天氣轉涼特別想食啖啖肉啊!! 尖沙咀山林道呢間黎巴嫩餐廳“Rue Du Liban”就有仙氣大烤肉拼盤，上枱嗰陣仲彌漫住炭香煙霧，即烤羊肉、牛肉、雞肉、薄餅堆到滿滿，再免費跟配多款沙律、彼得包、脆片，幾個人share CP值極高!!
“Rue Du Liban”裝潢儼如置身漫天花海，藍色大門已經有種外國小館氛圍。全因呢度由黎巴嫩人Imran Khaleel一手打造，並邀請超過40年烹飪經驗嘅埃及總廚Maged Makram，完美還原地中海風味。
大燒烤拼盤配各式沙律(Large Mixed Grill+Mix Salad)
一上枱已經聞到好香煙燻味，烤盤有烤羊肉、牛肉、雞肉、薄餅外，仲會跟配幾款Cold Mezze、彼得包同脆片，一啖肉一啖黎巴嫩豆蓉解膩又豐富。
大燒烤拼盤配各式沙律，份量豐富足夠幾個人share。
上枱已聞到好香煙燻肉味。
海鮮燒烤雜錦拼盤(Seafood Platter)
同場都有海鮮拼盤揀!! 一次過食幾款即燒海鮮—虎蝦、三文魚、盲鰽魚柳、青口、魷魚。好鍾意跟配嘅乳酪醬，濃郁乳香好突出到海鮮鮮味，又有種獨特絲滑口感。
海鮮拼盤即叫即燒，大份量有驚喜！
【Chef Special】酥皮焗羊腿
埃及總廚Maged Makram特別設計嘅酥皮焗羊腿，員工會喺你面前即席切開酥皮，入面有大大隻羊腿好吸睛，豐富蔬菜都吸滿羊肉精華。跟配醬汁係煮羊腿時嘅肉汁精華，食嗰陣蘸滿汁會更香更juicy㗎。
埃及總廚Maged Makram特別設計酥皮焗羊腿，暫時限定推出。
員工即席切開酥皮，入面係巨羊髀同滿滿蔬菜。
一定要蘸埋個羊肉汁嚟食，肉味極濃!!
冷開胃菜雜錦拼盤(Mix Cold Mezze Platter)
松露鷹嘴豆、蒜香乳酪、烤紅椒核桃蓉、煙燻茄子蓉
如果你鍾意黎巴嫩風味，一定要叫呢個Cold Mezze拼盤，一次過食到4款黎巴嫩好地道嘅豆蓉、乳酪。用脆片或彼得包蘸嚟食，開胃又健康啊。
冷開胃菜雜錦拼盤，係黎巴嫩經典料理。
松露鷹嘴豆，綿密又有松露香。
好鍾意蒜香乳酪嘅醇厚乳香。
熱開胃菜雜錦拼盤(Hot Mezze Platter)
炸羊肉球、芝士酥角、蔬菜松子仁酥角、炸鷹嘴豆餅
黎巴嫩菜都係崇尚天然健康，雖然Hot Meeze好似好多炸物，但食材都係好有益嘅鷹嘴豆、蔬菜、松子仁、芝士為主，味道濃郁惹味，食炸嘢都無罪惡感。
黎巴嫩菜崇尚天然，就算炸物都係用健康食材。
金沙蝦乳酪拌飯(Shrimp Fatteh)
乳酪拌飯係經典中東料理，軟綿乳酪用嚟撈飯驚喜地有層次感，連埋脆片同彈牙蝦肉一齊食好吸引!! 呢個份量好啱share，兩個人嗌呢個拌飯，再加個烤肉拼盤已經好豐富。
經典乳酪拌飯，乳酪、脆片、蝦肉撞出三重口感。
雜果仁千層酥(Baklava)
呢道傳統中東甜品，最特色係層層酥皮做出嘅複雜酥脆口感。而“Rue Du Liban”嘅Baklava，係一間出名嘅烘焙店親授，即叫即製復刻正宗脆卜卜口感。主廚亦考慮到香港人唔嗜甜，所以一反傳統無加蜜糖，唔會太甜啱啱好。因為香港食到嘅大部分Baklava都係雪藏品翻熱而腍晒，難得呢度有咁地道口味一定要食埋啊。
儀式感爆滿！午市套餐
想喺尖沙咀食個有儀式感嘅lunch，“Rue Du Liban”嘅午市套餐好吸引。百幾蚊就有精選時日餐湯、開胃菜3選1、主菜6選1、甜品、飲品，而且擺盤好地道，自選料理會擺晒喺一個圓盤呈上，好似當地人咁將幾款料理交替地食，更體驗到黎巴嫩料理吸引力。
今次主菜揀咗Falafel Wrap炸鷹嘴豆手卷(玉米脆片)。
前菜之一嘅鷹嘴豆蓉&烤紅椒核桃蓉，好啱幾種料理夾埋一齊食。
RUE DU LIBAN
地址: 尖沙咀山林道22-26號地下A號舖
電話: 23102922