臨近年尾特別多Party、活動，油尖旺區有間接近3000呎嘅木系西餐廳 “Potluck Eatery” ，寬敞嘅用餐空間好方便佈置同安排座位，最多可容納70至80人。如果人少少搞10至20人嘅Party，就可以選擇包玻璃VIP房。嘢食方面仲提供度身訂造西餐料理：前菜、小食、主菜、扒類、海鮮、pizza至甜品都有，完全係搞手福音啊！
木系裝潢，空間感十足。
“Potluck Eatery” 嘅橄欖綠x木系門口有個半戶外空間，平時坐低飲杯咖啡幾Chill。搞活動嘅話佈置成接待處亦得，想舉辦證婚派對、Gender Reveal Party(嬰兒性別揭曉派對)、產品發布會等就最啱喇。
坐呢個半戶外空間，夠Chill~
甫入店內，會被綠意盎然植物小空間吸引。田園風嘅長木椅、梳化、而最吸睛嘅係牆壁上人手畫嘅一棵樹木、營造出文青自然氛圍，形成靚靚影相背景。
打卡靚位!
喺餐廳舉辦活動一大好處，就係唔使為食物同飲品煩惱。“Potluck Eatery”有一系列精緻西餐料理，無論自助餐或套餐形式可按需求度身訂造。以套餐形式為例，“Potluck Eatery”可以設計幾款一人套餐，賓客可自選前菜、主菜、甜品，用餐體驗圓滿得體。想再簡單啲，賓客嚟到睇餐牌揀嘢食又得，想知多啲歡迎聯絡餐廳查詢啦。
【全新餐牌推薦】
除咗喺“Potluck Eatery”搞Party活動外，平時嚟食飯都幾好㗎。
Potluck Fever
一直大受歡迎嘅超級拼盤!! 主角係高質安格斯肉眼扒，係店主特別引入嘅靚牛扒嚟㗎。拼盤仲有豬肉串、大蝦、粟米、雜菜沙律。超大份量，幾個人Share都得。
普羅旺斯肉醬釀焗番茄
呢道意式料理好講究手藝，要人手掏空番茄變成碗仔，再釀入肉醬、洋蔥、薯蓉焗製。餡料吸滿新鮮番茄汁，又保留到番茄質地，食落味道同口感好豐富 (要提早一天預訂)。
忌廉茄茸蟹肉龍蝦意大利飯
“Potluck Eatery”對料理出品好有心機，好似呢道龍蝦意大利飯唔止有好大隻龍蝦，仲用咗蟹肉、忌廉等，煮到意大利飯粒粒吸哂醬汁、飽圓Q彈。
每日精選餐湯
無論Lunch定夜晚嚟食飯，好推薦大家跟配餐湯。因為全部餐湯係每日自家製作，將當日新鮮食材Blend製而成，同一般來貨翻熱嘅湯好唔同㗎，rich好多！。好似西蘭花忌廉湯、紅菜頭忌廉湯有好多人鍾意，紅菜頭湯仲要唔係度度有，好值得一試。
今次我哋就飲到野菌忌廉湯，係用鮮冬菇、雞脾菇、秀珍菇Blend成。菌香濃郁，Creamy得嚟又保留少少菇嘅口感。
Potluck Eatery
網址: https://s.openrice.com/QrbS02iOA00~dYKKSilyW
地址: 尖沙咀柯士甸道136-138號金門商業大廈地舖
電話: 26400388
