品越越式料理 (雅蘭中心) (已結業)

同好姊妹慶祝生日， 今次大家都好有興趣試下品越，所以我提早幾日已經響openrice度訂位了！ 我哋兩個女仔揀咗二人套餐， 再加多碟蔗蝦， 但係其實二人餐嘅份量都相當之大，包括有胡麻雞絲扎肉沙律，鮮蝦番茄蟹肉肉丸湯，越南小食拼盤， 扎肉兩件，粉卷一件，春卷一條，蝦餅四片) 主菜有蒜蓉牛油焗比目魚配酸辣無骨鳳爪，還有一個菠蘿海鮮炒飯，兩杯飲品， 而套餐入面本身係包括甜品嘅， 但係我哋當日冇留意到， 店員亦冇主動送上甜品， 所以就試唔到佢哋個甜品了！講下食物方面:胡麻雞絲扎肉沙律， 酸酸地味道幾清新配埋雞絲扎肉有咬口，好味！鮮蝦番茄蟹肉肉丸湯， 湯有濃濃嘅鮮蝦味道， 感覺唔錯！越南小食拼盤， 最鍾意食佢嘅蝦餅， 春捲味道普通， 扎肉爽口！蒜蓉牛油焗比目魚配酸辣無骨鳳爪， 比目魚多汁鮮甜， 酸辣無骨鳳爪夠開胃!菠蘿海鮮炒飯， 呢個比較麻麻地， 炒飯質地太濕， 味道亦都冇乜特別！蔗蝦， 一碟有四隻蔗蝦中間鋪滿沙律，蔗蝦我都好鍾意食，但係佢嘅感覺同蝦餅好相似！ 如果叫咗蝦餅就唔使再叫遮蝦了！這間越南餐廳坐嘅位置都算舒適， 店員亦都親切有禮貌， 只係沒有提示客人還有甜品未上， 服務唔夠主動。

約開朋友係旺角，所以諗住早啲上網卜定間餐廳，入到去唔洗等。野食比想像中大份，炒飯果啲都好大碟，二人餐都多野食既，但味道就普普通通不過不失咁。不過值得一讚既係，職員既態度係十分之好，係咁幫我地添水，最尾二人餐既甜品得兩份，但佢見我地四個人所以都比多兩份我地，落單果啲都好快手。同埋坐既環境都闊落同靜啲，適合幾個人傾下計，坐耐少少都可以

去到旺角女朋友話想食越南pho,Openrice 即search 搵到間有得thru Openrice book枱 仲有得送25Asiamiles 嘅餐廳即刻去馬佢地址寫雅蘭中心，但千祈唔好中咗入雅蘭中心，佢個入口喺山東街渣打對面。上到去環境都算闊落，揀咗個窗口位坐，大玻璃無敵彌敦道景，店員話OpenRice book枱有個半價二人餐（原價620 半價310），其實都預佢mark up完再半價，不過兩條友3舊水都ok啦，即扑鎚。第一味胡麻雞絲沙律，利申：小弟胡麻癡，堅好食。第二味有得揀 揀咗鮮蝦蕃茄蟹肉肉丸湯，蟹味好濃，好好飲，有驚喜第三味小食拼盤 好大碟 基本上係三人份量嚟第四味 揀咗蒜蓉牛油比目魚配酸辣無骨鳳爪，個魚好鮮，配埋蒜蓉牛油，一流！第五味 女友劈頭話要食pho,就揀個pho,上菜時真係大到嚇親，極度足料！餐飲加錢揀咗杯店檸七，女友飲西柚野莓梳打，一樣出色！最後以芒果糯米飯作結。總結：味道一流，服務態度極好，地步方便（泊車要泊朗豪坊），二人餐份量夠3-4人分享。睇完咁多字，都係睇相最實際