你印象中嘅黎巴嫩菜係點? 將軍澳海傍呢間黎巴嫩餐廳“Maison Beirut”，就將黎巴嫩菜變得相當精緻，甚至有專人推出餐車喺你面前完成招牌菜式。
“Maison Beirut”可以飽覽將軍澳海傍迷人景色，店內則掛滿馬賽克燈充滿異國氣氛。最近秋冬好啱坐喺寬敞戶外座位，靜靜地享受寧靜海岸風景，同時沉醉於正宗黎巴嫩料理之中。
店內裝潢充滿異國氣氛。
最近秋冬選坐戶外座位，可以靜靜地享受寧靜海岸風景。
(左)主理人Imran Khaleel、(右)埃及總廚Maged Makram
二人一同呈現黎巴嫩風味料理。
招牌慢煮羊腿陶鍋(Lamb Shank Claypot)$268
想體驗Fine Dining一定要揀呢道招牌陶鍋料理，由專人推出餐車即席切開新鮮出爐嘅香焗慢煮羊腿，一切開麵包即刻聞到好香啦!!
呢種黎巴嫩常見嘅陶製Claypot可以均勻傳熱，焗製時將羊腿、香料鮮味都鎖喺鍋中，所以一切開即刻香味爆發。羊腿更事先慢煮煙燻，飯粒更吸滿羊肉味。剩係食啖飯都好有肉味啊，加埋酥香麵包一齊食好正。
專人推出餐車，即席切開新鮮出爐嘅香焗慢煮羊腿。
陶製Claypot鎖住鮮味，一切開麵包即刻香味爆發。
羊腿事先慢煮煙燻，飯粒都吸滿羊肉味。
羊肉他他(Kibbeh Nayyeh)$198
平時都係食牛肉他他，真係第一次食羊肉他他啊。肉味比牛肉更濃郁，羊肉粒再撈入酸瓜、醬汁嘅味道幾豐富，配脆片一齊食好開胃。
最特別係跟配埋烤骨髓，天然油脂好醇厚。骨髓糖分更會烤到焦糖化，所以油脂奶香略帶甜味，單食或配羊他他食都好有風味。
平時好少食到羊肉他他，好啱配脆片食。
烤骨髓成另一亮點，天然油脂好醇厚。
布拉塔沙律(Burrata Salad)$178
食咗咁多肉，中間食啲蔬菜解吓膩先。每次戳開布拉塔芝士都好療癒啊，因為佢由水牛芝士同忌廉混合而成，戳開會有種流心效果，奶香滿溢。沙律混合咗多種番茄，加埋香甜石榴撞出酸酸甜甜味道。
戳開布拉塔芝士有流心效果，奶香滿溢。
烤茄子法特(Makdous Fatteh)$168
其實黎巴嫩有好多茄子料理，呢道經典Fatteh將茄子配搭酸乳酪、蒜蓉、松子，做出一種綿密溫和口感，撈飯一流。
茄子配搭酸乳酪、蒜蓉、松子，絕對係佐飯神物。
【經典旋轉烤肉】
中東街頭好受歡迎嘅沙威碼，就係大家熟悉嘅旋轉烤肉啦!! 烤肉會用香料醃製，再放上旋轉架烤到外層酥脆；內裡又好有肉汁。今次有雞肉或牛肉揀，可以跟配薯條或黎巴嫩飯㗎。
雞肉沙威瑪(Chicken Shawarma)$178
牛肉沙威瑪 (Beef Shawarma)$188
羊肉漢堡(Lamb Kofta Burger)$188
Kofta係好出名嘅黎巴嫩菜，當地人會將絞肉搓成肉丸或長條狀都有。“Maison Beirut”黎巴嫩老闆就將羊肉Kofta壓成漢堡扒，配埋太陽蛋漿真係好滿足啊。
黎巴嫩經典Kofta進化成漢堡包，一定要戳開太陽蛋蛋漿一齊食啊。
【爆滿海鮮意粉】
同場加映2款海鮮意粉，海鮮份量真係爆多!! 大蝦、蜆肉、魷魚等，鮮甜海鮮充滿地中海風味，可以揀配白汁或番茄汁。
白汁海鮮意粉
番茄汁海鮮意粉
【招牌雞尾酒】
“Maison Beirut”有個大海景，喺度望吓海、飲杯酒真係好chill，駐場調酒師設計嘅雞尾酒都好唯美啊。
Weekend at Bernies
以新鮮泰式羅勒葉注入清新香氣，加入富酸甜果香嘅百香果，增添層次。後續滲出注入茶香嘅波旁威士忌，結合溫潤茶葉同醇厚酒精。富熱帶風情嘅椰子Rum酒，令整體口感更柔和。
清新泰式羅勒同百香果嘅絕妙融合。
The Florist
融合多種迷人風味，先有新鮮石榴、香甜荔枝豐富果香；配以玫瑰花瓣增添優雅香味。而倫敦Dry Gin、柑橘酸香撞出明亮層次感。最後會有淡淡豆蔻苦味酒嘅微妙香氣，味覺更立體又有種神秘感。
果香和玫瑰花瓣交織層次感。
Gossip
新鮮漿果有陣微酸果香，配上榛子嘅堅果風味增添圓潤口感。酒味嚟自自製無花果Gin酒，果味同苦味酒形成微妙平衡，賦予獨特層次，湯力水更有清爽泡沫後勁。
新鮮漿果結合堅果風味。
Gatsby
如果你鍾意莓香，一定會鍾意呢杯融合新鮮黑莓、紅桑子嘅雞尾酒。加上薄荷茶增添涼意，並以波本威士忌、黑加侖子酒帶嚟富深度同複雜性嘅酒香。
酒香富深度同複雜性。
Casablanca
瀰漫仙氣嘅蘋果木煙燻雞尾酒，以香料Rum酒、杏仁酒、士多啤梨、柑橘等調製而成。杏仁酒嘅堅果香味，亦同兩款水果形成鮮明對比，相當有層次。
蘋果木煙燻雞尾酒，融合香料Rum同杏仁酒。
Maison Beirut
地址: 將軍澳唐賢街29號藍塘傲格林威治村地下10號舖
電話: 23210368