提起可以代表香港嘅小食，雞蛋仔同格仔餅一定係其中兩樣，前者外脆內軟充滿蛋香，後者配埋花生醬、煉奶同砂糖真係無得輸～最近沙田以豬柳強而聞名嘅雞蛋仔小食店宣佈要結業，雖然其他舖都唔可以取代到佢，但仲可以喺邊度搵到好食又有特色嘅雞蛋仔同格仔餅？今次搜羅咗8間畀大家，有傳統原味亦有創意口味，連鹹嘅蠔仔雞蛋仔有，睇下你鍾意傳統定新嘢啦！

目錄

筲箕灣人龍店 低調高手大街小食

圖: 17feelgood

店舖名改得一啲都無錯呀，絕對係低調嘅高手！經過店舖就已經聞到好香蛋味，呢度嘅雞蛋仔空氣感幾重，口感相對香脆啲；格仔餅嘅醬超多，多到流晒落個袋到，厚度都啱啱好！雖然要排一陣隊但值得㗎。

蛋味十足 蛋香烘焙

圖: wingshuen1123

選材來自世界各地，好似100%紐西蘭牛油、美國麵粉及泰國鮮雞蛋，可見店主對食物嘅要求。同樣係蛋香超香濃，佢個包裝設計十分透氣，紙袋同膠袋都有窿，所以拎住行一段時間都仲係外脆內軟～

炭燒雞蛋仔 大澳華記香脆雞旦仔

圖: joychichi

用炭爐燒嘅食物會特別香係無錯㗎！大澳呢間炭燒雞蛋仔專門店，一人經營逐底逐底咁燒，每粒都脹卜卜，火侯十足而且好香炭燒味，口味又唔太甜，而且連個邊都好脆呀。

北角雞蛋仔名店 利強記北角雞蛋仔

圖: Addifoodie

由北角起家嘅人氣雞蛋仔，係唔少北角街坊回憶嘅味道～餡料相對比較飽滿又保留到少少空氣感，又香又軟熟，口感好好而且有蛋香，難怪咁受歡迎。

阿華田脆脆口味 Ice Puff

圖: BigTeaRice大茶飯

好多口味嘅雞蛋仔同格仔餅小食店，最高人氣係阿華田脆脆雞蛋仔口味，阿華田味十分濃郁，每一粒都有半溶嘅流心脆脆喺入面，伯爵茶味都好濃郁～佢嘅雞蛋仔大約8成蛋漿兩成空氣，飽滿又軟熟。

特厚格仔餅+香芋雞蛋仔 629雞蛋仔

圖: littlefoodie00

深受學生哥同街坊歡迎嘅小食店，推介特厚格仔餅，特厚版外脆內軟感覺更強烈，醬料方面牛油、煉奶、花生醬同糖份量啱啱好，唔會太漏。香芋粒粒蛋蛋即係香芋雞蛋仔，入面真係有原粒芋頭，好足料。

杭州桂花雞蛋仔 活在茶下

圖: Konkon22

唔單止小食店，連餐廳都有雞蛋仔食！呢間台灣主打茗茶文化，推出杭州桂花雞蛋仔畀大家配茶食，用上頂級蘭王蛋，蛋香濃郁帶有淡淡桂花香，好清新。

蠔仔雞蛋仔 雄館特式小廚

圖: bumbobee

雞蛋仔同蠔餅都成日食，但蠔仔雞蛋仔你又食過未？呢間小菜館將蠔肉加入雞蛋仔中，每一粒都有蠔仔，蛋香配埋蠔仔又幾夾，一啲都唔違和呀～

文: Yanica
編：Kar