平時食Omakase環境都係恬靜拘謹啲，想飲住酒食chill啲都唔係無可能。蘭桂坊新開呢間IO Italian Omakase有2個晚餐時段—星期一至四7:30pm；星期五、六設6:30pm及8:30pm 共2個時段。全店由國際設計師Pininfarina設計，由線條至燈光均一絲不苟。嚟食晚餐外，亦可以喺現代日本whisky bar飲酒感受吓氣氛㗎。
逢星期五10:00pm後仲有SHOKUGO派對，駐場DJ Kenson炒熱氣氛，一齊邊飲酒邊跳舞。當然，佢哋嘅Omakase都好值得一試，融合咗意大利同日本傳統風味，9道菜Omakase Menu就可以食到多款招牌料理喇。
【Omakase 9道菜】
意大利同日本菜系本身都好講究美感，呢度嘅料理理所當然好IGable啦。食材亦係精緻矜貴，好似A5和牛、法國藍龍蝦、意大利Osietra魚子醬等都有。
開胃前菜
首先有蠶豆青豆撻，以洋蔥炒香口感幾特別；鯷魚脆片就加咗富四川麻味嘅香草，輕辛刺激開胃醒神。
Hamachi, Blood Orange, Sicilian Lemon
第二道油甘魚薄切放滿意大利Osietra魚子醬，以刺身捲住魚子醬、血橙同佛手柑啫喱、wasabi脆片同蛋黃醬，口感味道都好豐富。
Red Prawn, Gazpacho
西西里紅蝦一向蝦味濃郁，今次更將蝦頭做成薄脆片，double鮮味。伴上嘅西班牙凍湯就以西瓜、番茄、韓式燈龍椒煮製，味道清爽好啱夏天vibe。
Hokkaido Scallop, Daikon, Oyster Leaf
蝦味衝撃味蕾後，就到貝類上場。北海道帶子以慢煮做法，好保留到獨特貝味，臨上枱前再用火槍輕燒更香口。
日本常見嘅伴菜白蘿蔔，一部分用鰹魚水浸透，有種關東煮風味；另一部分就變成蘿蔔泡泡，入口有種空氣感幾有驚喜。
Langoustine, Caviar, Zucchini
挪威海螯蝦，係米芝蓮餐廳常見嘅高級食材。生活喺挪威至冰島嘅海螯蝦，活動量高令口感特別爽口。今次配上魚子醬、意大利青瓜沙律，儼如一道變奏壽司。記住蘸埋隔籬嘅勺草油香檳汁，細膩滑溜感好有記憶點。
Sea Urchin, Cauliflower, Potato, Yuzu
呢道菜一上枱就好有精緻感，半透明卷物其實係葛粉製成。一啖咬落去，半透明外層脆卜卜，中間又交織cramy海膽、清爽花椰菜同薯仔等。加埋酸酸甜甜嘅柚子，係好有新鮮感嘅創作料理。
Blue Lobster, Bisque, Seaweed
法國藍龍蝦有種獨特海水鹹香，有說平均200萬隻普通龍蝦先會出現一隻，呢個200萬份之一機會反映佢嘅身價。
大廚以慢煮方法鎖住鮮味，最後用火槍燒香。配上自家製龍蝦汁，係龍蝦頭+紐西蘭海鰲蝦煮製，可以想像味道幾濃郁呀。
Wagyu, Pumpkin, Mushroom
嚟到主角A5和牛，一上枱已經見到粉嫩和牛佈滿雪花。軟嫩肉質，基本上唔使咬已經化出油香。
伴上嘅日本蘑菇係用日本醋漬方法處理，醋香蘑菇+輕甜南瓜恰好中和和牛油感，平衡做到啱啱好。
Panna Cotta, Black Sesame
最後就以黑芝麻意式奶凍作結，綿密質地好有滿足感。加埋紅桑子泡泡微酸輕甜，作為結尾解膩啱啱好。
IO Italian Omakase
地址: 中環德己立街21號The Plaza 2樓
電話: 58080132