牛油果﹝屋主﹞\r\n\r\n入廚經驗約七年，即搬出黎住起；師承家母大人、各式食譜及自己條，嗜好係旅行時食倒好野就回港用本地食材重現類似菜式，並強迫老友們試食‧‧‧；較擅長西式及東南亞菜色。\r\n\r\n「雖然經常都響屋企開派對，而且素有食客三千之名，但一次過招呼17位人客加3位大廚，都唔好話唔夠挑戰性！今次在坪洲蝸居搞Openrice 私房菜聚會，招呼一眾食友，真係一次好玩好食又好笑的經驗。\r\n\r\n先同大家分享一下預備是次私房菜聚會的軼事。由於人口眾多，我地幾位掌廚的都不敢怠慢，單係討論菜單都動用左成120隻貓貓，真係非常認真架！個菜單在幾經修改後，終於拍板，大家就轉為商討分工同買料的問題。\r\n\r\n由於坪洲只得一間百冇的惠康，好多西式材料同海鮮都要響島外購買，咁o岩我又有位老友在之前一個星期由日本來港公幹，以至同負責搜購Citysuper料的KC都夾左幾次至可以將部份材料先行運入坪洲。\r\n\r\n猶記得佢果日﹝星期四﹞係在工作應酬中偷空將材料送黎離島碼頭俾我，真係僅僅交收得及咋！上船後，我就急忙查看材料是否齊章，結果當然係冇‧‧‧唔錯的可能啦！原來KC係過黎之前至碌去citysuper買香草，結果明明係想買百里香(thyme)，卻拎左包外形同名稱都風馬牛不相及的鼠尾草(sage)，而原先放在公司冰箱的無鹽牛油亦唔記得拎！我地電聯後決定為呢包鼠尾草加多道菜─燒雞，我番到坪洲亦急急買左兩隻雪藏丹麥光雞。點知在第二朝醃雞時，都係受唔住新鮮鼠尾草陣味，臨時再變陣，改為用自己blend的masala粉黎醃。不過我都有落一丁丁鼠尾草，冇浪費晒成包野架…\r\n\r\n到左正日，首先接到的係上氣不接下氣的KC的來電，話要遲一班船至入黎。不久又接倒佢來電查詢我有冇「果D 離島人必備的購物車仔」，我住離島o者，唔係蠻荒不毛之地喎，邊有D 咁野，我莫名其妙地放低電話‧‧‧直到KC 同baby_sakana 拎住大包細包黎到，我至明白點解KC 聽見我冇車仔時把聲咁失望─單係果兩粒碌柚已經唔係野少，真係幸苦晒！\r\n\r\n幾位大廚相繼到達，並著手視察我的廚房設施同工具。由於我不嬲都係煮西式同東南亞菜為主，所以並無生鐵大鑊同重量級菜刀﹝西式的各種廚刀同生果刀就有唔少﹞。兩位中廚相繼兼不斷地嫌我果兩把菜刀唔夠「墜」手，兼夾唔夠利─KC都話要斬雞呀，28歲切下磨菇o者，都嫌喎！至於我個普通不銹鋼鑊，兩位中廚當然亦係白眼有加啦！\r\n\r\n重有，KC對我屋企冇果皮亦好震驚，喃喃自語咁話「陳皮都冇，八角梗係冇啦可？」28歲對我屋企冇普通白鹽、只得即磨的海鹽，以及冇一公升庄的生油更係大惑不解…不過兩位中廚o係冇趁手工具的情況下，仍然煮出好好味的菜式，高手即係高手呀！失禮晒！至於另一位大廚baby_sakana，由於同我一樣係西式為主，而且自備左好多工具，所以係毫不費力─佢D工具真係好多架，有D真係估唔倒可以re-use，而且連麵粉都自己帶埋添呀！\r\n\r\n約5點半左右，各位食友陸續到來，好快將蝸居塞滿，帶來的食具亦係林林種種﹝至今仲有D留響我屋企﹞。大家見我地幾個忙到一頭煙，就好熱心咁問有冇野可以幫忙。好彩有買白果咋，唔明點解？估下啦！\r\n\r\n大戰過後，我個鐘點女傭都用左平時一倍o既時間執好我屋企，猶記得佢打電話俾我，話「Mum, 數咩哩！」哈哈哈哈哈哈！\r\n\r\n\r\nBaby_sakana\r\n\r\n入廚經驗3年，師承中電, 煤氣公司及多間甜品學校。擅長西菜, 甜品, 不過食得太多芝士同忌廉, 體重直線上升, 所以努力學緊中菜.\r\n\r\n29號中午，當公司牆上的掛鐘指正12時,我已一個箭步衝出門口, 務求趕及1:00船殺入坪洲.手執1大袋工具, 1袋材料, 和預先焗好的藍莓芝士餅,背著一個大斜袋, 走難般由觀塘趕到中環碼頭.打電話給牛油果報告位置,才知本應乘早一班船的KC正跟我同船!以為救兵到. KC曾講過拿東西他最擅長,有多重的東西交給他就行了! 走到樓上船尾, 只見KC指著前面一行, 示意我坐那裡. 當我行近的時候,才知走難的不只我! 他身旁的背包及ET super 袋,霸了足足4,5個位! “哎呀! 你點救我呀!”大家都叫了出來. \r\n\r\n幾經辛苦, 終於到達了牛油果的私房菜的基地.檯上已有醃好了的燒雞, 排得整齊的西蘭花,還有雪好了的玫瑰果凍. 吃過餃子,我們正式開工.當牛油果和我在外面做準備工夫時, 廚房不斷傳出KC的聲音“喂邊把刀好切?”“有冇第二把?”“乜你成屋都係刀,但又冇張岩用!”哈哈!牛油果家中又的確有成十幾廿把刀, 仲要係每個角落都有,真係唔好得罪! “呢把咁細,你話要來做乜?”似乎KC仍不忿氣沒有他要的刀. \r\n\r\n隨著28歲來到, 煮友人齊, 是時候加快手腳了.當大家的準備工夫完成得七七八八時,爐佬卒領的大軍到了. 派對的時間愈來愈近,自己的雙手雖然仍在煮, 但個心早已飛了出去跟大家等吃.好想向其他煮友偷師, 好想睇下出面大家做緊乜,又好想快些把麵團搓完, 太多好想. “呢個係整來玩的?”busybee見我在鋪了墊的地上碌麵團時問道, “等陣吃的!係咪嚇親?”哈哈哈哈! \r\n\r\n開餐了! 兵荒馬亂之間, 吃到冇汁的蛋白芥末西蘭花,粟米餅忘了蘸醬, 睇唔到豬頸肉,不過又食到2粒名貴煙三文魚卷, 滋味糖醋骨,開胃柚子沙律, 仲有食完再食的濃味藍芝士通粉.另外有誰想到煮得出美味藍芝粉的中廚28歲,竟然是不吃藍芝士的! "點試味? 咪搵男朋友試囉,佢鍾意食!" 愛情的魔力原來真係好偉大!\r\n\r\n睇見牛油果的蛋白西蘭花, 燒茄子, 沙律等,好似睇住食譜的相片咁, 嘩! KC三兩下手勢又搞掂一碟,嘩! 28歲一邊煮一邊“出去飲番杯先”, 嘩!反觀自己將麵粉倒晒落爐頭;差點要毀屍滅跡的榛子脆脆餅; 少到冇人有的蝦湯;還有黑了底的薄餅2號…真是多得Lazyqueen跟KC一句“脆脆地, 幾好呀!”\r\n\r\n平時跟大家出去食就多, 整比大家食都係第一次,感覺是好得意,好多謝牛油果提供一個咁好的地方給我們搗亂!雖然錯過了出面的熱鬧場面, 但好在有MM, David的相片,同埋麵包的影片! 唔知仲會唔會有私房菜Round 2? 會唔會到你地煮比我食?」\r\n\r\n\r\n28歲\r\n\r\n入廚經驗十多年，師承各長輩及食譜，擅長家人朋友喜愛菜色(可中可西)\r\n\r\n「由好耐之前提意攪一次私房菜(自己網友親自操刀) 到完滿結束,真係有似皇馬訪港!!全城歡呼,非常震撼。\r\n\r\n平時我都有煮吓飯仔,同家人朋友分享,但今次煮給17位食家評嘗,都係好有壓力.一來唔知大家口味,自己又得半桶水,怕食壞大家的肚皮.二來選菜方面中式還是西式好?幾拉煮人不段修改食物,到最終出菜單,其中有些趣事.(通常我每日只會收2-3隻貓,但討論期間試過收發約20隻貓貓,係平時的10倍！)\r\n\r\n實戰當日,一放工就成船入坪州,(有勞麵包超人幫我通知牛油果接船)立即動手準備,望見一桌食物,三位煮人己忙得不亦樂乎,我也不敢放慢手腳!切切洗洗,幾個小時就過去了,好彩有KC的細心安排打點,當晚才能順利完成.\r\n\r\n如牛油果說,煮食用品不足,我有點手忙腳亂,不知所措.這很難怪,始終不是自己地頭,不是用開的油,鹽,糖,真的擔心水準直線下滑,己是半桶水,真怕難以入口!!\r\n\r\n時間步步進迫,四位煮人在廚房忙到氹 氹 轉! KC 先安排要燒烤的雞,豬手及豬頸肉上天台.有勞幾位如麵包,家傑幫手.這時出頭盤的牛油果和baby 忙到抖不過氣,大家幫大家睇下火,傳下碟.終於順利完成.接著的是我和KC 的主菜部份.快快手手將糖醋骨,油爆蝦,藍芝土長通粉分別上枱.怕餓壞大家.不要以為牛油果和baby可以鬆一口氣,他們正要為甜品和薄餅做準傋功夫.其間我也"鼠" 了出來飲番幾杯,又再煮過.\r\n\r\n自己的失儀事件就不寫了!!好彩有大家的靚相回憶下!!\r\n\r\n只要大家食得開心,已給我們煮人最大的報答,如呀媽講『只要一家人整整齊齊,開開心心,再辛苦都值得!』」\r\n\r\n\r\nGourmet KC\r\n\r\n入廚經驗25年，師承家母，擅長所有家常小菜，唯獨是千祈不要問材料份量，因為從來唔記亦無諗，一試味就知。\r\n\r\n從來覺得，懂吃及喜歡吃的應該都有興趣煮，如果不是，那知那味是好，那味是難，那味是貴呢？起碼自己是如此。一向也只煮給親友吃，亦從來沒有跟別人合作煮，所以當食友們有私房菜的建議時，也都躍躍欲試。其實在整個私房菜中，筆者的角色主要為穿針引線，使活動能如期舉行。難得的是，幾位從來未合作過的煮人，在分工及溝通上是絕無問題。\r\n\r\n因為想要新鮮肉，所以當日是由小西灣街市開始，先買的是肋排及豬頸肉。再來就是去中環街市買海鮮，及各式的蔬菜及香草，最後才在Citysuper買剩下的雜項物品。\r\n\r\n過程也不是一帆風順的，話說上船前，原本想去Citysuper買蜆，點知一斤不到也要二百六十多元！心心不忿下，寧願錯失班次，也要走回中環街市的魚檔去買，結果買了兩斤，只需四十四蚊。曾向baby_sakana說過，拿東西是我的強項，但拿著七包各種物品，加上背包，老實講也是幾吃力的。上到船，將它們放在位子上，一字排開，是佔了足足五個位。所以就算後來巧遇baby_sakana，也只可以一前一後的坐。又當接到她的電話，原本以為救星到，可以幫我減輕負擔，誰知她也是大袋小包的，絕不輕鬆呢！所以兩個似走\r\n難一般的人，就一起步履蹣跚的，步向牛油果的家。\r\n\r\n吃過屋主為我們準備的餃子後，工作正式開始。個人習慣，到人家的廚房煮東西，一定會先看看用具及爐具，及熟習一下環境。爐火猛，廚具也足，但有一樣是百思不得其解的，這裡有過十把各式各樣的刀，但卻沒有一把像樣的菜刀。在廚房找到的兩把，一把生秀，一把刀柄是鬆鬆的，為在下的手指著想，最後也只好磨了生秀的來用，而在那時才明白為何baby_sakana要將整蛋糕的廚具帶在身。\r\n\r\n因為負責的菜色不用太多準備，所以也可以幫大家撈撈沙律，切切洋蔥及蒜蓉。幾位煮的雖然是初次合作，但洗、切、煮都合作得很好，又因為事先已交換了食譜，所以對其他朋友的菜色也有點認識，幫忙起來也不致無從入手。\r\n\r\n四時多，食友陸續入到坪州，時間就好像飛快的過，我們幾個只知要爭取時間出菜，而又要應付各種突發事情，如茄汁蝦碌沒有了茄汁，那種千軍萬馬、爭分奪秒的情況，真的不足為外人道。終於最後的一味炒意粉也完成了，終於可以安心的去吃東西。至發現原來大家飲了不少酒，情緒高漲都不得了。吃著還未吃完的食物，同其他幾位煮人偷下師，我覺得是次聚會是所參與的十多個聚會以來，最開心的一個。\r\n\r\n開心不在吃了多少，或吃了什麼，而是在於分享，滿足在準備的過程之中。\r\n\r\n希望在不久的將來也有與大家合作及分享的機會。\r\n\r\n
