鍾意食Burger嘅朋友，應該都對港島人氣名店Burger Joys唔陌生！老闆Manu最近衝出港島，於荃灣開設咗副線漢堡外賣店，希望可以令食客用親民價都食到優質漢堡。雖然係平民版，但無論係選材定製作方面都毫不馬虎，打破一般傳統快餐店做法，所有漢堡即叫即製，上手仲係熱辣辣！
Menu選擇貴精不貴多，只有三款漢堡包括安格斯手打牛肉漢堡、芝士牛肉漢堡及雙層芝士牛肉漢堡。
安格斯手打牛肉漢堡($48)
選用新西蘭牛肉，漢堡扒脂肪比例佔25%，老闆話呢個係最完美嘅比例，唔會太油膩。先將漢堡扒邊緣煎香鎖住肉汁，再加入洋蔥、芥末醬、自家製醬汁、番茄及新鮮蔬菜，一入口先感受到濃濃牛味，而醬汁令成個漢堡味道更豐富及清新。
雙層芝士牛肉漢堡($78)
至於芝士控同食肉獸，就唔可以錯過雙層芝士牛肉漢堡，放上雙層安格斯手打漢堡扒，濃郁牛味加上惹味嘅芝士，一入口勁滿足！
地址: 荃灣享和街43-59號都城大樓地舖
文: Yanica
相: Tom Li