喺香港地食漢堡有好多選擇，真係少啲特色都好難突出重圍㗎！今期搵咗4間特色或手工漢堡店畀大家，有炸雞雪糕漢堡、夏威夷漢堡、超巨型芝士裙子漢堡同自家製素漢堡，實有一間啱口味！

目錄

炸雞雪糕漢堡+吞拿魚扒漢堡 The Cool Cousins Cafe & Noodle Bar

圖：pigfoodiexhk

講到創意真係非呢間餐廳莫屬，佢哋供應嘅漢堡唔係夠晒有特色就係真材實料！好似炸雞雪糕漢堡，將香脆法國春雞雞髀扒沾上自製香辣水牛城醬汁，搭配雲呢拿雪糕、楓糖同芝士醬，意外地幾match，而且甜甜嘅雪糕又中和咗炸雞嘅油膩。烤吞拿魚扒莎莎漢堡，外層口感似燒牛肉，內層就似赤身，好令人印象深刻呀。另外牛油果法式鴨髀布里漢堡同72小時安格斯牛小排漢堡都好值得試。

百份百純牛肉炮製 Smash'd 

堅尼地城呢間手工漢堡包店最近推出全新漢堡系列，首先佢哋連個包都係自家製作，誠意十足。夏威夷 5-0 漢堡靈感源自夏威夷薄餅，焦香多汁嘅漢堡扒配上香甜烤菠蘿、煙肉、半溶芝士同特製醬汁，鹹甜有致～所有漢堡扒都係100%純牛肉炮製，牛味好重。煙肉泡菜漢堡成個feel好fusion，大膽結合咗美國煙肉同泡菜，集合酸、辣、甜、鹹嘅泡菜搭配脆煙肉同墨西哥辣椒醬，好惹味呀～

超巨型芝士裙子漢堡 The Diner 

圖：andymyf

中環一間充滿美式風情嘅漢堡店，內有霓虹燈、紅磚牆配紅皮座椅同懷舊街機等，完全感受到六七年代嘅美國懷舊風情～餐廳必食嘅漢堡就係呢個裙子漢堡，一望已經好吸睛，超大一塊燒芝士夾喺漢堡中間，好似裙子一樣，芝士味道偏鹹香味，外層口感香脆，中間就煙煙韌韌咁，漢堡扒帶香濃嘅牛肉味，兩個人share已經好夠啦！

自家製素漢堡扒 Mirror Burger  

圖： leetszhin

其實食漢堡都有健康嘅選擇㗎～西營盤呢間餐廳就主打均衡概念，漢堡主要分為Guilty（牛肉）同Guilt-free（素食）兩類，招牌鏡漢堡有齊牛肉漢堡扒同者自家製素漢堡扒，自家製素漢堡扒主要以番薯、紫薯、紅腰豆、鷹嘴豆製作，裹上蛋漿同燕麥再炸，外脆內鬆軟，咬落有時仲有原粒紅腰豆嘅口感，就算冇肉都好好食！鍾意重口味嘅朋友就推介香辣芝士牛肉漢堡，自家製煙燻墨西哥辣椒醬加上醃墨西哥辣椒粒，愛辣人士必試！

文: Yanica