見到社交網站廣告，Habitu同誠品書店推出聯乘Menu「文學在餐桌」，咁我就同一樣好鍾意睇書嘅侄仔專登約出去銅鑼灣食，點知非常失望。7點半左右，見到店內得返高檯，我年紀有返咁上下就緊係坐唔到，好彩店外仲有幾個位，係就係焗啲同叫店小工冇咁方便，但算啦，因為本身最想都係支持文學。我地叫左兩個套餐，只係主食唔一樣。個湯係雜菜湯，同普通快餐店的冇咩分別，只係用咗個咖啡杯黎裝叫做高級啲。沙律都係冇特別，都係菜呀芝士粉咁，應該係同文學冇特別關係。點知呢，呢個時候竟然上咗飲品……我同侄仔真係哭咗，好後悔冇專登提店小二等到甜品先上。我介紹侄仔加錢飲佢地果個特色招牌焦糖咖啡，佢覺得好飲嘅。我就要咗黑咖啡，味道都幾淡，好啱怕苦的人。主菜一：軟殼蟹蟹肉意大利燴飯唔知係咪本人食開cheap野，咬唔到蟹肉，果個軟殼蟹只係食到麵粉。本人都唔知咩係正宗意大利燴飯，我就當佢係硬少少嘅白粥咁食，都冇話唔得嘅。主菜二：茄子芝士蕃茄醬意大利手工貓耳粉啲醬好酸呀，好啱鍾意食酸味嘅朋友。食食下，侄仔頂唔順，醒起可以問店小二拎黑椒，店小二就比咗支唔係grind嘅黑椒粉，但食多兩啖，侄仔就話唔食喇，佢話撈埋sour cream，好似嘔吐物味道。因為本人好耐冇嘔過，已經忘記了嘔吐物味道，所以就可以食埋侄仔唔食嘅得意貓耳粉。去到甜品，真係首尾呼應，又係用咖啡杯裝，甜品個名叫玫瑰士多啤梨芭菲。個雪糕球唔係雲呢拿味，係益力多味。呢個甜品係酸味多過甜味，因為士多啤梨片同藍莓都係非常酸，應該啱孕婦口味。侄仔就話玫瑰花瓣同塊葉阻住佢食野，我就叫佢唔好嫌三嫌四。我見到侄仔黑晒面，話要去誠品睇書，於是好快就埋單啦！記得呀，誠品會員呢個餐單有八折，盛惠$389，但店小二話佢地同誠品唔同公司，所以冇得誠品會員儲分。我同侄仔最失望的係，食完都唔知邊忽同文學有關，Menu冇解釋，侄仔催促我舉手問店員，我同侄仔解釋，唔好阻人做野！最後提提大家，出面的檯都幾細，唔係好夠位放得晒啲碟，做客人要醒爬，幫下店小二，自己食完疊好杯碟，等店小工送食物黎時，方便店小二收走食完的杯碟，唔係佢地就放唔到新食物～～…查看更多
焦糖咖啡，妹妹的，我冇得飲
