有咩比漫天月球下慶祝聖誕更夢幻，旺角月球主題酒吧餐廳“J.moon”推出限定聖誕套餐，有香煎鵝肝伴鵝肝慕斯、西班牙烤八爪魚、蜂蜜檸檬迷迭香烤雞、美國安格斯肉眼扒10oz等選擇。
一入店已見到掛滿過百月亮燈，而且每張枱都有專屬月亮燈，拎住月亮燈影相好似自帶燈光咁靚啊。呢度仲有旺角少見嘅大平台，聖誕夜嚟吹吓風、飲杯酒幾有feel，絕對可以食飯飲酒直落啊。
店內掛滿唯美月球燈，好有氣氛。
旺角難得有大平台空間，聖誕夜嚟吹吓風、飲杯酒幾有feel。
旺角月球主題酒吧餐廳“J.moon”限定聖誕套餐。
開胃菜3選1 | 三文魚杯
脆撻小杯係用好薄脆嘅紙酥皮(Filo Pastry) 焗成，入面係滿滿煙燻三文魚、迷迭香同大蒜。小杯造型好優雅，就算直接用手拎起食都無問題，襯埋杯酒仲有啲Cocktail Party氣氛𠻹。
開胃菜3選1 | 煎鵝肝伴鵝肝慕斯
聖誕餐有鵝肝真係特別有儀式感。今次仲係雙重鵝肝，將煎到外脆內軟嘅鵝肝，伴上輕盈鵝肝慕斯。以鵝肝平衡鵝肝膩感相當巧妙，當然亦伴有輕甜莓果醬，鹹甜鹹甜更有層次。
開胃菜3選1 | 西班牙烤八爪魚
特別將西班牙八爪魚切片再放上薯仔，變成一啖一件嘅精緻開胃菜，並有彈牙、軟綿雙重口感。上面嘅煙燻紅椒、大蒜醬都好香濃啊。薯仔則用左濃郁的大蒜作基調調味，十分惹味!
熱湯 | 松露蘑菇忌廉湯
湯身好綿密，未飲已經聞到好濃松露香啦。每啖都隱約飲到粒粒蘑菇同忌廉口感，之後就準備食主菜啦。
主菜菜4選1 | 蜂蜜檸檬迷迭香烤雞
春雞外皮烤到微脆，一切開即刻爆晒肉汁。好鍾意伴碟嘅蘑菇忌廉醬，唔會每啖都係雞肉咁單調。而且仲有大大個烤大蒜，絕對係蒜迷福音。依個組合絕對係聖誕既絕佳配搭!
主菜菜4選1 | 香煎比目魚
香煎比目魚幾厚切大件，魚皮仲有少少脆口𠻹，配以酸甜嘅西西里汁幾有地中海風味，係聖誕夜嘅清新選擇。
主菜菜4選1 | 龍蝦濃湯意大利麵
濃郁龍蝦湯好掛麵!! 單食意粉已經好鮮。而且海鮮配料都好多，北海道帶子、大蝦、三文魚籽差唔多鋪滿意粉，鍾意海鮮嘅話必食。
主菜菜4選1 | 美國安格斯肉眼扒10oz(+$98)
始終覺得鋸扒先有儀式感嘅話，可以+$98升級美國安格斯肉眼扒10oz。油脂分佈均勻之餘，肉質又夠嫩。伴碟仲有牛油薯蓉、烤大蒜同蘆筍，咁大分量真係要配杯酒解吓膩啊。
甜品| 聖誕樹
今次甜品真係好有心思，係聖誕樹主題嘅開心果白朱古力慕斯、朱古力撻、海綿蛋糕同朱古力脆餅。
聖誕套餐另可+$58追加餐酒 或 氣泡酒Prosecco 1杯。
J.moon
地址: 旺角西洋菜南街1A-1K號百寶利商業中心4樓10-11號舖
電話: 95455738