想喺尖沙咀食個CP值高嘅高級lunch，可以考慮由杜拜、阿布扎比皇宮廚師Balram Yadav開設嘅印度餐廳“Spice Bazaar”。Balram Yadav擁有超過30年印度菜經驗，亦曾於印度五大酒店集團工作，擅於用多種香料煮製香港人鍾意嘅印度菜。
“Spice Bazaar”係香港少有分咗 素食 / 非素食 菜單嘅印度餐廳，無論你想go green抑或素食者；甚至身邊有素食者朋友，都係一大福音啊。
Balram Yadav曾任杜拜、阿布扎比皇宮廚師。最近於尖沙咀開設自己嘅印度餐廳“Spice Bazaar”。
一出𨋢就見到法國畫家Eric手繪壁畫，呈現印度文化。
“Spice Bazaar”環境精緻，提供室內及露台座位。
【素食/非素食都滿足】午市套餐$98起
「午市套餐(素食 / 非素食)」只係$98起咋!! 呢個價錢包括是日餐湯、前菜、主菜、印度烤餅/巴斯馬蒂米飯、甜品，超級豐富。「素食午市套餐」可以食到經典茄子炸餅(前菜3選1)、鷹嘴豆咖喱(主菜3選1)，跟個印度大蒜烤餅(麵包2選1)，再食埋甜品真係好滿足。
「非素食午市套餐」就有用乳酪醃到好嫩嘅雞肉蒂卡Chicken Tikka(前菜3選1)、人氣招牌菜奶油雞(主菜3選1)，真心啖啖肉。
【午市瘋狂任食】印度燒烤餐菜單
晏晝都想瘋狂掃食!? 呢度下晝另有「印度燒烤餐菜單」包括沙律、主菜外；仲3選1無限供應 法式薯條/蒜香烤餅/香飯 只係$108起。
而且“Spice Bazaar”嘅印度料理唔會好辣，反而每啖都好有層次，香料味會慢慢滲出嚟。廚房特設印度傳統烤爐Tandoor，高達400°C嘅圓柱形大窯爐，keep住新鮮出爐印度烤餅、海鮮、肉扒、羊架，今次「午市套餐」同「印度燒烤餐菜單」都有機會食到㗎。
Balram Yada擅於用多種香料煮出層次，唔會死辣。
店內設有印度傳統烤爐Tandoor，高達400°C 新鮮出爐印度烤餅、海鮮、肉扒、羊架。
「印度燒烤餐菜單」包括沙律、主菜外，更可3選1無限供應 法式薯條/蒜香烤餅/香飯。
即刻睇吓「印度燒烤餐菜單」有咩主菜(8選1)啦～
羊排(Lamb Chops) $118
以印度香料醃製嘅羊排，好鍾意外層少少燶邊幾香口，食落有種煙燻辛香風味。
奶酪串燒(Paneer Tikka) $108
平時芝士都係配角，有無興趣試吓將印度傳統芝士 (Indian Cottage Cheese) 變成串燒主角? Balram Yadav直接將自製芝士切件燒製，口感柔軟濃郁，有啲似帶乳香嘅豆腐，新鮮感十足。
雞肉串燒(Chicken Tikka) $108
用混合香料醃製嘅無骨雞肉，juicy又有豐富印度香料風味。外層焦脆，入面仲好軟嫩，同跟配嘅薄荷乳酪醬好夾!!
羊腿肉馬薩拉(Lamb Shank Masala) $118
Balram Yadav以濃郁馬薩拉醬汁慢煮羊髀，羊肉嫩到輕輕切開就離骨。如果你鍾意好軟嘅肉質，一定要試呀。推薦揀任食蒜香烤餅，超多汁蘸嚟食，正!!
烤魚串燒(Fish Tikka Tandoor) $118
今次「印度燒烤餐菜單」有優惠價追加飲品～ 如果你鍾意飲啖啤酒、食吓Fish & Chips，呢款烤魚串燒絕對係升級版呀!! 因為套餐可以任食薯條之餘，呢道烤魚更用傳統烤爐Tandoor 400°C 烤焗澳洲鱸魚，高溫迅速鎖住魚汁同鮮甜味。
烤花椰菜(Tandoor Gobi) $108
“Spice Bazaar”真係好照顧素食者，呢個套餐都有素食選擇。烤花椰菜外層金黃酥脆，咬開又有花椰菜原始草本脆嫩風味。
蒜香蝦(Garlic Prawns) $118
Balram Yadav擅長用多種香料煮出印度風味，唔會死辣。好似呢道蒜香蝦，彈牙蝦肉有種柔和乳酪香料味，加埋個醬超開胃。
Spice bazaar
地址: 尖沙咀寶勒巷10號4樓