喺香港食日式席前鐵板燒，閒閒地都人均一千蚊埋單，有時食完都真係有啲肉痛。不過想平食鐵板燒都唔係無選擇，最近觀塘區新開一間鐵板燒專門店，推出$880二人前鐵板燒套餐，人均都係$440，而且食物質素都幾有水準，啱晒各位手緊又想食好西嘅朋友。
餐廳位置不多，有兩間容納八人嘅房間及近門口位置嘅壽司吧。鐵板燒由擁有二十年下廚經驗嘅布師傅主理。
$880二人前鐵板燒套餐一共有十道菜，包括前菜、沙律、刺身、銀鱈魚、鵝肝、美國肉眼薄燒、時令野菜、炒飯、湯及甜品，就算男士都會夠飽。仲會每人送一隻南非鮑魚，可謂抵上加抵！第一味菜係前菜三小碟及沙律，味道清爽開胃，作為開胃菜就最好不過啦。
第三道菜係香港人最鍾意嘅刺身，包括赤身、油甘魚、三文魚、帆立貝及鰆魚，款款都新鮮厚身，而刺身亦會根據時令而有變化。
更多【新店直擊】： |
套餐每人送一隻南非鮑魚，先煎香後焗，鮑魚厚肉，有濃濃鮑魚味，點埋鹽食鮮味更突出。
加拿大銀鱈魚加入迷迭香及香茜，令味道更豐富，銀鱈魚充滿魚油，一入口感受到香濃魚油香，魚肉亦夠滑身。
匈牙利鵝肝油脂同樣豐富，入口即溶，鵝肝亦大塊厚身。底下墊上麵包吸油減低膩感。
鐵板美國肉眼薄燒只需輕輕一燒捲起就食得，熟成程度啱啱好，入口軟腍，牛味亦突出，加入葱粒及乾蒜味道更豐富。配上時令野菜食就無咁易漏啦～
炒飯加入洋蔥及蛋等材料炒香，乾身而且粒粒分明。
最後以甜品雪糕作結尾，配上香甜嘅多士，食完真係好滿足！
地址: 觀塘駿業街43號地下
文: Yanica
相、片: Tom Li