有時出街食但又想食得清淡啲，去食返碗魚湯麵就啱晒啦～今期介紹幾間畀大家，有足料鮮魚湯同日式鯛魚湯等。

目錄

屯門鮮魚湯小店 鮮魚湯 

圖: Fafawa2018

一間喺屯門都幾有人氣嘅鮮魚湯小店，魚湯底非常出色，冇味精同魚腥味，飲晒成碗都唔會口渴呀。佢嘅炸物同丸類配料都幾高質素，想試晒全部嘅推介「回味雜錦」，一份有齊魚肉春卷、蝦卷、墨魚卷、魚片頭、魚腐、墨魚丸及墨汁丸。蝦卷鮮味出，而且加咗粟米粒就更有口感；墨魚卷咬到粒粒墨魚㗎，炸過嘅魚腐吸晒啲魚湯，一咬就爆汁，外脆內軟冇得輸呀。

花膠扒皇鯛魚湯烏冬 海鯛魚湯專門店   

圖: daydayEATnFAT

新開幾個月，位於鰂魚涌嘅鯛魚湯烏冬專門店，啱晒附近嘅上班族呀。主打日式鯛魚湯烏冬，湯底呈奶白色，佢嘅鯛魚湯底係熬製咗十幾個小時，難怪飲落咁濃郁鮮甜，味道都好天然，一飲就知好足料。招牌花膠扒皇鯛魚湯烏冬，花膠扒好似手掌咁大塊，亦都好厚肉，爽滑彈牙，配埋滑溜煙韌嘅烏冬一齊食口感一流！

荃灣老字號 魚鱻魚湯專門店

圖: 為食少女

呢間係荃灣嘅老字號，佢哋嘅湯底都係偏向清淡嗰派，味道清甜。最招牌嘅配料都係魚類，如招牌鯇魚腩，鯇魚滑得嚟無腥味，鍾意食魚腩嘅朋友一定要試。炸魚餅都係另一人氣配菜，新鮮炸出嚟好香口呀～自家製炸琵琶豆腐都好出色，熱辣辣香噴噴，外面脆口內裡好嫩滑。

真材實料魚湯米線 魚仔魚湯米線

圖: cvis_cherry、fongkki

位於大埔街市熟食中心嘅魚湯米線專門店～佢地嘅湯底使用鮮魚熬製，每朝老闆都會去買魚熬個湯，真材實料，飲落好鮮甜！唔單止湯底，佢哋唔同嘅配菜都好好食，如招牌豬軟骨，炆到好腍又入晒味；另有豬肚粉腸米線，粉腸冇怪味亦都好腍。仲有酥炸鯪魚球，外脆內軟配埋泰式辣醬更惹味。溫馨提示佢哋只係開到3點，想食要早啲去呀～

文: Yanica

文：Yanica