天天海南雞飯終於要喺5月7日開始試業啦，各位雞飯迷都餓咗好耐喇，新店除咗有招牌海南雞飯，仲新增多款賣相幾靚嘅小菜添，各位foodie們即刻做定功課，mark定心水菜式先啦！

同新加坡店完全不同，新店裝潢較為新派。逾千呎餐廳約有60個座位，座位都幾闊落，而且偏向family style，好啱一家大細去食。

招牌海南雞飯除咗一碟雞飯、一碗以雞骨熬成嘅冬瓜湯以及濃稠黑醬油、辣椒醬、薑蓉醬三款調味料。一碟雞飯約有四分之一嘅雞件，上碟前淋上濃郁雞汁，更加惹味。午餐價錢為$80。

用冰水收縮嘅雞件口感嫩滑，雞味亦濃。而黃油飯更集合咗煮雞剩下嘅雞湯精華一同去煲，食落啖啖雞味。

食完個雞飯，最好配埋呢杯五十年代咖啡。咖啡豆採用印尼、馬來西亞混合而成，喺新加坡炒豆後直接運抵香港。當收到客人柯打，店員將已炒香嘅咖啡豆磨成粉，然後加水。另一邊廂，店員喺被熱水淥過嘅咖啡杯加入煉奶、淡奶，然後再倒入咖啡。味道香而不甜，午市加$18就可以有番杯啦！

賣相非常吸引嘅鹽磚和牛($168)，以炸蒜等配料炒香澳洲和牛粒，令肉質好有油香之餘又夠juicy，好味！廚師仲附設小心思，如果客人嫌唔太夠味，可以夾起和牛粒沾少許底層嘅粉紅岩鹽磚，食落更加惹味。

而且，呢款特別版鹽磚和牛，面層仲多幾塊由餐廳附近嘅市區水耕種植農場farmacy供應嘅有機金蓮花，味道好似wasabi咁帶少許刺鼻感。

同樣以澳洲和牛做主打嘅和牛手卷($148)，與三色椒等配料一同炒香，並放入呢個用炸米做成嘅手卷脆筒，外面脆卜卜，入面嘅和牛軟腍得嚟有嚼頭，外脆內軟。外層亦加上由farmacy供應嘅另一款九層塔花，與和牛、炸米一同進食，食落無咁油膩。

呢個名為友好切磋嘅菜式，實情即係豬腩肉雙拼。一款係港式燒腩仔，有層薄而香脆嘅豬皮，旁邊有蜜糖芥末調味；而另一款係日式叉燒，以豚肉汁去煨，再灑上黑白芝麻而成，價錢為$148。

有點fusion感嘅意大利黑醋滑炒賽螃蟹($128)，賽螃蟹內有蛋白、帶子、瑤柱等配料，同平日嘅差不多。但亮點就喺附送嘅慢煮45分鐘嘅溫泉蛋、意大利黑醋。客人進食之前，可將溫泉蛋倒入賽螃蟹之中，隨個人口味拌勻嚟食，仲有味道清新微酸嘅意大利黑醋調味。

臨尾食個甜品，夠晒大滿足。一客兩碗嘅榴槤豆花，上層嘅豆花好嫩滑，下層就有「香氣十足」嘅貓山王榴槤，以木盒盛載上枱。店員一加水，乾冰造出嘅仙氣即刻湧現，絕對係一大影相位。價錢為$128。

天天海南雞飯
地址: 銅鑼灣京士頓街9號Fashion Walk地下H2號舖

文：Joy