龍華酒店 (下禾輋)

依稀記得細細個去新界親戚屋企拜年食過一間幾好食嘅乳鴿，問咗屋企人先知係龍華酒店，呢日專登出去回味一下。龍華酒店有好多年嘅歷史，位置比較偏僻同黑，但上完斜路之後感覺完全唔同唒，好光猛好有氣氛，星期六晚19:00-21:00仲有結他表演。🍽️龍華脆皮燒乳鴿 $128燒乳鴿係龍華酒店嘅招牌菜，我哋當然叫咗一隻試下！乳鴿炸到金黃色色澤好靚，表皮香脆，肉質幼嫰又入味，食落唔會好油膩。難怪以前嘅名人都專登搭飛機黎食！另外仲有兩片蝦餅跟埋，蝦餅好鬆化。🍽️金陵蔥油雞 (半隻) $168葱油雞肉質結實但唔乾身，好易咬，醬汁入口清新而有濃郁葱味。雞件下面仲有好甜嘅南瓜同洋蔥絲。半隻雞份量都唔少，雞件同醬汁非常適合餸飯！🍽️石鍋大少鴿鬆炒飯 $188鴿鬆生菜包食得多，今次試吓炒飯！炒飯用熱辣辣嘅石鍋裝住，可以有效保溫。飯粒粒粒分明，好有鑊氣。炒飯用料豐富，有大量鴿鬆同菜粒。菜粒除咗有口感仲帶少少甜味，而鴿鬆更係帶焦香味，為成個炒飯加咗唔少分！份量算多，兩個人一齊食啱啱好！.埋單嗰陣仲送咗2張光影展館入場票，又慳返$100！店員仲叫我地下次可以帶埋屋企人黎，因為佢哋有優惠平日夜晚4人枱以上會送一隻BB鴿，每日限量10隻咋送完會改送椒鹽豆腐或者甜品。準備過年，下次識做！！…查看更多

已有80+年歷史既龍華酒店係香港著名既園林酒店，這裡係不少香港人既集體回憶🥰入口處有個古色古香風格既門牌，跟住係一條掛滿紅燈籠既斜路仔，而室內位置周圍都掛滿左歷史相片。今次係帶媽媽重回舊地，重溫一下乳鴿既味道，而我咁大個人都係第一次黎😁因為天氣唔太熱，我地揀左坐係室外，環境好舒適，又唔會坐到密側側。龍華脆皮燒乳鴿 $98 👑乳鴿係餐廳必點招牌菜。乳鴿係先用滾水輕烚，然後用滷水浸熟，再係鴿皮塗上麥芽糖後再炸，仲要即叫即炸。乳鴿送到上枱熱辣辣，炸到鴿皮香脆，鴿肉嫰滑多汁，食起上來無騷味👍店員仲提供埋即棄手套，方便進食。新鮮菠蘿咕嚕肉 $168✨️係當年李小龍太太最喜愛既菜式咕嚕肉咬落去外脆內軟，用左半肥瘦既豬肉，配埋個酸甜醬汁，仲有酸酸甜甜既新鮮菠蘿，真係非常開胃。石鍋大少鴿鬆炒飯 $168炒飯用石鍋盛著，可以保持炒飯熱騰騰，鴿鬆即係鴿肉切成細粒，鴿鬆好嫰滑，而飯炒得粒粒分明，仲加埋松子一齊炒，非常香口👍原味手造豆腐花 配桂花糖漿 $68 👑豆腐花用木桶盛著，豆腐花口感好滑溜，豆味香濃，而餐廳唔係提供黃糖，而係提供桂花糖漿，加一點落豆腐花食，味道好清甜，令豆腐花棉上添花。…查看更多