夏天想望吓天、望吓海，又唔想去郊外一身汗，不如揀間海邊餐廳涼住冷氣睇靚景啦。喺將軍澳海傍嘅“The Hunter”有室內/戶外座位，海洋主題裝潢好似去咗外國咁。
呢度本身主打熟成牛扒，坐室內會見到廚房玻璃後嘅熟成牛扒櫃擺滿牛肉，仲發現入面大部分都係外籍廚師嚟。佢哋會用西班牙名牌燒烤爐Josper Grill炭燒牛扒，用真炭燒特別香㗎!!
想嚟鋸扒，2024年8月推出嘅「限定夏日套餐」只要+$100就可升級追加乾式熟成M2+肉眼 配薯條，CP值幾高。套餐仲有連枝番茄、西瓜、柚子魚子醬等清爽食材入饌，同出面個海景好夾啊。
“The Hunter” 限定夏日套餐
安達魯西亞凍湯(Andalusian Gazpacho)
源自西班牙南部嘅番茄凍湯，係當地夏天幾常見嘅開胃菜，味道酸甜爽口。平時會配麵包或蔬菜，今次大廚就直接於湯中放入蟹肉沙律，爆多蟹肉連凍湯一齊食幾正。
連枝番茄片(Tomato Carpaccio)
平時好少見番茄做主角嘅料理，因為撐得起一道菜嘅連枝番茄(Heirloom Tomato) 真係好罕有。呢種傳統番茄品種已經有過百年歷史，從未經現代改良，所以係番茄元祖味嚟㗎!! 番茄上面加咗酸種包粒粒，多咗種輕韌口感幾特別。
另一道冷盤就有黃鰭金槍魚，用西班牙迷你羅馬生菜包住食，伴冰上枱好透心涼啊。
海膽天使麵(Uni Angel Hair)
夏天唔想食得大負擔，呢道海膽天使麵就輕盈地滿足喇。作為意大利麵中最幼嘅天使麵，口感柔軟順滑，可以輕易連埋海膽一齊食，加埋柚子魚子醬確實一絕。
開心果提拉米蘇(Pistachio Tiramisu)
身為Tiramisu粉絲，見到咁大杯Tiramisu真係好開心!! 質地好綿滑亦唔會太甜，上面鋪滿咖啡粉同開心果碎幾有層次。
THE HUNTER
地址: 將軍澳唐賢街29號藍塘傲地下11號舖
電話: 23300204