美好的一天由一餐好嘅早午餐開始～嚟到春季，週末不妨約吓朋友去食餐豐富嘅brunch啦！今期有摩登泰菜、日式任食、意大利及日本料理同埋揉合秘魯元素嘅日本料理，又幾特別。

「So Thai So Chill」週末早午餐 Mue Mue

全新「So Thai So Chill」週末早午餐，令食客可以用超值價錢一次過品嚐多款泰式美食。前菜包括青醬鮑魚，配以摩登海鮮冬蔭功，酸酸辣辣好開胃；仲有黃金脆魚皮、香茅雞翼、紅磚豆腐等6款小食任食。主菜可選一款，包括泰皇咖喱龍蝦（需另加HK$328）、泰皇咖喱虎蝦、香茅檸檬葉烤魚、青咖喱和牛面頰、紅咖喱香蕉雞同胡椒和牛肉炒糯米河等，而泰皇咖喱龍蝦香辣惹味，龍蝦大隻又彈牙。最後以甜品番石榴玉露作結，酸甜消滯。

價錢：每位HK$328（另收加一服務費）
供應時間：逢星期六、日及公眾假期：12:00-16:00

日式週末任食早午餐 ODDS   

中環多元化日式概念餐廳，最近推出週末任食早午餐，啱晒鍾意日式料理嘅朋友。早午餐包括時令刺身拼盤（3款）、一道自選主菜同超過30款無限任點小食，可以食盡刺身、壽司卷物、串燒、鐵板燒等。主菜推介鰻魚便當同牛肉鐵板燒，前者醬汁香甜可口，鰻魚魚油香濃又厚肉；後者牛味突出。客人更可以升級享用「無限暢飲套餐」（HK$198）同「豪華無限暢飲套餐」（HK$638）𠻹。

價錢：每位HK$688（另收加一服務費）
供應時間：星期六及公眾假期：12:00-15:00

意大利風味日式brunch The Sixteenth  

La Favorita x Honjokko週六早午餐同時呈現兩間餐廳嘅招牌菜式，食客可以同時享用意大利同日本料理。前菜包括吞拿魚他他、番茄布袋芝士沙律、日式枝豆、香煎豚肉餃子同三文魚牛油果卷。主菜方面，客人可自由選擇，包括慢煮牛肉蘑菇闊條麵或香濃意式麵糰丸子配以水牛芝士、羅勒及番茄醬；鍾意日本嘢嘅客人則可選擇雜錦天婦羅拼盤或汁燒豚肉五花腩串燒。甜品推介黑芝麻焦糖燉蛋，濃濃黑芝麻香氣配上蛋香，好出色！

價錢：每位HK$520
供應時間：逢星期六直至另行通知

融合秘魯元素 Nobu

呢間酒店餐廳嘅全新週六早午餐糅合秘魯同日本元素，包括特色小食、壽司、新鮮刺身、沙律等冷盤。刺身方面以秘魯風味刺身最特別，將魚片稍微醃製，清新爽口；生蠔特色莎莎好大隻，醬汁幾開胃。主菜每位可選兩款，軟殼蟹斑尼迪蛋、迷你和牛鴨肝漢堡及大啡菇配山葵洋蔥莎莎都幾有特色。更可升級至火焰A5級日本和牛、鮮味滿滿嘅烤龍蝦配忌廉海膽汁～

價錢：每位HK$858
供應時間：2024年4月6日起（逢星期六及特定公眾假期）：11:30-14:30（最後上菜時間為14:30）

文：Yanica
編：Cathy