都幾大塊，肉質不過不失；雞扒就細塊少少，但好味過豬扒；爆醬腸都可以，脆皮。黑椒汁與洋蔥汁之間選擇了洋蔥汁，好可惜這不是汁，係醬，汁太稠。羅宋湯唔差。炒飯份量可以多返啲就最好。以往大時大節都會慶祝一翻，今年開始大不同，要慢慢習慣和接受。有時簡簡單單一餐都可以好滿足。

觀塘成業街的大家樂，一直是打工仔的午市和下午茶好去處。這天點了鼓油雞髀配鼓油王炒麵，單是看著那油光發亮的麵條，已教人食慾大振。麵條彈牙有嚼勁，每一根都裹著濃郁的鼓油香氣，與爽脆的芽菜完美融合。蔥蒜的點綴不僅增添層次，更為整碟麵帶來提神醒腦的香氣。雞髀份量十足，皮爽肉嫩，醃製入味。鼓油的香氣滲透雞肉每一個纖維，咬下去汁香四溢，與炒麵的味道相得益彰。配上一杯熱檸檬水，既解膩又開胃，讓整頓餐變得更為平衡。三十七元的價格，在現今通脹下實在相當抵食。這樣一個份量十足的下午茶組合，不單能填飽肚子，更能滿足味蕾。難怪即使在非繁忙時段，店內仍座無虛席，足見這傳統老牌連鎖快餐魅力依舊。

承接我嬲 🐷 買唔到一歌燒味飯。轉頭是但㨂大家樂燒味飯 🤦好鬼曳，價錢望落就唔貴嘅，大概50蚊有交易。份量似下午茶，飯質唔靚（好過大樊活少少嘅 😂）燒味又唏噓細舊細舊咁 🤷‍♂️。查實我唔多買燒味飯，唔知快餐店嘅燒味飯可以差成咁 🤦。返工放飯，我唔多想買半隻燒味加個白飯咁誇張囉！總之似樣嘅肉就收埋唔放出黎做客飯？！完全諗唔明咩邏輯，做得咁差，cut 咗燒味客飯啦。淨係賣例牌加白飯，價錢又可以提升，出餐又好睇 😏

7月1日見大家樂有$99冬瓜盅二人套餐呢個限定優惠，鍾意食冬瓜盅嘅我哋梗係立即去幫襯啦，點知失望！以前年年都食冬瓜盅，今次失曬水準，湯一啖鹹一啖淡，裏面一粒粒夜香花同瓜粒有渣，味道有啲怪怪，搞到我飲幾啖都唔想飲落去啦🙅🏻‍♀️二人套餐可點兩款小菜，加送一碟馳名叉燒，二大碗飯，份量適中，粟米斑塊味道正常，都仲有三四塊大大塊魚肉，另外一款四季豆炒肉片就麻麻哋啦，肉片份量好少！叉燒不過不失啦，算係成個餐最好味！

好耐冇去 大家樂食嘢，唔知道原來而家有咁靚嘅兒童餐😲嗰燒車餐盤真係一絕🚗 #男以抗拒價錢仲十分抵 $28 有齊主菜，粟米粒🌽腸仔薯角，啫喱同果汁🧃主菜兩款選擇：蕃茄肉醬意粉 / 呢個粟米飯不過可能新推出，居然供不應求，餐盤唔夠用‍🤷🏻‍♀️要等之前嘅客食完，即收即洗先有🙈我哋等咗20分鐘左右先有😂兩個小表姊直情等咗半小時都無，轉普通盤上😅希望遲吓會改善到，我再帶佢哋去啦⋯#快餐店都有靚靚兒童餐 #車車餐盤

大家樂係我細個時就鍾意食嘅快餐店，最愛就係佢嘅招牌焗豬扒飯啦！今日同男朋友去觀塘睇戲之前就去食返個回憶中嘅美食。個豬扒炸得香脆，肉汁豐富，蕃茄汁又唔會太酸，好開胃。飯又夠熱夠香，每一啖都好滿足。不過我覺得佢嘅分量同質素都退步咗，可能係物價上升嘅關係。不過都唔減我對佢嘅愛啦！我仲記得細個時同屋企人去食，每次都要爭先恐後咁食，因為怕食唔到最後一啖。而家長大咗，雖然唔會再咁搶食，但每次食到都會感受到溫暖同幸福。呢個焗豬扒飯真係我嘅至愛！

芋香南瓜炆雞翼？炆雞翼？Are u kidding me? 南瓜2粒，芋頭3粒，炸雞翼4隻，放埋一齊淋啲芋蓉上面好意思叫炆雞翼🙄你扮韓式咁叫芋蓉炸雞翼我無咁嬲，另外中湯今次鹹左啲。

放LUNCH時間，唔知食咩好就黎左大家樂食飯，選擇左個雞扒飯咁啦。呢個飯正正常常啦，但係以LUNCH黎講，性價比(CP值)都算高。個餐都係$HKD55，加埋餐飲都唔洗超過$HKD60，以今時今日黎講已經叫好抵食架啦。首先講個雞扒先，外層既皮都煎得幾香脆，而個雞扒既份量都大足夠你送飯。仲有個汁都幾配雞扒，而且汁量都多，足夠撈埋D飯。反而飯量比較多，如果對一般OFFICE打工仔真係未必食得哂，建議大家可以選擇少飯，唔好浪費。

話說每個星期返工總有一日會口痕想飲“茶走”，所以個個星期都會叫大家樂食。咁啱公司樓下就有一間，所以真係好方便！🤣我多數都會叫一哥焗豬扒飯食，最鍾意佢嘅炒飯底，粒粒分明金黃色嘅蛋飯，同埋厚切嘅焗豬扒，最最最最鍾意佢嘅蔬菜番茄汁撈飯😍食咗咁多年都係咁好食👍🏻總有一間係左近，有時我覺得都係食緊香港人情味，食緊童年回憶，唔知你又認唔認同呢？

大家樂相信無一個香港人無聽過大家樂, 而大部分人都應該有食過. 大家樂都出品唔少名物. 例如厚切焗豬扒飯,芝士肉醬意大利面…..大家樂咁多人食其中一個原因好大機會係佢夠平!!就算係晚市, 大部分飯餐都只係$50有找仲包野飲. 糧尾恩物.身為打工仔既我都食唔少, 今日早左少少起身, 就去左食佢地既早餐.簡左個雞扒炒蛋套加$7要多左個雪菜肉絲米.雞扒配上洋蔥汁好好食, 雞扒好嫩仲要好多汁. 面包都烤到脆身附上牛油一齊食, 絕配.炒蛋應該落左牛奶炒, 有微微牛奶香, 但唔會無曬蛋味, 炒得剛剛好.雪菜肉絲米好大碗, 都只係加$7好抵, 我一個女仔都唔係好食得曬全部野食.下次都係唔好眼寬肚窄,哈哈. 大家身邊實有間大家樂係附近, 又平又方便, 食物質數對得住佢價錢, 超曬班.

身為一個打公仔 有邊個係未試過「大家樂」？😂😂😂😂👍如果遊客想試下香港🇭🇰既快餐 想試試香港🇭🇰口味既奶茶☕️或者咖啡☕️ 又想用大眾價錢🤑🤑🤑🤑食個廣東燒味叉燒飯 大家樂可以話係普通大眾頭幾位既選擇 都可以話算係價錢合理之選最好食既都莫過於係「焗豬扒飯」，同埋晚市果個一人火鍋 焗豬扒飯既蕃茄味岩岩好 唔會搶左個炒飯底既蛋香 亦唔會蓋過豬扒原有既肉味👍🏻不過 尤其是係午市 就會特別多人啦😂😂😂

有用開電子支付 會覺得 真心忯食無就會覺得真心 貴菜式 對比其他 同類型 算中上，有新意。味道可以， 價錢有平有貴，試過捱 足1，2個月就係為左月尾有錢剩。今日叫左個土匪雞翼瓜粒湯飯包熱飲$49，用左樂賞錢就$44 。有湯有飯有餸有熱飲，忯食唔HEA。最近有政府消費券 物價反而貴左好多 感覺除非不斷買現金劵 使未來錢。講番個飯先～ 都幾多餸；2隻土匪雞翼，2件鵝，超細件魚柳（好食但少），有海鮮瓜粒湯。因為外賣，自己將所有野放番埋一齊就完成，仲有杯熱飲。成個餐＄44（減＄5樂賞錢）包埋熱飲真心忯，單身人仕／后生仔～理想餐囉。因為香港地物價真係好高。但建議大家如果想食 記得早少少排隊買，事關觀塘食飯 都係1件逼到懷疑人生架事。所以我都明白前線人員難捱。事關排隊排到出門口，得1位收銀，而政府消費券 自助收費唔知點減 但樂賞錢 識網站彈出 問減唔減。睇住大家樂啲職員1個個走 特別係收銀 其實都覺得雖然 飲食業係搵錢 但都係辛苦錢 並不是一位食客簡單的事。吋金呎土。