放工心血來潮想食韓國嘢🇰🇷，喺尖沙咀返工就最方便不過，因為成條街都係韓國餐廳。今日想食料理類，而唔係烤肉，所以就揀咗「南大門3號」。門口有個韓國叔叔熱情招客，餐廳面積好細，得大約廿幾個座位，而且滿座就有少少迫。不過正正因為咁，小店真係有啲似首爾嘅店😜。呢度嘅三款前菜分別係泡菜、芽菜同埋茄子。🌶泡菜夠辣夠酸、好開胃；相反大荳芽就麻麻，因為無乜味。🍆茄子幾正，肉嫩多汁，而且呢款係比較少見嘅前菜。我哋兩個人嗌咗三碟嘢，估唔到份量咁多，食完呢餐都經已飽到食唔落甜品🙈！雪濃牛骨湯($110)，湯品味道同韓國當地食到嘅好類近，🦴牛骨湯煮至奶白色，唔油膩、無添加味精，整體偏清淡，先至係正宗口味。🐮湯入面有唔少牛肉，另外仲加入咗麵線，再加上原來鍋物配送一碗白飯🍚，可算係飽上加飽！不過如果麵線換上粉絲更佳。鐵板烤醬醃牛肋骨($168)，🥩牛肋骨有好多件，堆到成座山咁，啱晒食肉獸。牛肋肉肉質軟腍，就算連住骨嗰啲都好易食。雖然話係醬醃，不過調味一啲都唔重口味，並無蓋過牛肉本身嘅肉香，而且用鐵板上就令佢多一份燒烤嘅香氣🔥。水冷麵($92)，雖然天氣凍，但無阻我對水冷麵嘅熱愛❄️🍜。蕎麥麵條口感煙韌，即使配料只得青瓜絲、雪梨、雞蛋同一片叉燒，不過配以醋同芥辣食，已經幾好味道。總括嚟講，呢間韓國餐廳各方面都唔錯👍，佢並非華麗嘅打卡店，但都咁多人幫襯，你就知大家都係為咗佢嘅嘢食而來。題外話，呢度落單方式好得意，係自己喺紙上面寫號碼，因為店員真係韓國人嚟㗎☺️。…查看更多
