“Mamaday”嘅玩味裝潢、創意料理一向出名，最近仲涉獵埋音樂界𠻹!! 銅鑼灣分店“Wish You A Mamaday”同音樂社交平台“VSing”合作，全新舞台裝潢好有feel。只要嚟食嘢並下載“VSing” Apps，任何人都可以喺高級配置舞台點歌獻唱。觀眾仲可以即場畀分，高達指定分數即有真·煙花、噴煙效果，好似開緊演唱會咁澎拜呀!! 呢度仲會不時舉行歌唱比賽，記住留意“Wish You A Mamaday”最新動向，約埋好歌之人一齊嚟食嘢睇show。
全新menu以一系列嘅玩味fusion菜為主打，包括刺身級嘅焗法國生蠔、藍莓忌廉芝士Pizza、海鮮豪華拼盤、炸日本河蝦等。全用高質食材，又大玩新穎配搭，就算望落簡單嘅牛扒都好有驚喜!!
【唔乾嘅乾式熟成】英國熟成28天西冷牛扒
新店繼續引入牛扒界天花板—乾式熟成牛扒Dry-aged Beef。頂級西冷會靜置喺恆溫0至3°C同85%濕度嘅熟成櫃中，並於紫外線殺菌器下經28日乾式處理。牛肉天然酵素會自行分解牛肉蛋白質、脂肪同埋碳水化合物，鎖住牛肉水分令肉質更嫩滑、牛味特濃，油花仲特別豐腴㗎。
乾式熟成牛扒Dry-aged Beef絕對唔乾，肉味特濃又軟嫩。
麻麻哋 三小點 ($88)
唔好畀個名呃咗啊～呢3款前菜小點一啲都唔麻麻哋(笑)。小食包括經3小時慢煮嘅檸檬柚子磯煮鮑魚、鮮甜日本料理青檸蜂蜜帶子刺身同鹹香明太子松葉蟹肉多士。一道菜食勻多款高質海產好滿足！
法國鵪鶉避風塘香辣炒飯 ($178)
大廚選用坊間罕見嘅法國鵪鶉髀!! 以港式惹味避風塘煮法爆香炒製，配上香辣炒飯，火辣辣刺激味蕾，中西合壁好正啊。鵪鶉髀肉質嫩滑，炒至外脆內滑幾過癮！
美國Prime牛小排pizza ($208)
咩話？！呢度竟然將牛小排加入pizza上面？無錯，香脆薄批pizza鋪滿邪惡鹹香嘅拉絲芝士，加埋炙烤美國Prime牛小排，牛香突出而且油脂感十足，估唔到同pizza又幾夾喎！
法式香橙帝王蟹肉意粉 ($198)
法國嘅橙酒班戟就聽得多喇，橙酒意粉大家又試過未呢？餐廳特意用咗法式甜品嘅做法烹煮，意粉淋上火焰濃烈橙酒，配埋鮮甜帝王蟹肉一齊食，酸酸甜甜同時帶微微苦澀餘韻，想中和一下可以食埋香甜橙肉㗎～
擺烏龍...Lychee茶 ($48)
除咗食物餐牌外，呢度嘅特飲同雞尾酒都好特別！好似呢杯擺烏龍...Lychee茶就用烏龍茶作基底，加埋荔枝糖水同肉桂條添上香氣。清幽茶香會透出荔枝甜味，層次好豐富。
醉酒貴妃Vodka ($98)
想同朋友小酌幾杯嘅話，可以一試呢款Cocktail，味道甜甜哋好易入口，同時仲帶荔枝果香。唔算好嗆喉，幾啱女仔飲啊～
Tequila Sunrise ($88)
呢款由餐廳自己重新調配創作，龍舌蘭酒內加入秘製橙汁，飲落有多重層次，而且甜味更突出。
Wish You A Mamaday
地址: 銅鑼灣駱克道491-499號京都商業中心10樓
電話: 39967380
營業時間:下午6時至凌晨2時