想喺旺角飲嘢、食飯直落，呢間天台酒吧餐廳“Reflect”就有夢幻雞尾酒+墨西哥fusion菜啦。由多年墨西哥菜經驗大廚主理，絕對唔係得墨西哥粟米片(Nachos)之流。
呢度有多款口味嘅墨西哥烤肉(Fajitas)、墨西哥夾餅(Tacos)、辣肉餡捲餅(Enchilada)等經典料理外，仲會每半年更新吓餐牌。最近秋冬新推咗好多炸物，好似炸墨西哥辣椒(Jalapeño Pepper)、配特製芝士醬嘅墨西哥粟米薄餅(CornTortilla)等等。
“Reflect”有個靚靚室內環境之外；仲有望旺角夜景嘅戶外空間，大到可以包場舉辦輕婚禮，勁開揚有feel啊。
所以大廚都預咗大家會食住飲成晚，除咗一系列多芝士兼重醬嘅墨西哥料理外，仲加咗相對輕盈嘅白酒牛油汁青口、龍蝦汁軟殼蟹闊條麵等fusion料理。一班人食吓飲吓，唔覺唔覺就一晚啦。
【全新墨西哥料理】
香炸墨西哥辣椒(Jalapeño Pepper)
墨西哥當地好受歡迎嘅小食，將新鮮Jalapeño釀入芝士後，再蘸滿麵粉、蛋漿炸到金黃酥脆。大廚事前起走咗Jalapeño嘅辣椒籽，所以食落唔會好辣，反而係勁重拉絲芝士味再滲出微酸微辣咁，好啱飲酒食啊。
墨西哥粟米片(Corn Tortilla)
Corn Tortilla係墨西哥嘅飲食文化基礎，亦係當地人日常主食。粟米製脆片有種獨特穀類香味，乾身薄脆好啱配醬食。
今次大廚就用美國人鍾意嘅高級芝士，再加其他香料調味。相比一般車打芝士更加濃郁，絕對係高質佐酒小食啊。
經典墨西哥餡餅
呢款超大份量嘅墨西哥餡餅，麵粉製餅皮會軟綿好多。相比脆卜卜嘅粟米製Corn Tortilla，又係另一種口感。餡餅好爆餡，加埋上面嘅莎莎醬、牛油果醬、酸忌廉等等，絕對大滿足。
【Fusion創作料理】
原隻起骨燒春雞
平時見到燒春雞會擔心食到好狼狽，呢度原隻起晒骨嘅燒春雞就唔使擔心喇。春雞用咗墨西哥Ajihoti香草磚、辣粉、孜然粉等醃製，肉味又香又辣。
春雞仲會跟配墨西哥薄餅(Tortilla)，可以自己夾雞肉食，即刻變身地道餡餅(Queso Pollo)，蘸埋秘製芝士醬食仲正啊。
白酒牛油汁青口
平時多數係白酒煮青口，“Reflect”就加埋特調牛油汁落去。唔會遮蓋咗青口獨特嘅貝味，又會creamy啲香啲，係比較意式嘅fusion做法。
龍蝦汁軟殼蟹闊條麵
嚟到墨西哥餐廳，一定會叫好多有芝士嘅餡餅、脆片。大廚設計菜式時就考慮到呢點，所以加插咗高人氣嘅軟殼蟹闊條麵，等你喺芝士同芝士之間解膩過渡吓。
目測軟殼蟹偏大隻，仲要係原隻蟹上幾正。而且意粉醬都幾多幾濃郁，真係每啖都好掛到汁，濃味控唔會失望。
【自家製甜品】
熱情果芝士餅
唔講唔知，原來呢度仲有自家製甜品。好似呢款芝士餅咁，蛋糕質地好綿滑，食得出同直接來貨嘅質素幾唔同。
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697