忙碌嘅都市人想飲碗無味精靚湯唔係咁易，大圍最近有間新餐廳就以中式靚湯做賣點，大大碗湯麵可以飲到一滴不剩甚有日式拉麵影子，仔細睇材料配搭又有少少西餐感覺。但背後最為重要嘅，其實係每日花足50斤唔同材料，熬煮超過6個鐘得出嘅濃郁高湯。
 

必飲足料靚湯

好湯好麵小店背後有四位負責人，其中一位Irene本身都好鐘意食麵同飲住家靚湯，因此就促成咗餐廳以無味精中式湯麵做主打。要唔落味精又夠味就要落足材料，每煲基本高湯用火腿肘、雞殼、唐排、豬筒骨、赤肉等超過50斤材料熬最少6至8個鐘，最後得出嘅半煲湯底自然充滿膠質，濃香鮮甜。
 

除咗高湯之外，仲有6款加入唔同材料嘅湯底，好似墨魚濃湯、羊肉高湯等。亦有另外熬煮嘅全素海帶湯同蕃茄濃湯。全部無加任何味精，平時食慣重口味嘅可能一開始會覺得有啲淡，但好處係可以輕鬆飲哂成碗湯而唔會覺得口乾。每款湯底都係分開煮，盡量每次只煮一碗，繁忙時間最多每次煮三碗麵，保持品質穩定。
 

三大人氣湯麵

海龍皇湯（$128）

湯底用咗魚、蜆、蝦、龍蝦熬成，上枱前再淋上蝦頭油，聞落有非常香嘅龍蝦同蝦膏味。飲落味道無想象中咁香濃，但就襯托出其他材料嘅鮮味。藍蟹肉、海蝦同帶子分別嚟自越南、菲律賓同日本北海道，蟹肉鮮甜略嫌分量較少，海蝦蝦膏濃香而且蝦肉彈牙，帶子特別選用可當刺身食用嘅等級，煮至半熟保持鮮味同彈牙。
 

配料出色之餘，另一主角麵條亦唔輸洩，用嘅係香港一間本地製作麵廠嘅出品。海龍皇湯配嘅係較為幼身嘅陽春麵，可以索到更多湯，口感滑身。
 

黑口黑麵（$76）

黑色嘅湯其實係用墨汁同大量嘅魚熬成，飲落先有少少墨汁香，之後就係非常強勁嘅魚嘅鮮甜味，真係幾有飲緊住家靚湯嘅感覺。手打墨魚滑口感比較軟腍，但裡面有粒粒墨魚肉，所以口感層次鮮明，而且鮮味十足。日本墨魚肉韌度亦啱啱好。
 

有無發現呢兩款湯麵嘅湯底同配料搭配頗有西餐嘅感覺？其實因為餐廳負責人之一Gary係有超過20年做法國菜嘅經驗，亦有酒店、會所等高級餐廳經驗，12款湯麵當中其實有唔少係糅合咗西餐元素㗎。
 

 

棉花雞（$88）

用嘅係基本高湯，但因為有魚肚同北菇做配料，再加上一分菇香，而且擺咗一陣就已經有層衣浮面。湯底香濃而唔渾濁，飲落有少少膠質嘅黏感但唔到漿口。
 

雞肉亦特別揀咗鹿兒島地雞，仲要選用雞髀肉，雞肉口感特別結實但唔過硬。加上雲腿絲提鮮，呢碗湯麵版嘅棉花雞真係食得出「雞有雞味」。
 

小店背後嘅用心

睇到開飯仔介紹寫咗一大堆，就知道餐廳喺每碗湯麵背後付出嘅心機同時間有幾多。所以就算最貴一碗西班牙火腿湯麵索價$158，依然有價有市。而且單睇餐牌就睇得出佢地揀食材嘅用心，Gary笑稱如果用海龍皇湯（$128）嘅食材，但將湯麵變成意粉然後擺喺意大利餐廳餐牌上面嘅話，可能已經要超過$160一碟。
 

當然小店無華麗裝修無Live Music表演，但佢地一樣注重衛生，而且服務亦相當貼心。好似上黑口黑麵嘅時候會附上紙圍裙，另外仲有濕紙巾供應。飲品亦特別有近年大熱嘅冷泡茶選擇，清得嚟唔會搶走湯麵鮮味。

而且仲有兩款全素嘅湯麵選擇，配搭一樣落足心機，好似田園素菜（$68）湯麵嘅湯底加咗番茄乾同香草調味，令素湯飲落都唔會覺得寡口。做咁多功夫，最後都係為咗為大家獻上一碗「好湯好麵」。
 

好湯好麵
大圍積存街20號地舖

文、相、片：Cathy