响香港要搵潮州嘢食，其實唔係話太多，一係就比較偏遠，我係唔太願意專登搭車去果啲。今次搵到一間响尖沙咀嘅新派潮汕菜，上網睇過評價唔錯，加上上星期食完打冷意猶未盡，所以我地又一家人走去試下。我哋點咗9樣菜式，每碟都有驚喜，冇一樣嘢可以彈，加上非一般，可以話响香港難得一見嘅好service，真係抵佢响間間餐廳都叫苦連天嘅情況下都爆哂場。椒鹽白飯魚我本身麻麻地食白飯魚，但食落好鬆脆，加上好香嘅椒鹽味刺激味蕾，連唔鍾意白飯魚嘅我都讚好；玻璃乳鴿平時我係唔食乳鴿，一般都又細隻、又冇肉、又鞋，但佢嘅乳鴿反而啖啖肉，仲要燒到皮脆肉嫩，難得令我對乳鴿改觀；鹽水鵝呢個非常出色，滷水鵝就食得多，鹽水鵝就第一次食，佢味道冇滷水咁濃，而且帶好香嘅鵝味，呢個可以話係必點，呢個係No. 1推介；滷水拼盤有滷水鵝腸、滷墨魚同滷豆腐，鵝腸爽脆彈牙，墨魚好滑一啲都唔韌，最估唔到最下欄嘅豆腐，都可以做到咁滑，一般出面食嘅滷豆腐都係柴柴地，一係就好鞋，呢個亦都係必食；潮式馬友魚魚係起咗骨，魚肉好滑，雖然佢比埋普寧醬比我地點，但我覺得唔需要，已經好夠味；潮式凍蟹睇佢隻蟹唔係好大隻咁，但都唔少肉，而且肉質係剛好，冇過火，加上凍食都唔會有腥味，鍾意食蟹嘅人，一定唔可以錯過；鐵板XO醬魚標魚扣呢個都係其中一個驚喜，我未食過魚標係好滑，而且冇一舊會有好似香口膠嘅口感，加上XO醬一齊炒，帶少少辣，忍唔住要食多幾件；潮式炸蠔餅望落去好以好厚粉，其實係佢炸到好鬆，粉一啲都唔厚，而且爽脆，加上佢哋都落咗唔少蠔，我每夾一次都會有蠔，唔係得個脆皮，唔似出面食咁，食粉多過食蠔；涼伴魚皮食到都8899，但意猶未盡想加啲嘢食道啤酒，就問職員有咩好推介，佢就介紹呢款涼伴魚皮。唔好睇佢冇色咁，估唔到係味道豐富，而且帶中辣，食唔到辣嘅人會覺得好辣，佢真係冇介紹錯，反而會令人想飲多幾杯，呢位店員真係醒目。今次真係冇搵錯地方，食物嘅味道完全啱我口味，店舖環境唔錯，加上地點夠方便，同埋一樣服務好，响香港都好少會見到呢種service，佢唔係大陸式果種要恭恭敬敬，而係好似朋友咁，可以一齊傾下計。香港人最捨得食，如果好似呢度咁，就算唔係話太平，食到好食嘅嘢，店員又可以做到朋友咁招待，咁先可以做到有翻頭客。最後埋單加埋酒水，人均都係400幾，講真係絕對合理。其實我仲有好嘢都想食，佢嘅菜式都真係幾多，特別係我最想食嘅魚翅撈飯都仲未食，預計8月尾點都要嚟一次，睇下魚翅撈飯有幾咁巴閉。…查看更多
