難得有風假，落波後就去荷里活廣場行下，順便一試好多人都讚好，入選咗《2024 2025米芝蓮指南》嘅《台蔡滷肉飯》。佢嘅菜式唔算話好多，我聽過最多人讚嘅係「花雕麻油雞湯套餐」所以我哋點咗呢一個餐，再加兩款小食。套餐包括「花雕麻油雞湯」同「小碗滷肉飯」，飲品另外收費。「花雕麻油雞湯」嘅味道都有帶少少藥膳嘅味道，同時帶有花雕酒同麻油嘅香味，湯味非常濃郁，完全係台北嘅風味。另外套餐嘅「小碗滷肉飯」，豬腩肉肥瘦均勻，而且切得大小均一，肉醃得非常入味，好香好Juicy，米飯亦有咬口，撈埋個滷肉一齊就啱啱好。原本諗住係點兩個餐，但我哋又唔想一人一個滷肉飯，所以另外叫兩個小食好似仲化算。我地點咗店家表示香港第一嘅「九層塔鹽酥雞」，外皮鬆脆，雞肉十分鮮嫩，而且好Juicy唔乾，鹹香味濃郁，就好似去咗台北嘅夜市啲鹽酥雞嘅味道，我諗佢係我暫時食過唯一一間完全係台灣味道嘅炸雞，唔怪得佢咁有自信話自己係香港第一👍🏼。另一個小食係「肉鬆起司蛋餅」，响香港就冇食過，我去台灣時就不時都會食。佢個蛋餅好出色，蛋味濃郁，配合芝士同肉鬆，再加上面層嘅醬油，真係好邪惡，而且份量都唔少，只係$40蚊非常抵食。餐飲我點咗「柳橙茉莉綠茶」，加多15蚊，好過有嘢飲。店內有提供熱水，係自助式自己出去斟水。《台蔡滷肉飯》都幾另外大開眼界嘅一間台式餐廳，佢完全將台灣嘅味道帶到香港，特別係佢個「花雕麻油雞湯」，我曾經响台北一個夜巿食過係麻麻地，呢個湯係我想要嘅味道，我諗佢個「藥膳排骨湯」會更加不得了。佢最正嘅係冇加一服務費，响香港嘅餐廳係比較少有。…Read More
