年度盛事香港美酒佳餚巡禮，因應疫情關係，今年轉個形式，改為「線上+線下」進行，更由以往嘅4日延長至5個星期！參與活動嘅餐廳有超過500間，酒商亦有過百間，除咗可以預早買定各式品酒套餐或美食外，更可以免費參加網上大師班，學品酒、學烹飪。

之前同大家介紹過「網上品酒大師班」（傳送門按此），今次就講下「網上大廚烹飪班」啦！18班嘅烹飪班中，有人氣餐廳同星級酒店嘅總廚親自教班、分享煮食心得，無論係中菜、西餐、日韓定係甜品都有得學，部分更特設食材套裝預訂，喺直播嗰陣齊齊體驗。每堂頭50個訂嘅仲有得免運費！即刻睇下有咩精選課堂，學返一兩道拿手菜看門口啦~

菜式：紅桑子和西西里開心果脆皮泡芙
廚師：Ringo陳永雄 （香港四季酒店行政餅房主廚）
日期及時間：11月29日，11am -11:30am

臨近聖誕，可能唔少朋友仔都準備喺屋企開聖誕party，整下嘢食。星級酒店嘅餅房主廚Ringo就特意為咗今次活動，創作咗一款充滿節日氣氛嘅傳統法國甜品：紅桑子和西西里開心果脆皮泡芙，製作簡單，主要分為黃糖脆面、泡芙、意大利芝士忌廉同紅桑子開心果吉士醬4部分。Ringo仲會分享一啲簡易嘅方法，幫大家好快咁完成一啲過往比較複雜嘅工序。呢個甜品只要大約2個半鐘就整好，新手都啱學！

菜式：沸騰魚香
廚師：Ronald 邵德龍 （囍公館行政總廚）
日期及時間：12月5日，6pm – 6:30pm

囍公館一向都係主打創新嘅中式點心，今次佢哋嘅行政總廚Ronald就會教煮順德魚湯，只需要跟住師傅嘅教學，用新鮮鰂魚熬靚個湯底，再加埋勝瓜、豆腐等，同埋胡椒、野山椒等川菜常見嘅配料，就可以零失手咁煮到一煲既有香噴噴魚鮮味，同時又有川菜麻辣風味嘅川粵菜式啦，用嚟宴客絕對啱使！

菜式：西班牙海鮮飯
廚師：FerranTadeo （LaRambla by Catalunya 主廚）
日期及時間：12月6日，6pm – 6:30pm

要自己煮一道西班牙海鮮飯，其實冇想像中咁難咁複雜，睇住師傅嘅教學，就可以學識。材料都唔使多，大米、Sofrito醬，加海鮮例如西班牙紅蝦、魷魚、蜆及魚湯已經做得到。預早買食材套裝，仲有西班牙海鮮飯專用平底鑊送，事半功倍！加埋師傅嘅講解同示範地道煮法，掂晒。

香港美酒佳餚巡禮
日期：11月11日至12月15日
網址 (按此)

文：Kar
相：Tom Li